Read Khumi Chin MATTHAI 20 Bible Online

MATTHAI 20 - Khumi Chin bible

MATTHAI 20

¹“Kani pri my peang nai ly yhmkeung my chei angthodyh iy tham naichi ai mymy i kreip akho y kalop sa hai nai kamta ne.

²Naibaly mymy ly tham naichi hawi kanirei y pia vui pangrei pei ai nai aly bo nabaly, mymy i kreip akho y pato bo.

³Naibaly mymy ly kani achaw deaung nai kha y chei i, khumi takhra ai seng meingtym y angdo atyhtyh nai niu bo;

⁴naibaly mymy ly nichi teng y, ‘Nangchi py kreip akho y chei u teang, avo nai ryrei kang pei ai mang,’ napi. Naibaly nichi ly chei u bo.

⁵Naibaly mymy ly kanithun kha y hawi kani ka-reu y py chei bi iy, hunai kamta sa bi.

⁶Naibaly dyn biu theaung neng kha y chei iy, khumi takhrachi ai angdo nai niu i nichi teng y, ‘Nangchi ly ati mana nai hi y kani khengrei angdo u atyhtyh mo?’ napi.

⁷Naibaly nichi my ly mymy teng y, ‘Ami py kalop so hai y nai deaungkho y teu,’ napi. Mymy ly nichi teng y, ‘Nangchi py kreip akho y chei u teang,’ napi.

⁸“Naibaly dym mang y ly kreip akho keung my ly mymy i yhmtheaung kry nai keung teng y, ‘Tham naichi ai palau ly, kangkhym keh nai dengdairei pateaung iy kangman keh nai tym pa-rei nichi ai vang pei,’ napi.

⁹Naibaly dym biu theaung neng kha y jeu naichi ly pia vui pangrei nga u bawibawi.

¹⁰Naibaly kangman keh naichi ly chei u iy nawi kyh nga u ai nai athang khai; na i py nichi py pia vui pangrei nga u bawibawi teang.

¹¹Naibaly nga u iy, ‘Nang ly nichi ai kaichi kani khengrei kani bi kangngo ajai iy,

¹²ka-ui kakai tleaungleaung naichi kamta vanrei palawn bo,’ nanai yhmkeung i tlang tleaung y jo sei u bo.

¹³Naibaly mymy ly nichi theung i leaungrei teng y, ‘Nai awi, kai ly nang i tlang tleaung y hawi y sa nai ati sai py by y chy bo: pia vui pangrei pei ai nai aly yb nai ny y a?

¹⁴Nangmy i vui pei nai phai lo ly, tako tako jau; kai ly nang ai kang pei nai kamta khyp ly hini kangkhym keh naichi teng y py kapei ai nai ngai.

¹⁵Kaimy i teu ly kaimy ngaingai so ngau y a? Ti y baly kai ly hawi nai deaungkho y nang ly khen hawi y nai sai a?’ napi nai pathang.

¹⁶Hunai kamta kangkhym kangtem nai ly kangman y awm ai i, kangman keh nai py kangkhym kangtem y awm ai,” napi.

¹⁷Naibaly Isu ly Jerusalem avang y kalau nai thym khala y abangnai leaung holai nyhreichi ai ly hawi takhra i, lam sala y ly nichi teng y,

¹⁸“Khen cham, achi ly Jerusalem avang y kalau ai he; Khumi i Chapo ai ly pathyp pi nai keung kalenchi hawi Reita patiu nai keungchi i kiu y patiu hai ai; naibaly nichi my ly mymy i tlang tleaung y dei ai nai leu atlym hai ai i, panui hai ai nai hawi,

¹⁹chip ai nai hawi, kraws y tahen ai nai py Cheng Takhrachi teng y au ai; naibaly kani thomrei kani y ni ai pathau teang ai,” napi.

²⁰Hunai thym khala y ly Zebedai i chapo i amhm ly chapo nini ai hawi iy mymy teng y chei, naibaly ni ai chiu iy atiti mo hnei bo.

²¹Naibaly mymy ly ni teng y, “Nang ly ati ngai mo?” napi. Naibaly ni my ly mymy teng y, “Hini kai i chapo nini ai ly nang i peang naira y nang i lamtang mang y leaungrei, nang i langvawi mang y leaungrei ateh hawi thai ai nai leu pei kyh,” napi.

²²Isu my ly, “Nangni i hnei nai ly nangni ly pany y. Kai i khau nei ai nai ly nangni nei hawi thai a?” napi nai pathang. Nini my ly mymy teng y, “nei thai chy,” napi.

²³Mymy ly nini teng y, “Kai i khau ly nangni ly nei hawi takengkei ai; na i py kai i lamtang mang y hawi langvawi mang y ateh ai nai leu ly kai i pei ai nai ny y leang Ngaai my sa pi rym naichi i vui ne ai,” napi.

²⁴Naibaly leaung horeichi ly huni satang thai i amjo amnau leaung nyhrei nini i tlang tleaung y khri pa-rei paleung hawi y bo.

²⁵Na i py Isu my ly nichi ai palau iy, “Cheng Takhrachi i tlang tleaung y peang nai keungchi ly nichi i tlang tleaung y khri pa-rei atho sa na, nichi i khumi kalenchi py nichi i tlang tleaung y khri pa-rei aly peang, nanai nangchi pany.

²⁶Nangchi theung y hunai kamta awm ai nai tlo y: na i py nangchi theung y ami py khumi kalen lawn ai ngai nai ngierei ly nangchi ai sabawm nai keung y awm ai nai tla;

²⁷ami py nangchi theung y kangman keh lawn ai ngai nai ngierei ly nangmychi i miseaung y awm ai nai tla;

²⁸hunai kamta teang khumi i Chapo ly mymy ai sabawm ai nai hau nai ny y i, kalangchi ai sabawm ai nai hawi khumi neangneangchi ai atleu ai nai mymy i hengra pei lawh ai nai py ang jeu nai ne,” napi.

²⁹Naibaly nichi ly Jeriko avang i nai theu u nai thym khala y ly khumi mipui ka-teng ny y nai mymy teng y abang u bo.

³⁰Naibaly khen cham, mei kamju leaung nyhrei ly lam teng y ateh nai Isu tako, nanai thai hawi iy, “Areng Davida i chapo awi, kaini ai pahen kyh,” nanai aeu hawi.

³¹Naibaly khumi mipuichi my ly katheu y ai nai nini ai jo; na i py nini ly “Areng Davida i chapo awi, kaini ai pahen kyh,” nanai aeu ra bo.

³²Naibaly Isu ly angdo pawp iy nini ai palau i, “Nangni ai ati kang sa pi ai nai ngai hawi no?” napi.

³³Nini my ly mymy teng y, “Areng kaini ly mei angvang ai nai ngai,” napi.

³⁴Hunaibaly Isu ly khrikhri pa-rei pahen nai, nini i mei y nam i nini ly tlenrei khyh my mei angvang praw i, mymy teng y abang hawi bo.