Read Khumi Chin MATTHAI 22 Bible Online

MATTHAI 22 - Khumi Chin bible

MATTHAI 22

¹Naibaly Isu ly pathang i nichi teng y pata nai leu y thui pi bi:

²“Kani pri my peang nai ly ami mo samrang leaungrei ly ni i chapo i vui y aju palyn nai pawi sa nai hawi pata nai ne.

³Naibaly aju palyn nai pawi biu cha naira y jeu ai nai napi yb naichi ai heang ai nai mymy i miseaungchi ai pato: na i py nichi ly jeu ai nai ngai u y bo.

⁴Naibaly mymy ly, ‘Kai i heang naichi teng y ly, khen cham, kai i pawi sa rym nai pajau bo i, kai i si kataichi hawi kai i tawnbawi pacho patyp naichi ly tleh i, ati cheaungkhang sa rym bo; aju palyn nai pawi y biu cha ai nai jeu u jau, tapi u’ napi nai miseaung takhrachi ai pato bi bo.

⁵Na i py nichi ly huni leu pateng y nai tako u iy, leaungrei ly mymy i hlau y chei, leaungrei ly ka-pai sa naira y chei;

⁶khumi takhrachi my ly mymy i miseaungchi ai patiu iy angji ngailai pa-rei my sa i padei u bo.

⁷Hunaibaly samrang ly kado theu i mymy i tavaimichi ai pato iy, huni khumi ai padei nai keungchi ai ly padei teang i, nichi i avang py leang pi pawn bo.

⁸Naibaly mymy ly mymy i miseaungchi teng y ly, ‘Aju palyn nai pawi ly kasa rym bo, na i py heang naichi ly cha ai nai ataing y leang.

⁹Hunaibaly lam kangprei sangum takhra takhra y chei u ly, niu nai ngiereichi ai ly aju palyn nai pawi y biu cha ai nai heang u,’ napi.

¹⁰Hunaibaly huni miseaungchi ly theu u iy lam y chei u i, niu nai ngiereichi ai ly, khumi kamngo py ne sy, khumi kahawi py ne sy, bawibawichi ai hawi u achu bo; hunaibaly jeu achu naichi ly aju palyn nai pawi biu cha naira kawi u bo.

¹¹“Na i py samrang ly huni heang naichi ai khen ai nai kun iy, apom nai kanih akhiu y nai leaungrei ai hu y niu bo.

¹²Naibaly mymy ly ni teng y, ‘Nai awi, apom nai kanih akhiu y naimy hi y mana kun lawh mo?’ napi. Naibaly ni ly sai py katheu thai y bo.

¹³Naibaly samrang my ly mymy i miseaungchi teng y, ‘Ni i kiu kheu kawm u ly, angam mang i kaveng y patheu u; hu y ly vo py vo ai, ho py akachai ai,’ napi.

¹⁴Heang naichi ly nawi parai, na i py vawi takhra naichi ly di parai,” napi.

¹⁵Hunai thym khala y ly Pharisaichi ly mymy i leu thui naira y patiu thai ai nai sai arum u bo.

¹⁶Naibaly nichi ly mymychi teng y abangnaichi hawi, Heroda i kamkawmchi ai mymy teng y pato i hunichi my ly, “Sara awi, nang ly khumi meitang ne, Tameuh i lam y py leu meitang khyp naimy patiu iy, ami ai py meimai akhen y, nanai kaichi pany: ati mana nai mo nabaly nang ly ami ai py patle takhra lawh nai py by y.

¹⁷Hunaibaly nang ly mana dawn mo? Kaichi ai thui pi cham. Kaisara teng y akeu pei nai ly pei ngau a pei ngau y a?” napi.

¹⁸Na i py Isu ly nichi i kamngo nai sai ly pany iy, “Nangchi tapawp naichi awi, ati mana nai kai ai cham u mo?

¹⁹Akeu tangka kai ai patei u cham,” napi.

²⁰Naibaly nichi ly mymy teng y pia vui pangrei nai tangka cho la i mymy ly nichi teng y hini myn hawi amyn ly ami i mo?” napi. Naibaly nichi ly mymy teng y, “Kaisara i,” napi.

²¹Naibaly mymy ly nichi teng y, “Tumbaly Kaisara i atitichi ly Kaisara teng y pei u ly: Tameuh i atitichi ly Tameuh teng y pei u bei,” napi.

²²Naibaly nichi ly huni leu thai i khri pa-rei lyh nai, mymy ai khai su i tako u pawn veng.

²³Hunai kani teang angthau bi ai nai by y, nanai Saddukaichi ly mymy teng y chei u i ni teng y,

²⁴“Sara awi, Mosi my ly, ‘Khumi leaungrei chanau so y naimy dei iy, ni i amjo amnau my ly ni i aju tavau ai la iy amjo amnau i vui ti ampreng pi ai nai tla,’ napi.

²⁵Ne naibaly kaichi theung y amjo amnau leaung saryhrei awm i, chalu ly aju la iy dei bo: naibaly ti ampreng y nai deaungkho y ni i aju tavau ai ly mymy i amnau amtym ai nai khai pi bo;

²⁶hunai kamta teang pa-nyh pa-thom py sa i, saryhrei nai tym pa-rei bebe sa bo.

²⁷Naibaly nichi bawibawi dei nai bo y ly huni neampachy py dei teang.

²⁸Hunaibaly angthau bi nai khala y ly nichi leaung saryhreichi theung y ly mani i aju lawn ai mo? Nichi bawibawi ly ni ai la bo,” napi nai deng u bo.

²⁹Isu my ly nichi teng y, “Nangchi ly Tameuh i cha-iu leu hawi Tameuh i atiti sa thai naira pany u y nai deaungkho y dawn tamang u nai ne.

³⁰Angthau bi nai khala y ly nichi ly apom py apom y, apom ai nai py deaung paseng y, kani pri i amtaw thau naichi kamta awm ai bo.

³¹Naibaly kadeichi angthau bi ai nai leu ly, Tameuh my nangchi teng y, ‘Kai ly Abraham i Tameuh, Isaka i Tameuh, Jakob i Tameuh ne,’ nanai thui pi nai ly phain u y nai sai a?

³²Tameuh ly kadeichi i Tameuh ny y leang, kanghengchi i Tameuh teu,” napi nai pathang.

³³Naibaly khumi mipuichi ly huna nai thai i, mymy i patiu nai ly khri pa-rei lyh na.

³⁴Naibaly Pharisaichi ly Isu my Saddukaichi ai tlau pajau y pa-rei my thui pi nanai pany iy achu u bo.

³⁵Naibaly nichi theung y khumi leaungrei Reita pany nai keung my ly,

³⁶“Sara awi, Reita leu y leu pei nai ly mani len keh mo?,” nanai mymy ai cham nai leu deng bo.

³⁷Naibaly mymy ly niteng y, “Nang i Areng Tameuh ai ly nang i paleung verei hawi, nang i phailo verei hawi nang i dawn nai bawibawi hawi nang tamen ai nai tla.

³⁸Huni ly leu pei nai len keh nai hawi, aly len keh nai ne.

³⁹Naibaly huni ka-tla atawm hui nai ly hini he, ‘Nangmy ai atamen nai kamta nang i saleaungchi ai py tamen ai nai tla,’ napi nai ne.

⁴⁰Huni leu pei nai nyhrei naira y ly Reita leu hawi amochi i leu bawibawi akup bebe nai bo,” napi.

⁴¹Naibaly Pharisaichi ly achu u nai thym khala y ly Isu my nichi ai sairei deng i, “Krista ai ly mana dawn u mo? Ni ly ami i chapo mo?” napi.

⁴²Nichi my ly mymy teng y, “Davida i,” napi.

⁴³Mymy ly nichi teng y, ‘Tumbaly Davida my Phailo Kachai i saho y mana nai ni ai Areng napi lawh? Mymy ly,

⁴⁴‘Areng ly kai i Areng teng y, Nang i paleung ka-echi ai ly nang i kheu padawi anui y kakhai y ryrei ly, Kai i lamtang mang y ateh,’ napi.

⁴⁵Davida ly mymy ai Areng napi lawh baly, mana nai ni ly chapo ne thai ai mo?” napi.

⁴⁶Naibaly ami py sai py pathang thai y bo, huni kani dengdairei baly ami py leu takhra ha py deng vam y bo.