Read Khumi Chin MATTHAI 23 Bible Online

MATTHAI 23 - Khumi Chin bible

MATTHAI 23

¹Naibaly Isu ly khumi mipuichi hawi abangnaichi teng y leu thui i,

²“Reita patiu nai keungchi hawi Pharisaichi ly Mosi i ateh naira y ateh u lawh,

³hunai deaungkho y nichi i ang thui pi nai ngierei ly so u ly patawn u; nichi i atiti sa nai kamta naini so u moh; nichi ly thui mang ly thui u i, so mang ly so u y pasi lawh veng.

⁴Nichi ly myn ji parai nai pavei u iy, khumichi ai apu hai lawh, na i py nichi ly kiu pajeung kadeaung chy y py teaungdei ai ngai u y.

⁵Nichi i atiti sa nai bawibawi ly khumi i ka-niu y sa nai teu; nichi ly la-phawi vui bei kalen sa i kanih tawn py len parai sa;

⁶naibaly pawi sa naira y tahm asang keh nai meingtym hawi, achura yhm y tahm asang keh nai atehra hawi,

⁷seng meingtym y nichi ai chiu nai amichi my nichi ai, ‘Rabbi,’ napi nai py ngai u parai lawh.

⁸Na i py nangchi ly ‘Rabbi’ ang palau nai amteng u moh; nangchi ai patiu nai keung ly leaungrei awm khyh, naibaly nangchi bawibawi ly amjo amnau ne.

⁹Naibaly nangchi ly khaileaung pri y ami ai py ‘Ngaai’ ti u moh: Ngampo ly leaungrei awm khyh, mymy ly kani pri y awm.

¹⁰Pahawi nai keungchi ang palau nai py amteng u moh: nangchi ai ang pahawi nai keung ly leaungrei awm khyh, huni ly Krista ne.

¹¹Nangchi theung y len keh nai ly nangchi ai sabawm nai keung y awm lawh ai nai tla.

¹²Ami py tahm apasang nai ngierei ai ly tahm panem ai; ami py tahm apanem nai ngierei ai ly tahm pasang ai.

¹³“Na i py nangchi Reita patiu nai keungchi hawi Pharisai tapawp naichi awi, nangchi ly taham si! Nangchi ly amichi i vui kani pri my peang naira ly kho hai tawp veng iy, nangmychi py kun u y i, kun ai naichi ai py nangchi my kun ai nai pei u y.

¹⁴[Nangchi Reita patiu nai keungchi hawi Pharisai tapawp naichi awi, nangchi ly taham si! Nangchi ly neampachy lumaichi i yhmtheaung cha pi, naibaly tapawp ai nai tau nai kra parai pa-rei my chiu sa u lawh; hunai deaungkho y nangchi ai ly pasum nai tleaung y pasum ra ai.]

¹⁵Reita patiu nai keungchi hawi Pharisai tapawp naichi awi, nangchi ly taham si! Khumi leaungrei ai nangchi i reita y pakun ai nai nangchi ly pangli mang py kacheng mang py amki, naibaly mymy ly kun bo nabaly mymy ai nangchi tleaung y ty keh nai ngari angawm i chanau sa hai lawh.

¹⁶“Nangchi pahawi nai keung mei kamjuchi awi, ‘Ami py achura yhm kalen pui y tauh iy vaineng abeu nai ngierei ly, huni ly ati sai py ny y leang; ami py achura yhm kalen pui i muku y tauh iy vaineng abeu nai naini sa tanga ai nai tla,’ napi nai keungchi awi, nangchi ly taham si!

¹⁷Nangchi cheng y nai hawi mei kamjuchi awi! Mani nai len keh mo? Muku a? Muku khai hai takhra nai achura yhm kalen pui a?

¹⁸Naibaly, ‘Ami py maicham y tauh iy vaineng abeu nai ngierei ly, huni ly ati sai py ny y leang; salo y atiti talam angchi nai ai tauh iy vaineng abeu nai ngierei naini sa tanga ai nai tla,’ na u lawh.

¹⁹Nangchi mei kamjuchi awi! Mani nai len keh mo? Atiti talam nai a? atiti talam nai ai khai hai takhra nai maicham a?

²⁰Hunaibaly ami py maicham y tauh iy vaineng abeu nai ngierei ly, maicham hawi huni tleaung y awm nai bawibawi y tauh iy vaineng abeu lawh.

²¹Naibaly ami py achura yhm kalen pui y tauh iy vaineng abeu nai ngierei ly, achura yhm kalen pui y hawi huni theung y awm nai keung y tauh iy vaineng abeu lawh.

²²Ami py kani y tauh iy vaineng abeu nai ngierei ly Tameuh i atehra hawi huni i tleaung y ateh nai ai py tauh iy vaineng abeu lawh.

²³“Nangchi Reita patiu nai keungchi hawi Pharisai tapawp naichi awi, nangchi ly taham si! Seaungsyn hawi chamaw hawi chija py nangchi ly horei y harei pei u i, Reita leu aly len keh nai, hawi naira py, pahen naira py, ka-ym awm naira py so u y pasi lawh: na i py hunichi nangchi sa ai nai tla veng, naibaly tuni py sa ai khai su ai nai tlo y leang.

²⁴Pahawi nai keung mei kamjuchi awi, nangchi ly changrang ly aeang i kula-iu ly pajawn.

²⁵“Reita patiu nai keung hawi Pharisai tapawp naichi awi, nangchi ly taham si! Nangchi ly khau hawi saibi ly salo mang paju u i, theung mang y ly cha parawp nai hawi amkym pajau y nai kawi bo.

²⁶Nang Pharisai mei kamju awi, khau hawi saibi ly salo mang py chai thai ai nai theung mang y paju man.

²⁷“Reita patiu nai keungchi hawi Phraisai tapawp naichi awi, nangchi ly taham si! Tapreaung kaleung bau pa-rei paju iy, salo mang y ly apu pa-rei amteng i, theung mang y ly khumi kadeichi i hiu hawi chai y nai cheaungkhang kawi naichi kamta atawm nangchi ly!

²⁸Nangchi py hunai kamta atawm khyp teang, salo mang y ly khumichi i mei ka-niu y hawi parai nai amteng u i, theung mang y ly tapawp nai hawi kamngo nai kawi u lawh veng.

²⁹“Nangchi Reita patiu nai keungchi hawi Phraisai tapawp naichi awi, nangchi ly taham si! Nangchi ly amochi i tapreaung sa u iy, khumi kahawichi i angawm py palum u i,

³⁰‘Achi ly isichi deung khala y awm i khyly, amochi i thi patheu naira y abawi y leang,’ na u lawh.

³¹Hunaibaly nangchi ly amochi ai padei nai keungchi i chanauchi ne, nanai apany hai nai ne.

³²Hunaibaly ngamsichi i ne naira pakawi u.

³³Pavuichi awi, pavui i kangpreangchi awi; nangchi ly ngari angawm tara chih nai ly mana tleaung u thai ai mo?

³⁴Khen cham, huni deaungkho y chy bo, kai ly nangchi teng y amochi, khumi kachengchi, Reita patiu nai keungchi ai kang pato ai; nangchi ly phyreichi ai padei u ai i kraws tleaung y tahen u ai; phyreichi ai ly nangchi i achura yhm y chip u i, avang tleirei y hui iy ana u ai;

³⁵hunaibaly khumi kahawi Abela i thi dengdairei, meingtym kachai hawi maicham sala y Barakia i chapo Zakaria ai nangchi my padei nai thi khrairei, khaileaung tleaung i khumi kahawichi i thi theu nai bawibawi ly nangchi i tlang tleaung y tym ai.

³⁶Meitang khyp kang thui pi, huni atiti bawibawi ly vai deung i kangthauchi i tlang tleaung y tym ai.

³⁷“Aw Jerusalem, Jerusalem, amochi ai padei nai keung, nang teng y pato naichi ai ly lengseaung y aphi ka nai keung awi! A nu my mymy i chochi ai pakhi anui y o hai achu nai kamta, nang i chanauchi ai o hai achu ai nai tlen majirei kang tau mo?

³⁸Na i py nangchi ly ngai u y. Khen cham nangchi i yhm ly ka-keu khai pi jo veng bo.

³⁹Kang thui pi, ‘Areng i amyn y jeu nai ly taham hawi,’ ti u y ryrei ly, nangchi ly vai i dengdairei kai ai niu ali y leang bo he,” napi.