Read Khumi Chin MATTHAI 26 Bible Online

MATTHAI 26 - Khumi Chin bible

MATTHAI 26

¹Naibaly hina nai ne, Isu ly huni leu bawibawi thui pajau iy, mymy ly abangnaichi teng y,

²‘Vai kani nyhrei nai kha y Katlen Vui nai pawi awm ai, nanai nangchi ly pany, naibaly khumi i Chapo ai ly kraws tleaung y tahen ai nai patiu hai ai,” napi.

³Hunai thym khala y ly pathyp pi nai keung kalen keh nai Kaiapha napi nai i lyum y ly pathyp pi nai keung kalenchi hawi, khumi humchi i miteaung kehchi ly achu u bo;

⁴nichi ly Isu ai tapawp paryp nai patiu iy padei u thai ai nai arum ryry.

⁵Na i py nichi ly, “Pawi kha y ly ne moh sy, ti y baly khumi humchi theung y khrukhra nai awm lawh na,” napi.

⁶Naibaly Isu ly Bethani avang y keaungsi kaawm Simon i yhm y awm nai thym khala y ly,

⁷neampachy leaungrei ly dengjai adym kangleung y rimui vang tang parai nai syn nai mymy teng y chei i, mymy ly biu o nai thym khala y ni i lu y lei.

⁸Na i py abangnaichi ly huna nai niu kha paleung hawi y i, “Ati mana ai nai hina nai pasum atyhtyh mo?

⁹Hini ly vang neangneang jo iy khumi kamawnchi teng y pei pajau na a,” napi.

¹⁰Na i py Isu ly huna nai pany i nichi teng y, “Hini neampachy ai ly ati mana ai nai khrukhra hai u lawh mo? Ni ly kai i tlang tleaung y atiti kahawi sa nai na a.

¹¹Khumi kamawnchi ly nangchi teng y awm jo chy bo, kai naini nangchi teng y kang awm jojo ai nai ny y leang.

¹²Hini rimui kai i tlang tleaung y lei nai ly kai ai up ai nai ang sa rym nai na a hi ly.

¹³Meitang khyp kang thui pi khaileaung pri verei y ma y py hini satang kahawi thui pi naira tleirei y hini neampachy i sa nai py mymy ai pany jo ai nai thui jojo teang ai,” napi.

¹⁴Hunai bo y ly holai nyhreichi theung i nai leaungrei, Iskariota Juda napi nai ly pathyp pi nai keung kalenchi teng y chei iy,

¹⁵“Mymy ai ly kaimy kang patiu hai ai nai majirei pei ai nai ngai mo?” napi. Naibaly nichi my ly tangka phairei vang pei.

¹⁶Naibaly ni ly huni dengdairei baly mymy ai patiu hai ai nai sai ka-vo hau ryry.

¹⁷Naibaly tako angbo abawi y nai pawi angchei i kani y ly abangnaichi ly Isu teng y chei u iy, “Katlen Vui nai pawi cha ai nai ma mang y pawi pi ai nai ngai mo?” napi.

¹⁸Naibaly mymy ly “Avang pui y ami teng y mo chei u ly, ni teng y, ‘Sara my, Kai i neng kasa bo i, kai teng y abangnaichi hawi nang i yhm y Katlen Vui nai pawi sa ai nai tau, ang napi,’ tapi,” napi.

¹⁹Naibaly abang nai leaung nyhrei ly Isu i thui pi nai kamta sa hawi i, Katlen Vui nai pawi pawi hawi rym.

²⁰Naibaly dym mang y ly mymy ly abang nai leaung holai nyhreichi hawi biu u bo;

²¹naibaly nichi ly cha u nai thym khala y mymy ly, “Meitang khyp kang thui pi, nangchi theung i leaungrei my kai ai ang patiu hai ryp ai,” napi.

²²Naibaly nichi ly khri pa-rei paleung mawn u nai mymy teng y, “Areng awi kaimy a?” napi bawibawi.

²³Naibaly mymy ly, “Kai ai bikheaung y ang tapo hai nai keung kypkyp my ang patiu hai ai.

²⁴Khumi i Chapo ly mymy i satang tajiu nai kamta khypkhyp my chei vui ai; na i py Khumi i Chapo ai patiu hai ai nai keung ly taham si! Huni khumi ly tapen y nai khyly mymy i vui hawi keh alam ai,” napi nai pathang.

²⁵Naibaly mymy ai patiu hai ai nai Juda my ly, “Rabbi awi, kaimy a?” napi. Mymy ly ni teng y, “Nang ly thui khyp bo,” napi.

²⁶Naibaly nichi ly cha u nai thym khala y Isu ly tako la i kawn nai leu thui iy, theng baw theng baw i abangnaichi teng y pei, “Lo u ly, cho u; hini ly kai i tlang ne,” napi.

²⁷Naibaly khau la i kawn nai leu thui iy nichi teng y pei i,

²⁸“nangchi bawibawi nei u; hini ly kai i thi, kamngo pahen ai nai khumi neangneangchi i vui theu nai leu maikawm ne.

²⁹Na i py kang thui pi, Ngaai i peang naira y nangmychi hawi kangtha kanei ai nai kani tym y ryrei ly, vai i dengdairei kreip angjyn athai hang ly kanei ali y leang bo,” napi.

³⁰Naibaly nichi ly khulym thui u pajau nai bo y theu u i, Oliv mawi y chei u bo.

³¹Hunaibaly Isu ly nichi teng y, “Vai dym ly nangchi bawibawi ly kai i molam y atlym u bebe ai; ati mana nai mo nabaly, ‘Beram typ nai keung ai ly kapakhau ai i, beram kanghuchi py ahei hai ai,’ nanai tajiu nai ne.

³²Na i py kai ai pathau nai bo y ly Kalili pri y nangchi i mo y katako ai,” napi.

³³Na i py Petera my ly mymy teng y, “Bawibawichi ly nang i molam y atlym u bebe iy py kai ly atlym ai nai aveng,” napi nai pathang.

³⁴Isu my ly ni teng y, “Meitang khyp kang thui pi, vai dym ly a kheaung y rai kha y nang ly kai ai tlen thomrei apha ai,” napi.

³⁵Petera my ly mymy teng y, “Nang i dei naira y dei teang iy py kai ly pipi apha y ai,” napi. Hunai kamta teang abangnai bawibawichi ly napi bebe.

³⁶Huni pajau kha y Isu ly nichi hawi meingtym harei, Kethsemani napi naira y tym; naibaly mymy ly abangnaichi teng y, “Kai hu mang y chiu sa nai sala ryrei ly hi y ateh u,” napi.

³⁷Naibaly mymy ly Petera hawi Zebedai i chapo nini ai ly hawi i, paleung mawn nai khrikhri pa-rei phailo seaung amteaung bo.

³⁸Naibaly mymy ly nichi teng y, “Kai ly dei ai nai pa-rei khrikhri pa-rei paleung mawn na; hi y awm u ly, kai hawi vanrei ajeng u rym paryp ba,” napi.

³⁹Naibaly mymy ly maidenrei mo mang y chei kyh i ambeu iy, “Aw Ngaai awi, pajau baly hini khau ly kai ai katlen hai kyh sy; na i py kaimy ngaingai ny y naimy, nangmy ngaingai phai ne sy,” nanai chiu sa bo.

⁴⁰Naibaly mymy ly abangnaichi teng y chei iy, nichi ai ly i ngym nai niu: hunaibaly mymy ly Petera teng y, “Mana! Nangchi ly tana chy sala y py kai hawi vanrei ajeng u rym paryp pajau y a?

⁴¹Parawi naira y kun u y ai nai ajeng u rym paryp naimy chiu so u; phailo my ly angjeng i, tlang my ly ham y,” napi.

⁴²Naibaly pa-nyh chei bi i chiu sa bi iy, “Aw Ngaai awi, hini ly kai nei y nai awm pajau y baly nangmy ngaingai ne sy,” napi.

⁴³Naibaly mymy ly chei bi iy nichi ai ly i ngym nai niu taleang bi, nichi khri pa-rei i amhm na.

⁴⁴Naibaly nichi teng i nai chei vui bi iy pa-thom chiu sa bi i, mymy i thui angchei nai kamta thui bi bo.

⁴⁵Hunai pajau khala y ly mymy ly abangnaichi teng y chei bi i nichi teng y, “Vai ly i u ly, anawn u jau; khen cham, neng ly tym bo: Khumi i Chapo ai ly khumi kamngochi i kiu y patiu hai ai bo he.

⁴⁶Angthau, tako u sina; khen cham, kai ai patiu hai ai nai keung ly kasa bo he,” napi.

⁴⁷Naibaly mymy ly thui dudu nai thym khala y my Juda, holai nyhreichi theung i leaungrei ly tym ryp; naibaly pathyp pi nai keung kalenchi hawi khumi humchi i miteaung kehchi teng i nai khumi mipui ka-teng ny y naichi ly haisau hawi thengbeang syn nai mymy hawi vanrei tym miu.

⁴⁸Naibaly mymy ai patiu hai ai nai keung my ly ma ai nai ka-ma-ra thui pi rym i, “Kai i pachawm nai ly ne mang, mymy ai patiu u,” napi.

⁴⁹Hunaibaly ni ly Isu teng y chei praw iy, “Rabbi, noso hawi a?” napi nai ni ai pachawm.

⁵⁰Naibaly Isu my ni teng y, “Nai awi, nang i jeu nai aly ly so jau bei,” napi. Hunaibaly nichi ly Isu ai patawn i patiu u bo.

⁵¹Naibaly khen cham, Isu i kamkawm theung i leaungrei ly tapo iy, ni i haisau aphiu i pathyp pi nai keung kalen keh nai i miseaung ai ly ateng iy, kano sei thlau vui.

⁵²Naibaly Isu ly ni teng y, “Nang i haisau ly keu y hawn teang jau: haisau syn nai keung bawibawichi ly haisau y dei teang ai.

⁵³Vai py kani pri i amtaw thau naichi sang tariurei nai meingtym holai nyhrei nai tleaung y nawi keh nai ang pato pi ai nai Ngaai teng y katakeng pajau y, nanai athang khai u a?

⁵⁴Na i py katakeng baly hina nai kamta awm ai nai tla, nanai Tameuh i cha-iu leu ly mana tym thai ai mo?” napi.

⁵⁵Hunai thym khyp khala y ly Isu my khumi mipuichi teng y ly, “Haisauchi thengbeangchi syn naimy damra ai patiu ai nai kamta kai ai patiu ai nai theu u lawh a? Achura yhm kalen pui y kani tleirei leu kang patiu nai ateh iy ly kai ai patiu u y.

⁵⁶Na i py amochi i leu tym thai ai nai hini bawibawi ly tym nai bo he,” napi. Hunai thym khala y ly abangnaichi bawibawi ly mymy ai patlaw su i angpreng pi pawn veng.

⁵⁷Naibaly Isu ai patiu nai keungchi ly mymy ai ly pathyp pi nai keung kalen keh nai Kaiapha teng y pahawi u bo. Huni meingtym y Reita patiu nai keungchi hawi, miteaung kehchi ly awm u achu veng bo.

⁵⁸Na i py Petera ly pathyp pi nai keung kalen keh nai i lyum y tym pa-rei kamlo dengdairei mymy ai hui pajyh; naibaly kun iy huni satang tem pa-rei pany ai nai miseaungchi theung y ateh teang.

⁵⁹Naibaly Isu ai padei u thai ai nai, pathyp pi nai keung kalenchi hawi tara chih nai keungchi bawibawi ly ni ai ka-chawi y seu ai naira hau u ryry;

⁶⁰na i py ka-chawi naimy pany nai keung amlawn nai neangneang jeu iy py ngo pajau y. Hunai bo y ly khumi leaung nyhrei jeu hawi iy,

⁶¹“Hini khumi ly, ‘Achura yhm kalen pui ly ka-phrei iy kani thomrei sala y kasa bi thai,’ na ly,” napi.

⁶²Naibaly pathyp pi nai keung kalen keh nai ly angdo i mymy teng y, “Nang ly ati sai py pathang y nai sai a? Hina tanrei ang seu nai ly mana lawh?” napi.

⁶³Na i py Isu my ly sai py katheu y. Naibaly pathyp pi nai keung kalen keh nai my ly mymy teng y, “Tameuh kangheng i amyn y kang thui nai bo: nang ly Krista Tameuh i Chapo ne a? nanai kaichi ai thui pi,” napi.

⁶⁴Isu my ly ni teng y, “Nang ly thui khyp bo. Na i py kang thui pi, nangchi ly vai mo mang y Khumi i Chapo ly atiti py sa thai nai keung i lamtang mang y ateh nai, kani mang i khupanym tleaung y jeu nai niu u ai,” napi.

⁶⁵Naibaly pathyp pi nai keung kalen keh nai my ly mymy i ateaung sei iy, “Ni ly Tameuh ai thui tamawn bo: pany nai keung takhrachi ai ati aly ngai jau mo? Khen cham, mymy i Tameuh ai thui tamawn nai sai ly vai nangchi ly thai bo: mana dawn u mo? napi.

⁶⁶Nichi my ly, “Dei ai nai ataing y! napi nai pathang.

⁶⁷Naibaly mymy i meimai y pachi pathawi u iy tapheu bo; phyreichi my ly,

⁶⁸“Nang, Krista, nang ai ly ami my ang tabeang mo? Kaichi ai thui pi,” napi iy tabeang bo.

⁶⁹Naibaly Petera ly angam mang lyum y ateh nai ne; naibaly anglo leaungrei ly ni teng y chei iy, “Nang py kalili pri i khumi Isu teng y awm nai teang na a hi ly,” napi.

⁷⁰Na i py ni my ly, “Nang i thui nai ly kai pipi pany y,” nanai nichi bawibawi i mo y apha.

⁷¹Naibaly dangkhum y theu iy anglo takhra my ni ai niu i, hu y awm naichi teng y ly, “Hini khumi py Nazaret Isu teng y awm nai na a hi ly,” napi.

⁷²Naibaly mymy ly, “Kai ly huni khumi ai kapany y leang,” nanai vaineng abeu naimy apha bi.

⁷³Naibaly tanarei chy sala y ahawi y angdo naichi my ly Petera teng y, “Nang py nichi theung i khumi khyp nai bo, nang i leu y amny chy bo,” napi.

⁷⁴Naibaly ni my ly, “Hini khumi ai ly kai pany y,” nanai pasawi iy vaineng abeu amteaung bo. Naibaly a kheaung praw ryp bo.

⁷⁵Naibaly Petera ly Isu my, “A kheaung y rai kha y nang ly kai ai tlen thomrei apha ai,” napi nai leu ly adawn vau bi. Naibaly ni ly theu i khri pa-rei vo ryry.