Read Khumi Chin MATTHAI 28 Bible Online

MATTHAI 28 - Khumi Chin bible

MATTHAI 28

¹Naibaly Anawn Kani dym mang y kani saryhrei nai angchei i kani khutawi ai nai kha y, Mari Makdilini hawi Mari takhra ly angawm khen ai nai chei hawi bo.

²Naibaly khen cham, kaleih khri pa-rei theu bo, ati mana nai mo nabaly Areng i kani pri i amtaw thau nai leaungrei ly kani pri mang i dengdairei satla iy, lengseaung ai ly kasyh vui i, salo y ateh bo.

³Ni i meimai awm nai sai ly amlosadi kamta atawm;

⁴mymy i ateaung ly ji kamta kaleung na; naibaly typ nai keungchi ly ni ai jei nai deaungkho y dei nai kamta awm u bo.

⁵Naibaly kani pri i amtaw thau nai my ly neampachy nini teng y, “Jei hawi moh; nangni ly kraws tleaung y tahen nai Isu ai hau hawi nai ne, nanai kai pany.

⁶Mymy ly hi y by y leang bo: mymy i thui nai kamta angthau teang veng bo ly. Choh, mymy i aseaung nai meingtym khen cham.

⁷Naibaly tako hawi kaliki ly, abangnaichi teng y, ‘Mymy ly kadeichi theung i nai angthau teang bo: khen cham, Kalili pri y nangchi i mo y ang tako bo; nangchi ly hu y mymy ai niu ai mang,’ tapi hawi. Khen cham, kang thui pi bo he,” nanai pathang.

⁸Naibaly nini ly jei nai hawi khri pa-rei kawn nai tarawi y angawm i dengdairei tako hawi kaliki iy, abangnaichi ai thui pi ai nai angpreng hawi bo.

⁹Naibaly khen cham, Isu ly nini hawi avum i, “Noso hawi a?” napi. Hunaibaly nini ly mymy i kheu pakhi y amkhaw iy chiu hawi bo.

¹⁰Naibaly Isu my nini teng y, “Jei moh, tako hawi ly, Kalili pri y chei ai nai kai i amjo amnauchi ai thui pi; nichi ly hu y kai ai niu ai mang,” napi.

¹¹Naibaly nini ly tako hawi nai thym khala khen cham, typ nai keung tavaimi phyreichi ly avang pui y kun u iy, atiti tym nai sai bawibawi ly pathyp pi nai keung kalenchi teng y thui pi u bo.

¹²Naibaly nichi ly miteaung kehchi hawi achu u i, arum pajau iy tavaimichi ai ly tangka neangneang pei i,

¹³“Kaichi vum y i ngym nai sala y abangnaichi ang jeu i, mymy ai paviu veng bo,’ tapi u.

¹⁴Naibaly Aripeng my huni pany baly kaichi my ni ai kam ai, naibaly nangchi ly sai py dawn y han,” napi.

¹⁵Hunaibaly nichi ly tangka la iy nichi i thui pi nai kamta sa u bo; hunaibaly vai khrairei huni leu ly Judachi i theung y thui lengleang jojo rai.

¹⁶Na i py abangnai leaung holai hareichi ly Kalili pri y Isu my mawi thui pi rym naira y chei u bo.

¹⁷Naibaly nichi ly mymy ai niu iy chiu u bo; na i py phyreichi my ly ym thai y.

¹⁸Hunaibaly Isu ly nichi teng y chei i, nichi hawi arum iy, “Kani y hawi khaileaung y py aly peang naira bawibawi ly kai teng y ang pei nai bo.

¹⁹Hunaibaly cheng cheaungkhangchi ai abang nai khumi palawn ai nai chei u ly, nichi ai Ampo hawi Chapo hawi Philo Kaichai i amyn y baptis so u:

²⁰leu kang pei nai bawibawi tangai ai nai nichi ai patiu u. Naibaly khen cham, kaimy kypkyp ly neng tem pa-rei py nangchi teng y kang awm jojo ai,” napi.