Read Khumi Chin MATTHAI 4 Bible Online

MATTHAI 4 - Khumi Chin bible

MATTHAI 4

¹Hunai pajau khala y Phailo ly Isu ai diabola my prawi ai nai daichi ka-vym y pahawi bo.

²Naibaly mymy ly kani y kani vui palyhrei, vum y vum vui palyhrei biu hai nai bo y kajeu alam bo.

³Naibaly parawi nai keung ly tym i mymy teng y, “Nang ly Tameuh i Chapo ne nabaly hini lengseaung ly tako lawn ai nai leu pei bei,” napi.

⁴Na i py mymy ly, “Khumi ly tako harei khyh naira y ly heng y leang, Tameuh i labeaung y theu nai leu cheaungkhang y heng ai khyh,” nanai tajiu nai awm,” nanai pathang.

⁵Huni pajau khala y diabola ly mymy ai avang kachai y hawi i, achura yhm kalen pui saleung kamsui y angdo hai i, mymy teng y,

⁶“Nang ly Tameuh i Chapo ne nabaly tabo kathiu; ‘Nang i molam y mymy i kani pri i amtaw thau naichi ai leu ang pei ai i, Nichi i kiu my nang ai ang dawmkhawn ai, Ti y baly nang i kheu ly lengseaung y thip lawh na,’ nanai tajiu nai awm lawh,” napi.

⁷Isu my mymy teng y, “Nang i Areng Tameuh ai ly cham moh, nanai tajiu nai awm teang,” napi.

⁸Naibaly diabola my ly mymy ai mawi asang parai naira y hawi bi iy, khaileaung pri peang naira bawibawi hawi, hunichi i nang naira py patei;

⁹naibaly mymy ly ni teng y, “Nang ly ambeu iy kai ai chiu baly hini bawibawi ly kang pei bebe ai,” napi.

¹⁰Hunaibaly Isu my mymy teng y, “Setan, tako la! ‘Nang i Areng Tameuh ai phai chiu ly, mymy i kalop harei phai so khyh,’ nanai tajiu nai awm,” napi.

¹¹Huni bo y ly diabola ly mymy ai khai su bo. Naibaly khen cham, kani pri i amtaw thau naichi ly jeu u iy Isu ai kry u bo.

¹²Naibaly Johan ai patiu bo, nanai Isu ly pany baly Kalili pri y chei vui bo;

¹³naibaly Nazaret avang khai su i ang peang y awm nai Kapernaum avang y awm jo; huni ly Zebulon hawi Nephthalim tengtang ne;

¹⁴amo Isaia my,

¹⁵“Jordan vai pangli mang y awm nai Zebulon pri hawi Nephthalim pri py, Cheng Takhrachi i Kalili pri py,

¹⁶kaveng y ateh naichi ly khri pa-rei kangvang niu u i, Deira meingtym hawi ka-khui y ateh naichi i tlang tleaung y kangvang theu bo,” nanai thui nai ly tym thai ai nai sa nai ne.

¹⁷Isu ly huni kha i dengdairei, “Uikhei u! Kani pri my peang nai ly kasa bo,” nanai thui pi amteaung bo.

¹⁸Naibaly mymy ly Kalili ang peang y pavai nai tarawi y amjo amnau leaung nyhrei, Simon (Petera napi nai) nini amjo amnau Andria hawi ang y paleu heng nai niu; nini ly ngo sara ne.

¹⁹Naibaly mymy ly nini teng y, “Kai teng y abang hawi, hunabaly khumi patiu nai sara y kang palawn ai,” napi.

²⁰Naibaly nini ly paleu khai hawi su iy mymy teng y abang hawi praw ryp.

²¹Naibaly mymy ly hu i nai tako veangveang iy, amjo amnau takhra leaung nyhrei, Zebedai i chapo Jakob hawi ni i amnau Johan ai ly ampo Zebedai teng y paleaung y paleupy pathyp nai niu; naibaly mymy ly nini ai py palau.

²²Naibaly nini ly paleaung py ampo ai py khai hawi su iy mymy teng y abang hawi praw ryp teang.

²³Naibaly Isu ly Judachi i achura yhm takhra takhra y leu patiu i Tameuh i peang nai Satang Kahawi thui pi iy, khumichi theung y no nai cheaungkhang man nai hawi, ham y naira cheaungkhang hawi sa pi nai Kalili pri bawibawi amki prei bo.

²⁴Naibaly mymy i satang ly Suri pri bawibawi y amthang bo; hunaibaly no naichi bawibawi, ham y naichi, cheaungkhang patang naichi, vawinam my nam naichi, kamthuchi, kamkhyn no naichi ai py mymy teng y hawi i, hawi sa pi bo.

²⁵Naibaly Kalili pri i dengdairei hawi, Dekapoli meingtym avang i dengdairei hawi, Jerusalem avang i dengdairei hawi, Judai pri i dengdairei hawi, Jordan vai mang i nai py khumi mipui ka-teng ny y nai mymy ai hui u bo.