Read Khumi Chin MATTHAI 6 Bible Online

MATTHAI 6 - Khumi Chin bible

MATTHAI 6

¹“Nangchi i atiti kahawi sa nai ly khumichi ai khen hai ai nai mymychi i mei ka-niu y so y ai nai amkym u; ti y baly Ngampo kani pri mang y awm nai teng y kawn nai vang ngo u y ai.

²Hunaibaly nang ly amichi teng y atiti pei baly khumichi i palo naira nga thai ai nai, tapawp nai khumichi i achura yhm hawi lam y sa reng nai kamta ly nang i mo y baw eng hai reng moh. Meitang khyp kang thui pi, nichi ly mymychi i kawn nai vang nga be veng bo.

³Na i py nang i atiti pei nai ly kangviu y awm thai ai nai, nang ly amichi teng y atiti pei baly nang i lamtang mang i kiu my sa nai ly langvawi mang i kiu my pany moh sy:

⁴hunaibaly Ngampo kangviu y niu reng nai my ly ang heung ai mang.

⁵“Naibaly nangchi ly chiu sa khala y tapawp naichi i kamta sa ai nai tlo y: nichi ly khumichi my niu thai ai nai achura yhm y hawi lam kangpreira y py angdo nai tarawi y chiu sa ai nai ngai parai lawh. Meitang khyp kang thui pi, nichi ly mychi i kawn nai vang nga be veng bo.

⁶Na i py nang naini chiu sa khala y ly nang i panglai katem y kun ly, naibaly katheu kho veng iy Ngampo kangviu y awm nai teng y chiu so: hunaibaly Ngampo kangviu y niu reng nai my ly ang heung ai mang.

⁷“Naibaly nangchi i chiu sa nai ly Cheng Takhrachi i kamta ly leu sairei thui anawi veangveang rumrang moh; nichi ly leu nawi nai deaungkho y tangai ai nai athang khai.

⁸Hunaibaly nichi i kamta awm u moh; nangchi hnei y rai khala y my Ngampo ly nangchi i ati aly aeang mo, nanai pany yb veang bo.

⁹Hunai deaungkho y nangchi ly hinai kamta chiu so u: Ngaai, kani pri mang y awm nai, Nangmy amyn tahm khai nai awm sy,

¹⁰Nangmy i peang nai tym sy, Nangmy kangai kani pri y sa nai kamta Khaileaung prichi py so u teang sy.

¹¹Kaichi i kani tleirei cha ai nai ly vaini py pei ba;

¹²Kaichi i tlang tleaung y hawi y sa naichi ai ly kaichi my pahen nai kamta, Kaichi i kamngo py pahen kyh ba.

¹³Parawi naira y pahawi moh ba, Kaichi ai hawi y nairai y ly lawi hai kyh ba, nanai thui u.

¹⁴Nangchi my amichi i taphra naira pahen baly, Ngampo kani pri mang y awm nai my ly nangchi ai ang pahen teang ai.

¹⁵Na i py nangchi ly amichi i taphra naira pahen y baly, Ngampo my nangchi i taphra naira ang pahen lawh ai nai ny y leang.

¹⁶“Naibaly nangchi ly biu hai nai neng khala y py tapawp nai khumichi i kamta meimai takhui sui nai awm u moh; nichi ly khumichi i mei ka-niu y biu hai nai amny thai ai nai mymychi i meimai aneaung hai run lawh. Meitang khyp kang thui pi, nichi ly mymychi i kawn nai vang nga be veng bo.

¹⁷Na i py nang ly biu hai khala y ly nang i lu y rimui amjui ly, mei py alo:

¹⁸hunaibaly Ngampo kangviu y awm nai i mei ka-niu y harei ny y baly, nang i biu hai nai ly khumi i mei ka-niu y amny y ai; naibaly Ngampo kangviu y ang niu reng nai my ly ang heung ai mang.

¹⁹“Khaileaung pri y thaikem hawi ei my cha nai phra naira y hawi, kangviuchi my yhm ateng vau iy paviu naira y ly nangchi i yhmtheaung pateung u achu moh;

²⁰kani pri mang y, thaikem hawi ei my cha nai phra y naira y hawi, kangviuchi my yhm ateng vau iy paviu y naira y phai nangchi i yhmtheaung pateung u achu;

²¹nang i yhmtheaung awm naira tleirei y nang i paleung py awm ai.

²²“Tlang i maisi ly mei ne; nang i mei pachym baly nang i tlang bom varei y kangvang kawi be ai mang.

²³Na i py nang i mei chai y baly nang i tlang bom verei y kaveng kawi be ai mang. Hunaibaly nang theung y awm nai kangvang ly kaveng ne iy khyly, huni kaveng ly khri pa-rei ty na ly!

²⁴“Ami py yhmkeung leaung nyhrei i kalop so abom thai y leang: ni ly leaungrei ai niu ngai y iy, leaungrei ai ngai ai, ti y baly leaungrei ai ly ama hai iy, leaungrei ai ly tahm khai y ai. Tameuh i kalop hawi yhmtheaung i kalop so u abom thai y leang.

²⁵“Hunai deaungkho y kang thui pi, ‘Kaichi ati cha ai mo? ati nei ai mo?’ nanai nangchi i hengra i vui hawi, ‘Kaichi ati ateaung ai mo?’ nanai nangchi tlang i vui py paleung bi u moh. Cha ai nai tleaung y hengra ty keh y a? Ateaung tleaung y py tlang ty keh y a?

²⁶Salo mang i tavochi ai phai khen u cham; nichi ly cho py tiu y, tyn py tyn y, cho beu y py pakym achu y: na i py Ngampo kani pri mang y awm nai my ly nichi ai pacho reng. Nangchi ly nichi tleaung y teng keh y a?

²⁷Naibaly nangchi theung y huna nai paleung bi nai deaungkho y amy i jeng mang miurei asang hai thai nai ly ami awm mo?

²⁸Naibaly nangchi ly ateaung i vui y ati mana nai paleung bi u mo? Jeupawmchi i prau nai sai dawn cham;

²⁹hunichi ly kalop py so y, palo py kyn y: na i py kang thui pi, Solomon malawn py mymy i nang nai bawibawi amthyp khala ly hini harei tahm matem py by y.

³⁰Hunaibaly nangchi ym nai di naichi awi, acha kangheng, vaini angti heng iy khawn mang y ly mai y teih ryp nai ai malawn py Tameuh my huna tanrei pateaung baly, hunichi tleaung y ly nangchi ai ateaung mana tanrei ang pei ai mo?

³¹Hunai deaungkho y kaichi ati cha ai mo? ati nei ai mo? ati ateaung ai mo?

³²nanai paleung bi u moh. Cheng Takhrachi ly hunichi bawibawi hau nai ne. Hunichi bawibawi ly nangchi aly aeang, nanai Ngampo kani pri mang y awm nai my ly ang pany pi yb nai bo.

³³Na i py mymy i peang nai hawi mymy i hawi naira phai hau u man, hunaibaly hunichi bawibawi py ang pei panawi bi ai mang.

³⁴Hunaibaly khawndam i vui paleung bi u moh; khawndam ly amy i vui adawn amang ai. Kanirei i patang nai ly huni kani i vui ly hawi khyp bo.