Read Khumi Chin MATTHAI 8 Bible Online

MATTHAI 8 - Khumi Chin bible

MATTHAI 8

¹Naibaly mymy ly mawi i nai kathiu nai bo y khumi mipui ka-teng ny y naichi ni teng y abang.

²Naibaly khen cham, keaungsi man nai khumi leaungrei ly ni teng y chei iy mymy ai chiu i, “Areng awi! Nang ly ngai baly kai ai pachai pajau,” napi.

³Naibaly Isu ly jaha nai nam iy ni teng y, “Ngai mang, chai jau sy,” napi. Naibaly ni i keaungsi ly tlenrei khyh my chai praw ryp bo.

⁴Naibaly Isu ly mymy teng y, “Ami teng y py thui y ai nai amkym me ba; na i py tako ly, pathyp pi nai keung teng y akhen hai, naibaly nichi ai pany hai ai nai Mosi my atiti pei ai nai leu pei nai kamta talam,” napi.

⁵Naibaly mymy ly Kapernaum avang y kun iy tavaimi chungvairei lu leaungrei ly mymy teng y chei i,

⁶“Aw Areng! Kai i miseaung ly kamkhyn no nai yhm y jawn jo, khri pa-rei patang na,” napi nai takeng.

⁷Naibaly mymy ly ni teng y, “Kang jeu ai i hawi kang sa pi ai mang,” napi.

⁸Naibaly tavaimi chungvairei lu my ly, “Aw Areng! Nang puipui chyly kai i yhm y kun ai nai ataing y leang y! Leu sairei phai thui khyh, kai i miseaung ly hawi ryp ai mang.

⁹Kai py ami i leu anui y awm nai teu i, kai i anui y tavaimichi py awm: kai ly leaungrei teng y, ‘Chei,’ kanapi baly chei; kalang teng y, ‘Jeu,’ kanapi baly jeu : kai i miseaung teng y, ‘Hini so,’ kanapi baly sa,” nanai pathang.

¹⁰Naibaly Isu ly huni leu thai nai khri pa-rei lyh i abangnaichi teng y ly, “Meitang khyp kang thui pi, Israelachi theung y py hina tanrei ym naira ly kai avum vai y.

¹¹Naibaly kai ly kang thui pi nidym nisi mang i dengdairei khumi neangneang ang jeu ai i, kani pri y Abraham hawi Isaka hawi Jakob hawi vanrei ateh u ai:

¹²na i py huni pri i chanauchi ly angam mang i kaveng y patheu ai; hu y ly vo py vo ai, ho py akachai ai.” napi.

¹³Naibaly Isu my tavaimi chungvairei lu teng y ly, “Tako teu, nang i ym nai kamta nang i tlang tleaung y tym sy,” napi. Hunaibaly miseaung ly huni neng kypkyp y hawi ryp bo.

¹⁴Nabaly Isu ly Petera i yhm y kun i, ni i ampi ai keaung no jawn jo nai niu,.

¹⁵Naibaly Isu ly ni ai kiu y amkhaw pi i, ni i keaung no nai ly pra bo; naibaly ni ly angthau iy mymy ai kry.

¹⁶Naibaly kani dym bo nabaly nichi ly vawinam my nam nai neangneangchi ai mymy teng y hawi: naibaly, mymy kypkyp ly achi i ham y nairachi la iy, achi i no nairachi py pho pi,

¹⁷nanai amo Isaia i thui nai tym thai ai nai, mymy ly leu y vawinamchi ai py patheu i, no nai bawibawichi ai py hawi sa pi.

¹⁸Naibaly Isu ly mymy i ahawi y khumi mipui ka-teng ny y naichi ai niu iy, ho mang vai angpeang ai nai leu pei.

¹⁹Naibaly Reita patiu nai keung leaungrei ly jeu i mymy teng y, “Sara awi! Kai ly nang i chei ai naira tleirei y abang ai,” napi.

²⁰Naibaly Isu ly ni teng y, “Khivachi ly kho awm, salo mang i tavochi py tabu awm, na i py Khumi i Chapo ly awm ai nai meingtym ha py by y,” napi.

²¹Naibaly abangnaichi theung y takhra leaungrei ly, “Aw Areng! Ngaai ai up veng rai si ba,’ napi.

²²Na i py Isu ly ni teng y, “Kai teng y abang; kadeichi ly mychi i kadei ai up u sy bei,” napi.

²³Naibaly mymy ly paleaung y atang i abangnaichi ly atang teang.

²⁴Naibaly khen cham, ang y ly khri pa-rei ali khu theu i paleaung ai ly tui sampyh my khri pa-rei sadawn na; na i py mymy ly i ngym veng bo.

²⁵Naibaly nichi ly mymy i ahawi y athui iy ni ai palaw i, “Areng awi! Kaichi ai lawi hai kyh, tama ai bo he,” napi.

²⁶Naibaly mymy ly nichi teng y, “Ym naira di naichi awi, ati mana nai jei u nai kaau mo?” napi. Huni bo y mymy ly angthau i ali hawi ang ai jo: naibaly aham i rym chauchau bo.

²⁷Naibaly khumichi ly khri pa-rei lyh na i, “Huni ly ati mana nai khumi kha, ali hawi ang malawn py mymy i leu tangai lawh ly?” napi.

²⁸Naibaly mymy ly ho mang vai y kadarin khumichi i pri y tym iy, vawinam my nam nai leaung nyhrei ly tapreaung i dengdairei theu naimy mymy hawi avum: nini ly khri pa-rei si na, naibaly ami py huni lam y tako pajau y.

²⁹Naibaly khen cham, nini my ly, “Aw Tameuh i Chapo awi! Kaini hawi nang hawi ati amtawm naira awm mo? Neng tym y rai khala my kaini ai patang hai ai nai jeu nai a?” nanai aeu.

³⁰Naiblay nini i awm naira i dengdairei palo rawm naira y eu kanghu neangneang tlai bo.

³¹Naibaly vawinamchi ly, “Nang ly kaichi ai patheu baly eu kanghuchi i taku theung y kun ai nai pei kyh,” nanai mymy teng y takeng u.

³²Naibaly mymy ly nichi teng y, “Chei u bei,” napi. Hunaibly nichi ly theu i euchi i taku theung y kun u bo: naibaly khen cham, eu kanghu bawibawichi ly angthiu mang tlenrei khyh my angpreng kathiu iy ang y taba i tui y chauchau anum bo.

³³Naibaly khawn nai keungchi ly angpreng i avang y chei u iy ati cheaungkhang thui pi, vawinam my nam nai nini i tlang tleaung y atiti tym nai py thui pi teang.

³⁴Naibaly khen cham, avang theaungrei Isu ai lamchung ai nai theu u bo: naibaly mymy ai niu bo nabaly mymychi i pri i nai theu ai nai takeng u bo.