Read Khumi Chin MATTHAI 9 Bible Online

MATTHAI 9 - Khumi Chin bible

MATTHAI 9

¹Naibaly mymy ly paleaung atang iy ang angpeang i, mymy i awm nai avang y tym bo.

²Naibaly khen cham, kamkhyn no nai khumi leaungrei ai ira tleaung y aseaung naimy mymy teng y angjeaung u bo: naibaly Isu ly mymychi i ym nai sai niu i, kamkhyn no nai khumi teng y, “Deang awi! Paleung awmnem naimy awm ba: nang i kamngochi ly pahen bo mang,” napi.

³Naibaly khen cham, Reita patiu nai keung phyreichi ly mymychi i paleung y, “Hini khumi ly Tameuh ai thui tamawn na a hi ly,” nanai dawn u.

⁴Naibaly Isu ly nichi i dawn nai ly pany i, “Nangchi ly ati mana nai nangchi i paleung y kamngo nai dawn u lawh?

⁵‘Nang i kamngochi ly pahen bo mang, napi nai hawi, ‘Angthau ly tako jau, napi nai ly mani thui ai nai rai y keh mo?

⁶Ati py ne sy, Khumi i Chapo ly khaileaung pri y kamngo pahen ai nai aly peang naira awm, nanai nangchi pany thai ai nai, (mymy ly kamkhyn no nai khumi teng y ly) Angthau, nang i ira lo ly, nang i yhm y leh teu,” napi.

⁷Naibaly ni ly angthau i yhm y leh bo.

⁸Naibaly khumi mipuichi ly huna nai niu i jei u, naibaly khumichi teng y hunai kamta sa thai naira pei nai keung Tameuh ai palo u bo.

⁹Naibaly Isu ly hu i dengdairei tako veangveang i khumi leaungrei, amyn ly Matthai ai akeu cheaung nai meingtym y ateh nai niu: naibaly mymy ly ni teng y, “Kai teng y abang,” napi. Naibaly ni ly angthau i abang bo.

¹⁰Naibaly hina nai ne, mymy ly yhm y biu o nai thym khala y khen cham, akeu cheaung nai keungchi hawi khumi kamngo neangneangchi py chei i Isu hawi abangnaichi ai biu o hai mang teang.

¹¹Naibaly Pharisaichi ly huna nai niu i abangnaichi teng y, “Ati mana nai nangchi i Sara ly akeu cheaung nai keungchi hawi khumi kamngochi teng y cha lawh mo?” napi.

¹²Naibaly mymy ly huna nai thai bo nabaly, “No by y nai khumichi ly daitang ai aly ngai y, no awm naichi naini aly ngai nai teu.

¹³Hunaibaly nangchi ly chei iy, ‘Kai ly apathyp naira ngai y i, pahen naira ngai,’ nanai leu sai awm nai sai amtiu u: kai ly khumi kahawichi ai palau ai nai kang jeu nai ny y leang, khumi kamngochi ai palau ai nai kang jeu nai teu,” napi.

¹⁴Hunai thym khala y ly Johan teng y abangnaichi ly mymy teng y chei u i, “Ati mana nai kaichi hawi Pharisaichi py biu hai i, nang teng y abangnaichi ly hai y lawh be? napi.

¹⁵Naibaly Isu ly nichi teng y, “Aju palyn nai keung i ahawichi ly aju palyn nai keung nichi teng y awm jo nai sala ryrei ly paleung mawn thai a? Na i py aju palyn nai keung ai mymychi teng i dengdairei la vui nai kani tym ai i, hunai khala y ly biu hai ai.

¹⁶Naibaly ami py kanih kangtha jean y rai nai hawi kanih kangngym y bau vai y; ati mana nai mo nabaly bau typ ai nai ly kanih asei ra lawh ai i, asei tleaung y asei ra ai.

¹⁷Naibaly ami py kreip athai hang kangtha ly mawipeih adym kangngym y tleng vai y; ti y baly mawipeih adym ly apeu ai i, kreip athai hang ly beu ai, mawipeih adym py phra ai; na i py kreip athai hang kangtha ly mawipeih adym kangtha y tleng khyh, hunaibaly nyhrei ly ha py phra y ai,” napi.

¹⁸Mymy ly huni leu nichi teng y thui nai thym khala y my khen cham, miteaung keh leaungrei ly jeu i, “Kai i chaniu ly vaimy dei bo; na i py nang ly jeu iy ni i tlang tleaung y nang i kiu tamam baly ni ly heng teang ai,” nanai ni ai chiu.

¹⁹Naibaly Isu ly angthau iy abangnaichi hawi ni teng y abang.

²⁰Naibaly khen cham, neampachy leaungrei, saneng holai nyhrei thi ahaw nai ly mymy i nithum mang chei iy mymy i kanih tawm y nam:

²¹ati mana nai mo nabaly mymy ly paleung theung y, “Kai ly mymy i kanih y py nam baly ang hawi ryp ai,” nanai dawn.

²²Naibaly Isu ly hi iy ni ai niu i, “Lo awi! Paleung awmnem naimy awm ba. Nang i ym naira my ang hawihai nai bo,” napi. Naibaly huni neampachy ly huni neng khypkhyp y my hawi ryp bo.

²³Naibaly Isu ly miteaung keh i yhm y kun i, byhlyh eng naichi hawi khumi mipuichi i tukulula nai niu iy,

²⁴“Theu u pawn: deaungdi ly dei y leang, i ngym nai teu,” napi.

²⁵Naibaly nichi my ly mymy ai panui hai lawh. Na i py khumi mipuichi ai patheu pawn nai bo y mymy ly kun iy ni i kiu y amkhaw; naibaly deaungdi ly angthau ryp bo.

²⁶Naibaly huni satang ly huni pri verei y amthang bo.

²⁷Naibaly Isu ly hu i dengdairei tako veangveang iy, mei kamju leaung nyhrei ly ni ai hui i, “Aw Davida i Chapo awi! Kaini ai pahen kyh,” nanai aeu.

²⁸Naibaly mymy ly yhm y kun baly mei kamju nini ly mymy teng y chei; naibaly Isu my nini teng y, “Kai ly hini kang sa pi pajau ai nai ym hawi a?” napi. Nini my ly mymy teng y, “Ym chy Areng,” napi.

²⁹Naibaly mymy ly nini i mei y nam pi i, “Nagni i ym nai kamta nangni i tlang tleaung y tym sy,” napi.

³⁰Hunaibaly nini i mei ly angvang ryp bo. Naibaly Isu my nini teng y, “Ami pany y ai nai amkym hawi me,” nanai leu pei typ.

³¹Na i py nini ly theu hawi iy huni pri verei y mymy i satang amthang hai bo.

³²Naibaly nini theu hawi nai thym khyp khala y khen cham, vawinam my nam nai leu katheu thai y nai leaungrei ai mymy teng y hawi.

³³Naibaly vawinam patheu nai bo y leu katheu thai y nai ly katheu thai bo: naibaly khumi mipuichi ly khri pa-rei lyh na i, “Israelachi theung y hini kamta tlen py niu vai y rai,” napi.

³⁴Na i py Pharisaichi my ly, “Vawinam areng i saho y na a mymy ly vawinamchi ai patheu nai ly,” napi.

³⁵Naibaly Isu ly nichi i achura yhm y leu patiu nai, Tameuh my peang nai Satang Kahawi thui pi iy, ham y naira cheaungkhang hawi, no nai cheaungkhangchi ai hawi sa pi nai, avang kalen y py avang katheang y py amki be bo.

³⁶Na i py mymy ly khumi mipuichi ai niu iy typ nai keung by y nai beramchi kamta patang nai hawi ahei nai deaungkho y khrikhri pa-rei pahen bo.

³⁷Hunaibaly mymy ly abangnaichi teng y ly, “Choh tyn ai nai neangneang awm, na i py kalop sa nai keungchi ly di ala;

³⁸hunaibaly kalop sa ai nai keungchi ai mymy i choh tyn ai naira y pato ai nai hlau keung teng y takeng u,” napi.