Read Khumi Chin MARKA 10 Bible Online

MARKA 10 - Khumi Chin bible

MARKA 10

¹Naibaly mymy ly angthau i hu i dengdairei Judai pri tengtang y hawi, Jordan vai mang y chei; naibaly khumi mipuichi ly mymy teng y achu bi i, mymy i sa reng nai reita kamta nichi ai leu patiu bi.

²Naibaly Pharisaichi ly mymy teng y chei iy, mymy ai cham ai nai, “Khumi ami my aju akhai ngau ngau a?” napi nai deng.

³Naibaly mymy ly nichi teng y, “Mosi my mana leu ang pei mo?” napi nai pathang.

⁴Naibaly nichi ly, “Mosi my ly akhai nai cha tajiu pi iy akhai ai nai pei,” napi.

⁵Na i py Isu my nichi teng y, “Nangchi i paleung kyh chawn veng nai deaungkho y chy bo huni leu pei nai ang tajiu pi nai ly.

⁶Na i py khaileaung palum angchei khala i dengdairei mymy ly neampacho hawi neampachy nini ai sa.

⁷Hunai deaungkho y neampacho ly mymy i amhm ampo ai khai su ai i, mymy i aju ai amkhaw ai:

⁸hunaibaly nini leaung nyhrei ly ngan bomrei lawn ai: hunaibaly nini ly leaung nyhrei ny y i, ngan bomrei lawn bo.

⁹Hunai deaungkho y Tameuh my patawm nai ly khumi my taprei moh sy,” napi.

¹⁰Naibaly yhm y abangnaichi ly huni leu deng bi.

¹¹Naibaly mymy ly nichi teng y, “Ami py amy i aju ai khai iy neampachy takhra ai la nai ngierei ly mymy i aju ai pajang sa pi nai bo;

¹²ni py mymy i juvo ai khai iy, takhra mang nang vui baly pajang sa nai ne teang,” napi.

¹³Naibaly mymy nam ai nai deaungdi chychi ai mymy teng y hawi u bo: naibaly abangnaichi ly nichi ai jo.

¹⁴Na i py Isu my ly huna nai niu iy khri pa-rei paleung hawi y i abangnaichi teng y, “Deaungdi chychi ai kai teng y jeu ai nai pei u, paka u reng moh: Tameuh i peang naira ly hina naichi i vui teu.

¹⁵Meitang khyp kang thui pi, ami py Tameuh i peang nai ly deaungdichy my kawn nai ka-tawm kawn y nai ngierei ly theung y kun ai nai ly aveng,” napi.

¹⁶Naibaly mymy ly nichi ai takawi i, nichi i tlang tleaung y kiu tamam iy amtheaung hai.

¹⁷Naibaly mymy ly tako ai nai theu nai thym khala y khumi leaungrei ly mymy mang y angpreng naimy, mymy i mo y ateh chakrym i mymy teng y, “Sara kahawi, deungtasarei hengra kanga thai ai nai mana kasa ai mo?” nanai deng.

¹⁸Naibaly Isu my ni teng y, “Ati mana nai kai ai kahawi napi mo? Leaungrei ny y baly ami py kahawi by y, huni ly Tameuh ne.

¹⁹Leu pei naichi ly nang pany be: khumi ai padei moh, Pajang so moh, Paviu moh, Seu rumrang moh, Tapawp moh, Ngamhm ngampo ai tahm khai, nanaichi ly,” napi.

²⁰Naibaly mymy ly ni teng y, “Sara awi, huni leu bawibawi ly kai deaungdichy khala i dengdaireikapatawm nai bo,” napi.

²¹Naibaly Isu ly ni ai khen iy tamen i mymy teng y, “Nang ly lamrei takhawi rai; chei ly, nang i awm nai ngierei jo ly, kamawnchi teng y pei, hunaibaly nang kani pri y yhmtheaung nga ai: naibaly jeu ly, kai teng y abang,” napi.

²²Na i py ni ly yhmtheaung neangneang awm nai khumi ne nai deaungkho y, huni leu y meimai takhui sui na i, khri pa-rei paleung mawn naimy tako vui bo.

²³Naibaly Isu ly khen akiprei i abangnaichi teng y, “Yhmtheaung nang naichi ly Tameuh i peang naira y kun ai nai mana tanrei rai na mo?” napi.

²⁴Naibaly abangnaichi my mymy i leu thui nai ly khri pa-rei lyh na i, Isu my pathang bi i nichi teng y, “Bechi awi, yhmtheaung ai ym naichi i vui ly Tameuh i peang naira y kun ai nai mana tanrei rai na mo!

²⁵Khumi kanang Tameuh i peang naira y kun ai nai tleaung y ly kula-iu saprym kho y a-i praw ai nai rai y keh,” napi.

²⁶Naibaly nichi ly khrikhri pa-rei rengrang tlai napi i mymy teng y, “Huna nabaly heng naira ami nga pajau ai mo?” napi.

²⁷Isu ly nichi ai khen i, “Huni ly khumichi i vui ly sa pajau ai nai aveng, Tameuh i vui ly so pajau y nai ny y: ati mana nai mo nabaly Tameuh i vui ly ati cheaungkhang sa pajau na a,” napi.

²⁸Naibaly Petera my ni teng y, “Khen cham, kaichi ly ati cheaungkhang khai su iy nangteng y abangbo,” napi.

²⁹Isu ly, “Meitang khyp kang thui pi, ami py kaimy deaungkho y hawi Satang Kahawi deaungkho y py yhm mo, amjo amnauchi mo, tuichochi mo, amhm mo, ampo mo, chanauchi mo, hlau mo khai jo nai ngierei ly,

³⁰vai heng nai sala y my py ana naira hawi vanrei yhm py, amjo amnauchi py, tuichochi py, amhmchipy, chanauchi py, hlau py meingtym harei y meingtym chungvairei peung y ai nai leaung py by y i, neng tym ai nai khala y deungtasarei hengra py nga bi ai.

³¹Na i py kangman keh y awm nai khumi neangneangchi ly kangkhym kangtem y awm ai; kangkhym kangtem y awn naichi ly kangman keh y awm ai,” napi.

³²Naibaly nichi ly Jerusalem avang y kalau ai nai lam y awm u i, Isu ly mo mang y tako nai nichi ly khri pa-rei lyh na; nichi teng y abang nai khumichi py jei.

³³Naibaly mymy ly holai nyhreichi ai hawi takhra bi i, “Khen cham, achi ly Jerusalem avang y kalau ai i, Khumi i Chapo ai ly pathyp pi nai keung kalenchi hawi Reita patiu nai keungchi teng y py patiu hai ai; naibaly nichi my ly mymy i tlang tleaung y dei ai nai leu atlym hai iy, Cheng Takhrachi teng y au ai;

³⁴naibaly nichi my ly mymy ai panui hai ai i, pachi pathawi u iy, chip i padei ai: naibaly mymy ly kani thomrei kani y angthau teang ai,” nanai mymy i tlang tleaung y atiti tym ai nai saichi lynichi teng y thui pi.

³⁵Naibaly Zebedai i chapo Jakob nini Johan ly mymy i ahawi y chei hawi i, mymy teng y, “Sara awi, kaini i nang teng y hnei nai ngierei ly sa pi i khyly ngai,” napi.

³⁶Naibaly mymy ly nini teng y, “Nangni i vui ati kang so pi khyly ngai mo?” napi.

³⁷Naibaly nini ly mymy teng y, “Nang i nang parai naira y ly nang i lamtang mang y leaungrei, nang i langvawi mang y leaungrei ateh thai ai nai kaini ai pei kyh,” napi.

³⁸Na i py Isu ly nini teng y, “Nangni i hnei hawi nai ly nangni ly pany y. Kai i khau nei ai nai ly nangni nei pajau thai a? Kai i baptisma nga ai nai py nangni py nga pajau thai a?” napi.

³⁹Naibaly nini ly mymy teng y, “Pajau chy,” napi. Isu ly nini teng y, “Kai i khau nei ai nai ly nangni ly nei hawi ai mang; kai i baptisma nga ai nai py nangni ly nga hawi teang ai mang:

⁴⁰ngna i py kai i lamtang mang y mo, langvawi mang y mo ateh ai nai leu ly kai i pei ai nai ny y i, sa pi rym naichi i vui ne,” napi.

⁴¹Naibaly leaung horeichi ly huni satang thai iy Jakob nini Johan i tlang tleaung y khrikhri pa-rei paleung hawi y na.

⁴²Naibaly Isu ly nichi ai palau i nichi teng y, “Cheng Takhrachi i tlang tleaung y peang ai nai keung y khai naichi ly nichi i tlang tleaung y khri pa-rei atho sa na; nichi i khumi kalenchi py nichi i tlang tleaung y khri pa-rei aly peang, nanai nangchi pany.

⁴³Na i py nangchi theung y ly hunai kamta awm ai nai tlo y: na i py ami py nangchi theung y khumi kalen lawn ai ngai nai ngierei ly nangchi ai sabawm nai keung y awm ai nai tla:

⁴⁴ami py nangchi theung y kangman keh lawn ai ngai nai ngierei ly nangmychi i miseaung y awm ai nai tla.

⁴⁵Khumi i Chapo malawn py mymy ai sabawm ai nai hau nai ny y i, kalangchi ai sabawm ai nai hawi, khumi neangneangchi ai atleu ai nai mymy i hengra pei lawh ai nai py ang jeu nai ne,” napi.

⁴⁶Naibaly nichi ly Jeriko avang y tym; naibaly mymy ly abangnaichi hawi khumi mipui ka-teng ny y naichi hawi Jeriko i dengdairei theu nai thym khala y, cheaung nai mei kamju, Timai i chapo Bertimai ly lam teng y ateh nai ne.

⁴⁷Naibaly Nazaret Isu ne, nanai pany baly, “Isu Davida i chapo awi, kai ai pahen kyh,” nanai aeu amteaung.

⁴⁸Naibaly katheu y ai nai khumi neangneangchi my ni ai jo: na i py ni ly, “Davida i chapo awi, kai ai pahen kyh,” nanai aeu ra aeu ra lawh.

⁴⁹Naibaly Isu ly angdo paw iy, “Ni ai palau u,” napi. Naibaly mei kamju ai palau u i ni teng y, “Paleung awmnem naimy awm ly, angthau, ang palau ho,” napi.

⁵⁰Naibaly ni ly kanih tli su i angthau praw iy Isu teng y chei.

⁵¹Naibaly Isu ly pathang i ni teng y, “Nang i tlang tleaung y ati kang sa pi ai nai ngai mo,?” napi. Naibaly mei kamju ly mymy teng y, “Rabboni, niu thai ai nai kangai,” napi.

⁵²Naibaly Isu my ni teng y, “Tako jau, nang i ym naira my ang hawihai nai bo,” napi. Hunaibaly ni ly tlenrei khyh my mei angvang praw i lam y Isu teng y abang ryp.