Read Khumi Chin MARKA 11 Bible Online

MARKA 11 - Khumi Chin bible

MARKA 11

¹Naibaly nichi ly Jerusalem avang y tym ai nai kha y Olive mawi y Bethphaki hawi Bethani avang ahawi y tym u iy, mymy ly abang nai leaung nyhrei ai pato i nini teng y,

²“Nangni i mo kataw i avang y chei hawi ly; naibaly nangni kun hawi angchei nai kha y keaungngo kano kasau cho pakheng nai, ami py atang vai y nai niu hawi ryp ai; huni ly su hawi ly, kai teng y pahawi hawi.

³Naibaly ami py, ‘Tuni ly ati mana ai nai sa hawi mo?’ ang napibaly, ‘Areng my aly awm, tapi; naibaly ni my ang tha hai praw ali teang ai mang,” napi.

⁴Naibaly nini ly chei hawi i, katheu pa-kho ahawi i lam y keaungngo kano kasau cho pakheng nai niu hawi; naibaly huni ai ly su hawi.

⁵Naibaly hu y angdo nai amichi mo ly nini teng y, “Keaungngo kano kasau cho ati mana ai nai su hawi vui lawh mo?” napi.

⁶Naibaly nini ly Isu my thui pi nai kamta khyp my nichi teng y thui pi teang; hunaibaly nini ai tako ai nai pei u.

⁷Naibaly nini ly keaungngo kano kasau cho ly Isu teng y pahawi hawi iy, tlang tleaung y myni i kanih bai hawi i mymy ly atang.

⁸Naibaly khumi neangneangchi ly lam y nichi i kanihchi bai u i, khumi takhrachi my ly hlau i lymlo tiu i bai u teang.

⁹Naibaly mo mang y tako nai hawi, hui nai khumichi py, “Tameuh my ni ai amtheaung hai sy; Areng i amyn y jeu nai ly taham hawi;

¹⁰Peang naira tym ai nai, achi i ampo Davida i peang nai ly taham hawi; Salo mang i nai ly Tameuh my ni ai amtheaung hai sy,” nanai aeu u.

¹¹Naibaly mymy ly Jerusalem avang i achura yhm kalen pui y kun i, ati cheaungkhang khen nai bo y kani dym bo nabaly, mymy ly theu iy holai nyhreichi hawi Bethani avang y chei.

¹²Naibaly mymy ly khawn mang y Bethani i dengdairei theu nai bo y kajeu alam bo.

¹³Naibaly mymy ly thaidu keung ngam awm nai kamlora y niu iy, athai niu na mo, nanai chei tapai; naibaly tym iy thaidu athai ai nai neng ny y nai deaungkho y, ngam ny y baly ati sai py niu y.

¹⁴Hunaibaly mymy ly keung teng y, “Vai i dengdairei deungtasa khrairei ami py nang i athai cha ai nai ngo moh sy,” nanai thui; huni ly abangnaichi my thai.

¹⁵Naibaly nichi ly Jerusalem avang y tym iy, mymy ly achura yhm kalen pui y kun i, achura yhm kalen pui y atiti jo nai keungchi hawi, van nai keungchi ai py patheu amteaung; tangka katheung nai keungchi i sabawi hawi, buhu jo nai keungchi i atehrachi py nui pi pawn teang;

¹⁶naibaly mymy ly ami ai py achura yhm kalen pui y vawnsai syn prei ai nai py pei y.

¹⁷Naibaly mymy ly nichi teng y, “Kai i yhm ly cheng cheaungkhangchi i vui chiu sa nai yhm napi ai,’ nanai tajiu nai ny y a? Nangchi ly damrachi i tapiu palawn u lawh,” nanai patiu.

¹⁸Naibaly khumi mipui bawibawichi ly mymy i patiu nai ly khri pa-rei lyh u nai deaungkho y, pathyp pi nai keung kalenchi hawi Reita patiu nai keungchi py ni ai jei i, mymy ai tama hai ai nai sai hau u.

¹⁹Naibaly dym tleirei mymy ly avang pui i nai theu.

²⁰Naibaly nichi ly khawn mang y tako nai tarawi y thaidu keung ly tangjyn y khrairei jei be nai niu.

²¹Hunaibaly Petera ly adawn ali vau i mymy teng y, “Rabbi awi, khen cham, nang i pasawi nai thaidu keung ly jei be bo,” napi.

²²Naibaly Isu my pathang i nichi teng y, “Tameuh ai ym u.

²³Meitang khyp kang thui pi, ami py hini mawi teng y, ‘Asyh ly, pangli tui y aphi vui,’ napi iy, ni i paleung y ym thai y nai by y naimy, mymy i thui nai ly tym takengkei ai, nanai ym nai ngierei ly nga takengkei ai.

²⁴Hunaibaly kang napi, nangchi i chiu sa nai hnei nai ngierei ly nga chum nai kamta ym u, hunaibaly nangchi ly nga ai.

²⁵Naibaly nangchi i Ampo kani pri mang y awm nai my ly nangchi i taphra nairachi ang pahen ai nai, nangchi chiu sa nai angdo nai tleirei ly ami i tlang tleaung y py nangchi ati mo leu hawi y nai awm baly pahen u.

²⁶[Na i py nangchi ly pahen y baly nangchi i Ampo kani pri mang y awm nai my py nangchi i taphra nairachi ang pahen y ai,]” napi.

²⁷Naibaly nichi ly Jerusalem avang y tym bi bo; naibaly mymy ly achura yhm kalen pui y pavai nai thym khala y pathyp pi nai keung kalenchi hawi, Reita patiu nai keungchi hawi, miteaung kehchipy mymy teng y chei u i, ni teng y, “Hini nang i atitichi sa nai ly ami i leu y sa nai mo?

²⁸Hini atitichi sa ai nai ly ami my leu ang pei nai mo?” napi.

²⁹Naibaly Isu my nichi teng y, “Kai py leu sairei kang deng ai: kai ai pathang u, hunaibaly hini kai i atitichi sa nai ly ami i leu y sa nai mo, nanai kang thui pi ai.

³⁰Johan i baptis sa nai ly kani pri mang i nai a, khumi i nai a? Kai ai pathang u,” napi.

³¹Naibaly nichi ly adawn u i, “Achi ly, Kani pri mang i nai, napi baly, ‘Ati mana nai mymy i leu ym u y lawh?’ ang napi ai. Achi ly, Khumi i nai, napi hawi na mo?” na u.

³²Na i py nichi ly khumi mipuichi ai jei bi: bawibawichi my ly Johan ai ly amo ne khyp napi kheng bo.

³³Hunaibaly nichi my, “Kaichi ly pany y,” nanai Isu ai pathang. Hunaibaly Isu ly nichi teng y, “Kai py hini kai i atitichi sa nai ly ami i leu y sa nai mo, nanai kang thui pi y leang,” napi.