Read Khumi Chin MARKA 12 Bible Online

MARKA 12 - Khumi Chin bible

MARKA 12

¹Naibaly mymy ly nichi teng y pata nai leu takhra takhra thui amteaung i, “Ami mo kreip akho sa i, apai akawm iy, kreip athai ati ai naira angawm py tai: naibaly chang ka-sang sa i, akho kry nai keungchi teng y hlau ai nai vang pei iy, pri takhra y chei vui.

²Naibaly neng khala y ly kreip akho i athai ly akho kry nai keungchi teng i nai nga ai nai, nichi teng y miseaung leaungrei ai pato.

³Naibaly nichi ly mymy ai patiu u i pakhau iy, kiu ka-keu my ali hai teang veng.

⁴Naibaly mymy ly miseaung takhra ai nichi teng y pato bi i, ni ai py lu y pakhau vau iy, angji ngailai pa-rei my sa u.

⁵Naibaly takhra leaungrei ai pato taleang bi i, huni ai ipsaly padei u vui; takhra neangneangchi ai py, phyreichi ai py pakhau, phyreichi ai py padei u.

⁶Naibaly leaungrei awm rai, chapo ngai parai nai ne. Naibaly mymy ly, ‘Kai i chapo ai ly tahm khai ai ngaw khyh,’ nanai kangkhym kangtem y mymy ai nichi teng y pato.

⁷Na i py huni akho kry nai keungchi ly mymychi tengtawi arum u i, ‘Hini ly yhmtheaung kamtym ne; choh, padei u sina, hunaibaly ni i yhmtheaung amtym ai nai achi i vui ne ryp ai bo,’ napi.

⁸Hunaibaly nichi ly mymy ai patiu i padei iy, kreip akho i nai ly aphi u veng.

⁹Hunaibaly kreip akho keung ly mana mana sa ai mo? Mymy ly jeu ai i, huni akho kry nai keungchi ai tama hai vui iy, kreip akho ly kalangchi teng y au ai.

¹⁰‘Yhm sa nai keungchi i lengseaung ngai nai ly, Huni kypkyp ly taki i lengseaung avo keh nai palawn bo;

¹¹Huni ly Areng i sa nai ne i, Achi i mei ka-niu y rengrang tlai nai ne,’ nanai ly, Tameuh i cha-iu leu sai ly phain u vai y a?” napi.

¹²Naibaly nichi ly mymy ai patiu ai nai sai hau: na i py khumi mipuichi ai jei; huni pata nai leu ly nichi ai padeang nai leu ne, nanai pany u bo.

¹³Naibaly nichi ly mymy i leu thui naira y patiu thai ai nai Pharisaichi hawi, Heroda i kamkawm amichi ai mo py mymy teng y pato.

¹⁴Hunaibaly nichi ly tym u i mymy teng y, “Sara awi, nang ly khumi meitang ne, nang ly ami ai py meimai akhen y, nanai kaichi pany: ati mana nai mo nabaly nang ly khumi ami ai py patle takhra lawh y naimy Tameuh i lam y py leu meitang khyp naimy patiu reng. Kaisara teng y akeu pei nai ly pei ngau a pei ngau y a?

¹⁵Kaichi ly pei ai a, pei y ai a?” napi. Na i py mymy ly nichi i tapawp nai sai ly pany i nichi teng y, “Ati mana nai kai ai cham u mo? Pia vui pangrei nai tangka cho lo u, khen cham si,” napi.

¹⁶Naibaly nichi ly la u i, mymy ly nichi teng y, “Hini myn hawi amyn ly ami i mo?” napi. Naibaly nichi ly mymy teng y, “Kaisara i,” napi.

¹⁷Naibaly Isu ly nichi teng y, “Kaisara i atitichi ly Kaisara teng y pei u ly: Tameuh i atitichi ly Tameuh teng y pei u bei,” napi. Naibaly nichi ly khri pa-rei lyh u na.

¹⁸Naibaly angthau bi ai nai by y, nanai Saddukaichi ly mymy teng y chei u i, ni teng y,

¹⁹“Sara awi, Mosi my ly ang tajiu pi iy, ami py ni i amjo amnau my chanau so y naimy aju ai dei pi veng baly, ni i amjo amnau my ly ni i aju tavau la iy, ni i amjo amnau i vui ti ampreng pi ai nai tla, napi.

²⁰Hawi mang, amjo amnau leaung saryhrei awm i, chalu ly aju la iy chanau so y naimy dei vui.

²¹Naibaly pa-nyh nai my ly ni ai la iy, ti ampreng y naimy dei taleang bi; pa-thom nai py hunai kamta teang:

²²leaung saryhreichi ly pipi ti ampreng y. Kangkhym kangtem y ly huni neampachy py dei.

²³Angthau bi nai khala y ly nichi theung y mani i aju lawn ai mo? Nichi leaung saryhreichi ly ni ai pom bebe bo,” nanai deng u.

²⁴Isu ly nichi teng y, “Nangchi ly Tameuh i cha-iu leu sai hawi, Tameuh i atiti sa thai naira pany y nai deaungkho y na a, nangchi i dawn tamang u reng nai ly.

²⁵Kadeichi theung i dengdairei angthau bi nai khala y ly nichi ly apom py apom y, apom ai nai py deaung paseng y, kani pri i amtaw thau naichi kamta awm ai bo.

²⁶Naibaly kadeichi ai pathau bi ai nai leu ly, Mosi i cha-iu y lymlo kangpho satang tajiu naira y Tameuh my, ‘Kai ly Abraham i Tameuh, Isaka i Tameuh, Jakob i Tameuh ne,’ nanai thui nai ly nangchi phain u y nai sai a?

²⁷Mymy ly kadeichi i Tameuh ny y leang, kanghengchi i Tameuh teu; nangchi ly khri pa-rei dawn tamang u nai ne,” napi.

²⁸Naibaly Reita patiu nai keungchi theung y leaungrei ly tym iy, huni adeng u nai ly tangai i, Isu ly nichi ai hawihai palai pathang pi, nanai pany i mymy teng y, “Leu pei nai bawibawi y ly mani len keh mo?” nanai deng.

²⁹Isu my ly, “Len keh nai ly hini ne he: Israelachi awi, achi i Areng Tameuh ly Areng leaungrei ne khyh:

³⁰naibaly nang i Areng Tameuh ai ly nang i paleung verei hawi, nang i phailo verei hawi, nang i dawn nai bawibawi hawi, nang i atho bawibawi hawi nang tamen ai nai tla,’ nanai ne.

³¹Huni bo i nai ly hini ne he: ‘Nangmy ai atamen nai kamta nang i saleaungchi ai py tamen ai nai tla,’ nanai ne. Hini tleaung y leu pei nai len keh nai ly ha py by y,” napi nai pathang.

³²Naibaly Reita patiu nai keung my ly ni teng y, “Teng khyp lawh y Sara, mymy ly leaungrei ne khyh, nanai nang i thui nai ly teng khyp mang; mymy ny y baly ami py takhra by y:

³³naibaly mymy ai ly paleung verei hawi, pany thai naira bawibawi hawi, atho bawibawi hawi tamen ai nai py, amymy ai atamen nai kamta saleaungchi ai tamen ai nai py bom leng nai atiti talam nai hawi apathyp naira bawibawi tleaung y khri pa-rei hawi keh,” napi.

³⁴Naibaly ni ly cheng parai naimy pathang, nanai Isu ly pany i ni teng y, “Nang ly Tameuh i peang naira i nai ly neangneang palo y leang mang,” napi. Naibaly huni bo y ly ami py leu takhra ha py deng vam y bo.

³⁵Naibaly Isu ly achura yhm kalen pui y patiu nai thym khala y nichi teng y pathang i, “Krista ly Davida i chapo ne, nanai ly Reita patiu nai keungchi i thui nai ly ati mana nai thui nai sai mo?

³⁶Davida kypkyp my Phailo Kaichai i saho y, ‘Areng ly kai i Areng teng y, Nang i paleung ka-echi ai ly nang i kheu khai naira kapalawn y ryrei ly Kai i lamtang mang y ateh,’ napi.

³⁷Davida kypkyp ly mymy ai ‘Areng’ napi lawh baly mana ni i chapo ne thai ai mo?” napi. Naibaly khumi humchi ly kawn parai naimy mymy i patiu nai leu tangai.

³⁸Naibaly mymy i patiu naira y ni my ly, “Reita patiu nai keungchi teng y ly amkym u; nichi ly baichu kangjiu pachu iy pavai nai ngai lawh, seng meingtym y nichi ai chiu nai hawi,

³⁹achura yhm y tahm asang keh nai atehra hawi, pawi sa naira y meingtym tahm asang keh nai py ngai parai lawh;

⁴⁰nichi ly neampachy lumaichi i yhmtheaung cha pi, naibaly tapawp ai nai tau nai kra parai pa-rei my chiu sa u lawh; hunichi ai ly pasum nai tleaung y pasum ra ai,” napi.

⁴¹Naibaly mymy ly khai achu naira kataw y ateh i, khai achu naira y khumi mipuichi i tangka pala nai sai khen; naibaly khumi kanangchi ly neangneang tlai pala.

⁴²Naibaly neampachy lumai kamkawn teichy ly tym iy, pia nyhrei pala: (Huni ly paisa tlaurei tahm awm.)

⁴³Naibaly Isu ly abangnaichi ai palau i nichi teng y, “Meitang khyp kang thui pi, khai achu naira y pala naichi bawibawi tleaung y hini neampachy lumai kamawn teichy i pala nai nawi keh.

⁴⁴Ati mana nai mo nabaly nichi bawibawi ly pasym nai theung i kamlai pala nai ne: hini naini asawi aem nai theung i apacho ai naira khypkhyp i nai pala keih na ly,” napi.