Read Khumi Chin MARKA 13 Bible Online

MARKA 13 - Khumi Chin bible

MARKA 13

¹Naibaly mymy ly achura yhm kalen pui i nai theu nai thym khala y abangnaichi theung i nai leaungrei ly mymy teng y, “Sara awi, khen cham, hini lengseaung py yhm py mana tanrei na mo?” napi.

²Naibaly Isu my ly ni teng y, “Hini yhm kalen pui tlai naichi nang niu lo-oh? Panawi y nai lengseaung tleangleang nai ly hi y ha py awm ai ny y,” napi.

³Naibaly mymy ly achura yhm kalen pui kataw y Oliv mawi y ateh nai thym khala y Petera hawi, Jakob hawi, Johan hawi, Andria py nichi my tlairei mymy teng y, “Huni atitichi ly mana khala y tym ai mo?

⁴Huni atitichi tym ai nai neng khala y ly ka-ma-ra ati awm ai mo? Kaichi ai thui pi kyh,” nanai deng.

⁵Naibaly Isu my nichi teng y thui amteaung i, “Nangchi ai ami my tapawp y ai nai tau tleaung y awm u.

⁶Ati mana nai mo nabaly khumi neangneangchi ly, “Kai ne he” nanai kai i amyn angam nai ang jeu ai i, khumi neangneangchi ai tapawp ai.

⁷Naibaly nangchi ly atiu nai leu hawi atiu nai satang kamthang thai nai khala y ly paleung bi u moh; hunichi ly tym ai nai angchi yb teu; na i py tem ai naira ly tym y leang rai.

⁸Cheng takhra hawi cheng takhra atiu ai i, pri takhra hawi pri takhra atiu ai; meingtym takhra takhra y kaleih py theu ryry ai; takang py theu ai.

⁹Hunichi ly patang angchei nai ne. Na i py tau tleaung y awm u; nichi ai pany hai ai naira lawn ai nai nangchi ly kaimy deaungkho y miteaung kechi hawi samrangchi i mo y angdo ai.

¹⁰Naibaly Satang Kahawi ly cheng bawibawichi teng y thui pi man ai nai tla.

¹¹Naibaly nangchi ai pahawi iy ang patiu hai nai neng khala y ly, ‘Mana, ati kathui ai mo?’ nanai paleung adi adiu nai awm u rym moh: huni neng khyp khala y ang pany hai nai ngierei ly huni kyp kyp phai thui u; ati mana nai mo nabaly thui ai nai keung ly nangchi ny y leang, Phailo Kachai teu.

¹²Naibaly padei hai ai nai amjo amnau tengtawi apatiu hai ai i, ampo py chanau ai patiu hai teang ai: chanauchi py amhm ampo ai tiu ai i, padei hai teang ai.

¹³Naibaly kaimy i amyn deaungkho y khumi bawibawichi ly nangchi ai niu ngai y ai; na i py tem pa-rei kham pajau nai khumi ly mymy kypkyp ly hengra nga ai.

¹⁴“Hunaibaly phain nai ngierei ly awm nai sai pany sy: taphra nai keung amso ngai nai ly mymy i vui y angdo tlo y nai meingtym y angdo nai nangchi niu nai khala y ly,

¹⁵Judai pri y awm naichi ly mawi y preang u sy; naibaly amphu y awm nai khumi ly satlo moh sy, ni i yhm y atiti tawn ai nai kun moh sy;

¹⁶naibaly hlau y chei nai khumi ly mymy i kanih tawn ai nai ali moh sy.

¹⁷Huni kani y ly deaungdi aniu naichi hawi deaungdi kanu kanei naichi ly taham si ai.

¹⁸Naibaly huni ly kaseih y tym y ai nai chiu so u.

¹⁹Huni kani ly patang nai kani ne ai, hunai kamta tanrei nai ly Tameuh my khaileaung palum angchei kha i dengdairei vai khrairei tlen py awm vai y rai, mana khala y py awm ali bi y leang bo.

²⁰Naibaly Areng my phai huni neng ai ly dawi hai moh khyly khumi nanai kangheng ha py awm ai ny y: na i py mymy i vawi takhra nai khai rym naichi deaungkho y neng ai ly ang dawi hai ai.

²¹Hunai khala y ly ami my nangchi teng y, ‘Khen cham, Krista ly hi y awm, hu y ho,’ ang napi baly ym u moh.

²²Krista angam naichi hawi, amo angam naichi py theu ai i, nichi ly sa thai iy khyly vawi takhra naichi ai tapawp thai ai nai ka-ma-ra hawi khri pa-rei lyh ai awm naichi py patei ai.

²³Nangchi ly tau tleaung y awm u: dawn cham, ati cheaungkhang kang thui pi rym nai bo he.

²⁴“Na i py huni neng khala y huni patang nai bo y ly kanito ai ly veng hai ai i, lo py angvang y leang bo;

²⁵ka-sichi py kani mang i dengdairei tla ai; kani mang i atiti sa thai nairachi ai ly ahyn hai ai.

²⁶Huna nai khala y ly Khumi i Chapo ly atiti sa thai naira ka-teng ny y nai hawi, nang parai naira hawi khupanym theung y jeu nai niu u ai.

²⁷Huna nai khala y ly mymy ly kani pri i amtaw thau naichi ai pato ai i, mymy i vawi takhra naichi ai ly khuteng taki palyhrei i dengdairei, khaileaung katem i nai kani katem y khrairei pangym achu ai.

²⁸“Hunaibaly thaidu keung i awm nai sai pata nai leu amtiu u: changpi pati iy, ngam ampho baly kani pui theu ai bo, nanai nangchi pany;

²⁹hunai kamta khyp ly nangchi py huna naichi tym nai nangchi niu nai khala y ly, mymy ly kasa bo, ne, katheu pa-kho ahawi y my awm bo, nanai pany u.

³⁰Meitang khyp kang thui pi, hunichi bawibawi tym angym y ryrei ly vai deung i kangthauchi ly tamo y ai.

³¹Kani khaileaung ly tama ai i, kai i leu ly tamo y ai.

³²“Na i py huni kani hawi huni neng ly Ngaai leaungrei ny y baly ami py pany y: kani pri i amtaw thau naichi py, Chapo py pany y leang.

³³Tau tleaung y awm u ly: ajeng u rym paryp iy chiu so u; nangchi ly neng pany y.

³⁴Ami py amy i yhm khai jo nai, mymy i miseaungchi ai aly peang hai iy, nichi i kalop sa ai nai leaung leaungrei teng y au i, katheu pa-kho typ nai keung ai py aeng yb ai nai leu pei iy, pri kamlora y khuleaung chei vui nai kamta atawm.

³⁵Hunaibaly ajeng u rym paryp, yhmkeung i vawi ai nai neng ly dym mang y mo, vum y mo, aneng hyh y mo, a kheaung iy mo,

³⁶khawn mang y mo nangchi ly pany y; ti y baly ang tym miu iy nangchi ai i ngym nai niu lawh na.

³⁷Naibaly nangchi teng y kai i leu kang thui pi nai ly khumi bawibawichi teng y kang thui pi nai ne: Ajeng u rym paryp,” napi.