Read Khumi Chin MARKA 2 Bible Online

MARKA 2 - Khumi Chin bible

MARKA 2

¹Naibaly mymy ly kani majirei mo khala ly Kapernaum avang y kun bi nai khala y mymy ly yhm y awm, nanai amthang.

²Hunaibaly katheu pa-kho ahawi y py awm naira akeaung akai y pa-rei my khumi neangneang awm u achu bo; naibaly mymy ly nichi teng y leu thui.

³Naibaly kamkhym no nai khumi leaungrei ai leaung palyheichi my angjeaung nai mymy teng y tym hai.

⁴Naibaly khumi neangneang awm nai deaungkho y mymy i ahawi y chei u thai y i, mymy i awmra yhm amphu kheaung lawp iy kho sa u; naibaly amkhyn nai khumi ira hawi verei pala kathiu.

⁵Hunaibaly Isu ly nichi i ym nai sai niu i, kamkhyn no nai khumi teng y, “Deang awi, nang i kamngochi ly pahen bo mang,” napi.

⁶Naibaly Reita patiu nai keung phyreichi ly hunira y ateh u i, “Hini khumi ly ati mana nai hinai kamta thui lawh ly?

⁷Tameuh ai thui tamawn nai na a hi ly; Tameuh my ny y baly kamngo ami pahen thai mo?” nanai nichi i paleung y dawn u bo.

⁸Naibaly Isu ly nichi paleung y hunai kamta dawn u pasym, nanai mymy i paleung y pany praw i nichi teng y, “Hunichi ly ati mana nai nangchi i paleung y dawn u pasym lawh mo?

⁹Kamkhyn no nai khumi teng y ly, ‘Nang i kamngochi ly pahen bo mang,’ napi nai hawi, ‘Angthau ly, nang i ira lo ly, tako jau,’ napi nai ly mani thui ai nai rai y keh mo?

¹⁰Ati py ne sy khaileaung pri y ly Khumi i Chapo ly kamngo pahen ai nai aly peang naira awm,

¹¹nanai nangchi pany ai nai (mymy ly kamkhyn no nai khumi teng y ly,) Angthau ly, nang i ira lo ly, nang i yhm y leh teu kang napi,” napi.

¹²Hunaibaly ni ly angthau i, ira la praw iy nichi bawibawi i mei ka-niu y theu; hunaibaly nichi bawibawi ly khri pa-rei lyh na i, “Achi ly hinai kamta tlen py niu vai y,” napi nai Tameuh ai palo u.

¹³Naibaly mymy ly theu bi i ang peang y chei; naibaly khumi mipui bawibawichi ly mymy teng y chei u i, mymy ly nichi ai leu patiu.

¹⁴Naibaly mymy ly tako nai tarawi y Levi, Alphai i chapo ai ly akeu cheaung naira meingtym y ateh nai niu i, ni teng y, “Kai teng y abang,” napi. Naibaly ni ly angthau i mymy teng y abang.

¹⁵Naibaly hina nai ne, mymy ly ni i yhm y biu o i, akeu cheaung nai keungchi hawi, khumi kamngo neangneangchi py Isu hawi ni teng y abangnaichi ai biu o hai mang teang: nichi ly khri pa-rei nawi na: nichi ly mymy teng y py abang teang.

¹⁶Naibaly pharisaichi theung y Reita patiu nai keungchi ly ni ly khumi kamngochi hawi akeu cheaung nai keungchi ai biu o hai nai niu u iy, abangnaichi teng y ly, “Mymy ly akeu cheaung nai keungchi hawi, khumi kamngochi teng y py cha nei lawh ly,” napi.

¹⁷Naibaly Isu ly huna nai thai i nichi teng y, “No by y nai khumichi ly daitang ai aly ngai y, no awm naichi naini aly ngai nai teu; kai ly khumi kahawichi ai palau ai nai kang jeu nai ny y leang, khumi kamngochi ai palau ai nai kang jeu nai teu,” napi.

¹⁸Naibaly Johan teng y abangnaichi hawi Pharisaichi py biu hai nai ne; naibaly nichi ly mymy teng y chei i, “Ati mana nai Johan teng y abangnaichi hawi Pharaisaichi teng y abangnaichi py biu hai i, nang teng y abangnaichi ly hai y lawh be? napi.

¹⁹Isu my ly nichi teng y, “Aju palyn nai keung i ahawichi ly aju palyn nai keung nichi teng y awm jo nai sala ryrei ly biu hai thai a? Aju palyn nai keung ly nichi teng y awm jo nai sala ryrei ly biu hai thai y leang.

²⁰Na i py aju palyn nai keung ai ly nichi teng i dengdairei la vui nai kani tym ai i, huni kani y naini biu hai ai.

²¹Ami py kani kangtha jean y rai nai hawi kani kangngym y bau vai y; bau typ ai nai ly asei ra lawh ai i, kangtha my ly kangngym ai ly asei hai ai i, asei tleaung y asei ra ai.

²²Naibaly ami py kreip athai hang kangtha ly mawipeih adym kangngym y tleng vai y; ti y baly kreip athai hang ly mawipeih adym kangngym ai ly apeu hai ai i, kreip athai hang hawi mawipeih adymchi py phra mei ai: kreip athai hang kangtha ly mawipeih adym kangtha y tleng khyh,” napi.

²³Naibaly hina nai ne, mymy ly Anawn Kani y choh bai y tako prei nai thym khala y abangnaichi ly tako nai tarawi y choh vui khei amteaung u.

²⁴Naibaly Pharisaichi my ly mymy teng y, “Khen cham, nichi ly ati mana nai Anawn Kani y so ngau y nai sa u lawh mo?” napi.

²⁵Naibaly mymy ly nichi teng y, “Davida hawi mymy teng y abangnaichi ly avaw nai kajeu alam nai khala y atiti sa nai ly phain u y nai sai a?

²⁶Huna nai Abiatha ly pathyp pi nai keung kalen keh y awm nai thym khala y ni ly Tameuh i yhm y kun i, pathyp pi nai keung harei cha ngau khyh nai khai takhra nai tako cha iy, abangnaichi teng y py pei teang nai leu ly?” napi.

²⁷Naibaly mymy ly nichi teng y, “Anawn Kani ly khumi i vui y sa nai teu, khumi ly Anawn Kani i vui y sa nai ny y leang;

²⁸hunai deaungkho y Khumi i Chapo ly Anawn Kani i Areng na a,” napi.