Read Khumi Chin MARKA 3 Bible Online

MARKA 3 - Khumi Chin bible

MARKA 3

¹Naibaly mymy ly achura yhm y kun bi i, hu y ly kiu amkyn nai khumi leaungrei awm.

²Naibaly nichi ly mymy ai seu u thai ai nai Anawn Kani y hawi sa pi ai mo, so pi y ai mo nanai khen u paryp.

³Naibaly ni my ly kiu amkhyn nai khumi teng y, “Sala y angdo ba,” napi.

⁴Naibaly mymy ly nichi teng y, “Anawn Kani y hawi sa ai nai mo, taphra ai nai mo, paheng ai nai mo, padei ai nai mo sa ngau a?” napi.

⁵Na i py nichi ly sai py katheu y. Naibaly nichi i paleung kyh chawn veng nai sai ly mymy ai khri pa-rei paleung mawn hai i, mymy ly kado theu naimy nichi ai khen akiprei nai bo y huni khumi teng y, “Nang i kiu pataw,” napi. Hunaibaly ni ly pataw i, kiu ly hawi teang bo.

⁶Naibaly Pharisaichi ly theu u iy, mymy ai padei u thai ai nai sai Heroda kamkawmchi hawi arum u praw ryp.

⁷Naibaly Isu ly mymy teng y abangnaichi hawi ang peang y chei vui: naibaly Kalili pri i dengdairei khumi mipui ka-teng ny y nai abang bo:

⁸naibaly mymy i atiti sa nai lyh awm parai nai satang thai iy, Judai pri i dengdairei hawi, Jerusalem avang i dengdairei hawi, Idumai pri i dengdairei hawi, Jordan vai i dengdairei hawi, Tura hawi Sidon avang tengtang i dengdairei py khumi mipui ka-teng ny y nai mymy teng y chei teang.

⁹Naibaly khumi mipui nai deaungkho y mymy i vui paleaung chy khai pi rym ai nai abangnaichi teng y thui pi, “Ti y baly kai ai i meimeaung lawh na,” napi.

¹⁰Ati mana nai mo nabaly mymy ly khumi neangneangchi ai hawi sa pi bo; hunaibaly no awm nai ngiereichi ly mymy ai nam thai ai nai ni ai tabawm mang na.

¹¹Naibaly vawinamchi py mana khala y py mymy ai niu baly, mymy i mo y ambeu naimy, “Nang ly Tameuh i Chapo ne,” nanai aeu u ryry.

¹²Naibaly ni ly mymy ai amthang hai y ai nai nichi teng y leu pei kheng rypryp.

¹³Naibaly mymy ly mawi y chei kalau iy, mymy i ngai nai ngiereichi ai ly palau i, nichi ly mymy teng y chei u.

¹⁴Naibaly mymy teng y awm thai ai nai hawi, nichi ai leu thui ai nai pato thai ai nai hawi,

¹⁵vawinamchi ai patheu ai nai aly peang hai ai nai py leaung holai nyhreichi ai vawi takhra:

¹⁶Simon Petera pathi teang nai py, Zebedai i chapo Jakob nini Jakob i amnau Johan py,

¹⁷mymy ly nini ai Boanerzi pathi teang, huni ly Kani Pajyh nai i chapo nini, napi nai sai ne:

¹⁸naibaly Andria py, Philipa py, Bartholomai py, Matthai py,

¹⁹Thoma py, Alphai i chapo Jakob py, Thadai py, Kanan pri i khumi Simon py, mymy ai patiu hai nai keung Iskariota Juda py, hinichi ne.

²⁰Naibaly mymy ly yhm y kun. Naibaly khumi mipuichi ly jeu achu bi, hunaibaly nichi ly tako khrairei cho ra y na bo.

²¹Naibaly mymy i ahawichi ly huna nai thai i, “Pathu na a tu ly,” napi nai mymy ai patiu ai tau nai theu u.

²²Naibaly Jerusalem i dengdairei kathiu nai Reita patiu nai keungchi my ly, “Ni teng y Beelzibula awm na a hi ly,” napi nai hawi, “Vawinam areng nai deaungkho y na a vawinamchi ai patheu reng nai ly,” napi teang bi.

²³Naibaly mymy ly nichi ai palau i, pata nai leu y nichi teng y, “Setan ly Setan ai mana patheu ryp thai mo?

²⁴Pri py amy tengtawi atiu ryp baly, huni pri ly awm thai y leang.

²⁵Dengtheung py amy tengtawi atiu ryp baly, huni dengtheung ly awm thai y leang.

²⁶Setan py amy tengtawi atiu iy amprei phro phra baly awm thai y ai i, tama lawh ai.

²⁷Ami my khumi atho kaawm ai kawm manme y baly, atho kaawm i yhm y kun iy, mymy i yhmtheaung ly mana la pi thai ai mo? Hunai bo y naini la pi thai ai ngang.

²⁸Meitang khyp kang thui pi, Khumichochi ai ly mymychi i kamngo bawibawichi hawi Tameuh ai thui tamawn nai atiti thui tamawn nai py ne sy pahen pi ai:

²⁹na i py Phailo Kachai y khrairei thui tamtawn nai keung ly mana khala y py pahen naira ngo y ai i, deungtasarei kamngo asa nai bo,” napi: nichi ly,

³⁰“Vawinam na a tu ly,” napi nai deaungkho y huna nai thui pi nai ne.

³¹Naibaly mymy i amhm hawi amjo amnauchi jeu i angam mang y angdo iy, mymy ai palau ai nai khumi pato u bo.

³²Naibaly mymy i ahawi y ly khumi mipuichi ateh mang; naibaly nichi ly mymy teng y, “Khen cham, angam mang y ly ngamhm hawi ngamjo ngamnauchi ly nang ai ang hau na a,” napi.

³³Naibaly mymy ly nichi teng y, “Kai i amhm hawi kai i amjo amnauchi ly amichi mo?” napi nai pathang.

³⁴Naibaly mymy i ahawi tengtang y ateh naichi ai khen akiprei iy, “Khen cham, kai i amhm hawi kai i amjo amnauchi ly!

³⁵Ami py Tameuh i kangai sa nai ngierei ly huni kypkyp ly kai i amjo amnau hawi, kai i tuicho hawi, kai i amhm py ne,” napi.