Read Khumi Chin MARKA 4 Bible Online

MARKA 4 - Khumi Chin bible

MARKA 4

¹Naibaly mymy ly ang peang y leu patiu nai amteaung. Naibaly mymy teng y khumi mipui ka-teng ny y nai achu nai deaungkho y mymy ly ang y paleaung y atang iy ateh; khumi mipui bawibawichi ly ang ahawi i kacheng y awm u bo.

²Naibaly mymy ly nichi teng y pata nai leu y atiti neangneang patiu; naibaly mymy i patiu nai leu y ly nichi teng y,

³“Tangai u ly: khen cham, ti hei nai khumi ly ti hei ai nai amawi;

⁴naibaly hina nai ne, mymy ly hei nai khala y phyrei ly lam teng y tla i, tavochi my cha krai.

⁵Naibaly phyrei ly thaithi tleaung y khaileaung ampo nai meingtym y tla i,

⁶khaileaung tho y nai deaungkho y prau praw ryp: naibaly kani asang leng nai kha y ly ang i, tangjyn ngo y nai deaungkho y jei ryp veng.

⁷Naibaly phyrei ly kabeng aleng theung y tla i, kabeng aleng ly len ryh len ryh i vawi pajeang veng, vui den py theu y.

⁸Naibaly phyrei ly khaileaung kahawi ra y tla i, prau iy len ryh len ryh i vui theu; naibaly phairei, vui tariurei, chungvairei peung,” napi.

⁹Naibaly mymy my teang, “Ami py thai ai nai kano awm baly thai sy,” napi.

¹⁰Naibaly mymy tlairei awm nai thym khala y ly holai nyhreichi hawi mymy i ahawi tengtang y awm naichi my ly pata nai leuchi deng u.

¹¹Naibaly mymy ly nichi teng y, “Tameuh i peang naira leu kathiu ly nangchi nga ai nai ne: angam mang i khumichi i vui naini ati cheaungkhang ly pata nai leu y thui nai teu:

¹²hunaibaly nichi ly niu mang ly niu thai u ai i, dawn naira pipi pany y ai: kano y py thai u ai i, pipi pany thai y ai: ti y baly nichi ly hi ali teang ai i pahen naira ngo u vui lawh na,” napi.

¹³Naibaly mymy ly nichi teng y, “Hini pata nai leu ly pany u y nai sai a? Huna nai ne baly pata nai leu takhra bawibawichi ly mana pany u thai ai mo?

¹⁴Ti hei nai keung ly leu hei nai ne.

¹⁵Naibaly lam teng y leu hei nai ly hinichi ne he: nichi ly thai bo nabaly Setan ly jeu praw i nichi i paleung y leu hei nai ly la pi praw ryp veng.

¹⁶Naibaly hunai kamta khyp teang thaithi tleaung y hei nai ly hinichi ne he: nichi ly leu thai bo nabaly kawn parai naimy tangai u praw ryp:

¹⁷na i py mymychi kypkyp teng y tangjyn den py ngo y i, tanarei chy awm khyh: hunai bo y ly huni leu deaungkho y patang naira mo, ana naira mo tym baly, nichi ly atlym praw ryp.

¹⁸Naibaly takhrachi ly kabeng aleng theung y hei nai ne:

¹⁹hunichi ly leu ly thai i, khaileaung pri y heng nai khala y dawn nai saichi hawi, nang naira my tapawp nai saichi hawi, tlang i atiti takhra ngai phi teng y naichi py kun iy, leu ai ly achih hai i, athai y bo.

²⁰Naibaly khaileaung kahawi ra y hei nai ly hinichi ne he: leu ly thai iy amkhaw i, phairei, vui tariurei, chungvairei athai naichi ne,” napi.

²¹Naibaly mymy ly nichi teng y, “Maisi ly khai naira y khai y naimy, teaung anui y mo, ira anui y mo khai ai nai syn vai a?

²²Pheaung y ai nai apha nai ati sai py by y, amteng y ai nai heu nai py ati sai py by y.

²³Ami py thai ai nai kano awm baly thai sy,” napi.

²⁴Naibaly mymy ly nichi teng y, “Nangchi i atiti thai nai ly amkym u; nangchi i ne naira y my ang ne pi khyp teang ai: nawi kyh nai py ang pei alam ai.

²⁵Atiti awm nai keung teng y ly ang pei panawi bi ai; atiti by y nai keung teng i nai ly mymy i awm yb nai angchi py la pi ra ai,” napi.

²⁶Naibaly mymy ly, “Tameuh i peang nai ly hinai kamta ne:

²⁷khumi ami py khaileaung y ti hei sy, ni ly i ngym iy vum kanithun y angthau sy: mana mo, nanai pany y naimy ti prau iy len sy: hunai kamta ne.

²⁸Khaileaung my ly mymy athai patheu i angchei y ly keung, huni bo y ly vui, huni bo y ly vui theung y amai tleu hawi nai theu.

²⁹Na i py myn phai myn bo nabaly choh tyn ai nai neng ne vui nai deaungkho y, mymy ly cheaungchen atheu praw,” napi.

³⁰Naibaly mymy ly, “Achi ly Tameuh i peang nai ly mana pata ai mo?

³¹Ti y baly ati leu hawi pata ai mo? Anmawi hm amairei hei nai khala y ly khaileaung i ti bawibawi tleaung y theang keh teu i py,

³²hei nai bo y ly prau i amti amjang bawibawi tleaung y len keh lawh i, changpi len puipui tlai sai; hunaibaly salo mang i tavochi ly kampho y jei pajau; hunai kamta ne,” napi.

³³Naibaly hunai kamta mymy ly pata nai leu neangneang teaung iy nichi i pany thai ai nai ryrei nichi teng y leu thui pi:

³⁴naibaly mymy ly pata nai leu ny y baly nichi teng y leu thui vai y; na i py mymy teng y abangnaichi kypkyp teng y ati cheaungkhang thui pi pachai jyh veng.

³⁵Naibaly huni kani dym y mymy ly nichi teng y, “ho mang vai y angpeang u sina,” napi.

³⁶Hunaibaly khumi mipuichi ai khai su iy mymy ai ly awm nai kari my paleaung y chei hai praw: paleaung takhrachi py mymy teng y awm teang.

³⁷Naibaly khri pa-rei ali khu theu na i, tui sampyh my paleaung y thi teuteu na; hunaibaly paleaung ly tui kawi dudu bo.

³⁸Naibaly mymy ly kalawi mang y lutleang tleang iy i ngym nai awm: naibaly nichi ly ni ai palaw i mymy teng y, “Sara awi, nang ly kaichi tama ai nai ly paleung mawn hai y a?” napi.

³⁹Naibaly mymy ly anglaw i ali ai jo iy, ang teng y py, “Anawn ly, awm pypy jau,” napi. Naibaly ali ly aham i rym chauchau bo.

⁴⁰Naibaly mymy ly nichi teng y, “Nangchi ly ati mana nai jei u kaau mo? Nangchi ly ym naira by y rai a?” napi.

⁴¹Naibaly nichi ly jei ala nai jei y alam na i, “Hini ly ami kha, ali hawi ang malawn py mymy i leu tangai lawh ly?” na u lengleang.