Read Khumi Chin MARKA 5 Bible Online

MARKA 5 - Khumi Chin bible

MARKA 5

¹Naibaly nichi ly ang vai mang y Kerasin khumichi i pri y tym u i,

²mymy ly paleaung i nai angkhyh nai bo y khumi leaungrei vawinam my nam nai tapreaung i dengdairei theu iy, mymy hawi avum praw; huni khumi ly tapreaung y awm i, ni ai ly ami py kawm pajau y nai bo;

³sengkry y malawn py kawm pajau y;

⁴deaungki hawi sengkry py kawm reng nai bo, na i py mymy ly sengkry ai ly leu hai iy, deaungki py kadi piupa veng i, ni ai pakym ai nai ami py atho by y.

⁵Naibaly mymy ly vum kanithun y tapreaung y hawi mawi y py aeu ryry iy, lengseaung hawi py ao ryry lawh.

⁶Naibaly ni ly kamlo i dengdairei Isu ai niu iy angpreng i chiu ryp,

⁷naibaly tao pajeng parai pa-rei my aeu nai, “Isu, Salo Kangteng Tameuh i Chapo awi, kai hawi nang hawi ati amtawm naira awm mo? Kai ai patang hai y ai nai Tameuh i amyn y kang takeng nai he,” napi.

⁸Ati mana nai mo nabaly Isu ly ni teng y, “Vawinam awi, hini khumi i taku theung i dengdairei theu jau,” napi veng bo.

⁹Naibaly mymy ly ni teng y, “Nang i amyn ami mo?” nanai deng. Naibaly ni my ly mymy teng y, “Kai i amyn ly Neang Neang ne, kaichi ly nawi parai nai deaungkho y,” napi.

¹⁰Naibaly huni pri i dengdairei nichi ai patheu y ai nai mymy teng y khri pa-rei takeng.

¹¹Naibaly huni mawi kamthau y ly eu kanghu pui tlai bo.

¹²Naibaly vawinamchi ly, “Kaichi ly nichi theung y kun thai ai nai kaichi ai euchi i taku theung y awm ai nai pato kyh,” nanai mymy teng y takeng u. Naibaly mymy ly avo napi.

¹³Hunaibaly vawinamchi ly theu u iy euchi i taku theung y kun u; naibaly eu kanghu ly sang nyhrei mo awm i, angthiu mang y angpreng kathiu iy, ang y taba, naibaly ang y ly tui pathai i dei thleang.

¹⁴Naibaly khawn nai keungchi ly angpreng u iy, avang y hawi hlau y py thui pi. Naibaly nichi ly, “Ati na lawh mo?” nanai khen ai nai chei u hawm.

¹⁵Naibaly nichi ly Isu teng y tym u iy, vawinamchi my nam nai, Neang Neang my nam nai my ly kanih akhiu iy paleung kari awm naimy ateh nai niu i nichi ly jei u.

¹⁶Naibaly niu nai keungchi my ly vawinam my nam nai i tlang tleaung y atiti tym nai sai hawi, euchi i satang ly nichi ai thui pi.

¹⁷Naibaly nichi ly mymy ai ly mychi i pri i nai theu ai nai takeng amteaung.

¹⁸Naibaly mymy ly paleaung y atang ai nai thym khyp khala y vawinamchi my nam vai reng nai khumi ly Isu teng y awm jo ai nai takeng.

¹⁹Na i py Isu my ly pei y i ni teng y, “Nang i yhm y nangmy i ahawichi teng y vawi ly, Areng my nang i vui mana tanrei ang sa pi nai hawi, mymy i ang pahen nai sai ly thui pi,” napi lawh veng.

²⁰Hunaibaly ni ly chei iy Dekapoli pri y ly Isu my ni i vui mana tanrei ang sa pi nai sai ly amthang hai amteaung, naibaly khumi bawibawichi ly khri pa-rei lyh na.

²¹Naibaly Isu ly paleaung mang ho mang vai y angpeang bi baly khumi mipui ka-teng ny y nai mymy teng y chei achu bo: naibaly mymy ly ang peang y awm.

²²Naibaly achura yhm miteaung kehchi theung i khumi leaungrei, amyn Ja-ira ly jeu i, mymy ai niu baly mymy i kheu keung y ambeu iy,

²³“Kai i chaniu chy ly dei vi dei vi i, amcheng iy heng thai ai nai nang ly jeu iy ni i tlang tleaung y kiu tamam kyh,” nanai khri pa-rei takeng.

²⁴Hunaibaly mymy ly ni teng y chei iy, khumi mipui ka-teng ny y nai ni teng y abang i, mymy ai i meimeaung na.

²⁵Naibaly neampachy leaungrei, saneng holai nyhrei thi ahaw nai,

²⁶daitang neangneangchi teng y khri pa-rei patang nai, my i yhmtheaung bawibawi ly pasum krai i, hawi kyh ai nai tleaung y ty ra ty ra lawh;

²⁷ni ly Isu i atiti satang thai i, mymy i nithun mang khumi mipuichi theung y chei iy, mymy i kanih y nam;

²⁸ati mana nai mo nabaly mymy ly, “Kai ly mymy i kanih y py nam baly ang hawihai ryp ai,” nanai dawn.

²⁹Naibaly tlenrei khyh my mymy i thi ahaw nai ly akyn praw ryp iy, mymy i no nai ly ang hawihai bo, nanai ni i ngan y my amny ryp bo.

³⁰Naibaly Isu ly mymy theung i dengdairei sa thai naira theu bo, nanai apany praw iy, khumi mipuichi theung y hi i, “Kai i kanih y nam nai ly ami mo?” napi.

³¹Naibaly abangnaichi my ly ni teng y, “Khumi mipuichi my ang i meimeaung nai ly nang niu nai iy, ‘Kai ai ami nam mo? nanai ly ati mana nai sai mo?” napi.

³²Naibaly mymy ly huni sa nai keung neampachy ai niu ai tau nai khen akiprei.

³³Hunaibaly neampachy ly mymy ai atiti sa pi nai ly pany iy, jei nai hawi kaso theu naimy chei i, mymy i mo y ly ambeu iy kateng khyp my thui pi bebe.

³⁴Naibaly mymy ly ni teng y, “Lo awi, nang i ym naira my nang ai ang hawihai nai bo; awmnem naimy tako ly, nang i no naira ly hawi jo jau sy,” napi.

³⁵Naibaly mymy ly katheu dudu nai thym khala y achura yhm miteaung keh yhm i dengdairei ly khumichi jeu u i, “Nang i chaniu ly dei veng bo: ati mana nai sara ai ly akawm hai ai rai mo?” napi.

³⁶Na i py Isu my ly nichi i leu thui nai ly dawn dan pi y naimy achura yhm miteaung keh teng y ly, “Jei moh, ym phai ym ryp,” napi.

³⁷Naibaly Petera nini Jakob hawi, Jakob i amnau Johan py, nichi ai ny y baly ami ai py mymy teng y abang ai nai pei y.

³⁸Naibaly achura yhm miteaung keh i yhm y tym u iy, Isu ly nichi i khrukhrala nai hawi vo hang tukulu nai ly niu.

³⁹Naibaly mymy ly kun baly nichi teng y, “Ati mana nai tukulula nai vo u ryry lawh mo? Deaungdi ly dei y leang, i ngym nai teu,” napi.

⁴⁰Naibaly nichi my ly mymy ai panui hai lawh. Na i py mymy ly nichi bawibawi ai patheu iy, deaungdi i amhm ampo ai hawi, mymy teng y awm naichi ai py hawi iy deaungdi i awm naira y kun.

⁴¹Naibaly mymy ly deaungdi i kiu y amkhaw iy ni teng y, “Talitha kumi,” napi: huni ly, “Lo awi, angthau jau kang napi,” napi nai sai ne.

⁴²Naibaly anglo ly angthau praw iy tako ryp; ni ly saneng holai nyhrei awm nai bo. Naibaly nichi ly vaimy khri pa-rei lyh ala nai lyh y alam na.

⁴³Naibaly mymy ly nichi teng y, “Hini ly ami py pany moh sy,” napi cheng veng i, ni ai pacho ai nai leu pei.