Read Khumi Chin MARKA 6 Bible Online

MARKA 6 - Khumi Chin bible

MARKA 6

¹Naibaly mymy ly hu i nai theu iy, mymy i awm nai avang mang y tym bo; mymy i abangnaichi py ni teng y abang veangveang.

²Naibaly Anawn Kani ne i, mymy ly achura yhm y leu patiu amteaung bo: naibaly mymy i leu thai nai khumi neangneangchi my ly, “Hini khumi ly hini bawibawi ly ma mang i nga nai mo? Hini khumi teng y cheng naira pei nai ly ati cheng naira mo? Mymy i kiu y hina tanrei atiti rengrang sa naichi ly ati mana nai sai mo?

³Hini khumi ly Mari i chapo, Jakob hawi Josepha hawi, Juda hawi, Simon hawi, nichi i amjo amnau lasama ny y lawh a? Mymy i tuichochi py achi teng y awm nai ny y lawh a?” napi nai khri pa-rei lyh na. Hunaibaly nichi ly mymy i tlang tleaung y paleung hawi y bo.

⁴Naibaly Isu ly nichi teng y, “Amo ai ly mymy i avang y hawi, mymy i misochi theung y hawi, mymy i yhm y ny y baly palo y nai ly awm vai y leang,” napi.

⁵Naibaly mymy ly no nai khumi maidenreichy naichi i tlang tleaung y kiu tamam iy hawi sa pi nai harei ny y baly, hu y ly atiti rengrang pipi so thai y bo.

⁶Naibaly mymy ly nichi i ym y nai sai deaungkho y rengrang tlai, napi. Naibaly mymy ly leu patiu nai tarawi y avang tleirei y amki prei.

⁷Naibaly mymy ly leaung holai nyhreichi ai ly mymy teng y palau iy, leaung nyh leaung nyhrei ai pato amteaung: vawinamchi tleaung y aly peang ai naira py nichi teng y pei.

⁸Naibaly mymy ly nichi i khuleaung chei ai nai vui cheaungvawi ny y baly ati sai py syn y ai nai napi cheng veng: tako py, jibo py, nichi i khobai y tangka py syn ai nai tlo y;

⁹na i py phainai amchiu u, napi, baichu ly nyhrei amchiu u moh, napi bi.

¹⁰Naibaly mymy my teang nichi teng y, “Nangchi ly ma ma y py yhm y lyn baly, hu i dengdairei nangchi theu y ryrei ly hu y ango u jojo.

¹¹Naibaly mani avang y py nichi my nangchi ai kawn y iy, nangchi i leu py tangai y nai ngierei y ly, hu i dengdairei theu u nai khala y ly, mymychi ai pany hai ai nai nangchi i kheu padawi i spryh ly katheng u,” napi.

¹²Hunaibaly nichi ly theu u iy, khumichi ly uikhei ai nai tla, nanai leu thui pi.

¹³Naibaly vawinam neangneangchi ai py patheu u iy, no nai neangneangchi ai py asi tui pajui i hawi sa pi.

¹⁴Naibaly mymy i amyn ly amthang nai deaungkho y samrang Heroda ly thai i, “Baptis sa nai keung Johan ly kadeichi theung i nai angthau teang nai bo, hunai deaungkho y hina nai sa thai nairachi ly mymy ai sa hai nai boto,” napi.

¹⁵Khumi takhrachi my ly, “Elija na a tu ly,” napi; takhrachi my ly, “Amo na a, amochi theung i leaungrei kamta ne na a tu ly,” napi bi.

¹⁶Na i py Heroda my ly thai iy, “Johan ai kaimy lu katameang khyp nai ly angthau bi nai bo tu ly,” napi.

¹⁷Heroda mymy kypkyp ly mymy i amjo amnau Philipa i aju Herodi molam y khumi pato iy Johan ai ly patiu i theaung y kawm rang naimy paeung veng bo; ati mana nai mo nabaly mymy ly Herodi ai ly lawm veng i,

¹⁸Johan my ly Heroda teng y, “Nang i amjo amnau i aju ai lawm ngau y,” napi chum veng bo.

¹⁹Hunai deaungkho y Herodi my ly ni ai niu ngai y i, padei ai nai ngai: na i py pajau y:

²⁰ati mana nai mo nabaly Heroda ly Johan ai khumi kahawi hawi, khumi kachai ne, nanai pany nai deaungkho y ni ai jei i, kry jojo. Naibaly ni i leu tangai nai khala y mymy ly khri pa-rei paleung bi na; na i py ni i leu kawn parai naimy tangai lawh.

²¹Naibaly Heroda mymy ai tapen nai neng alyp nai kani y mymy i khumi kalenchi hawi, tavaimi lu kalenchi hawi, Kalili pri i khumi kalenchi i vui py vum y pawi len parai nai sa nai khala y ly avo nai neng tym bo.

²²Naibaly Herodi i chaniu kypkyp ly kun iy lam i, Heroda hawi mymy i biu o ahawi naichi ai ly kawn hai; hunaibaly samrang my ly anglo teng y, “Nang i ngai nai ngierei kai teng y hnei, kang pei ai mang,” napi.

²³Naibaly mymy my teang, “Ati py nang hnei nai ngierei ly kaimy i pri ka-hyhrei khrairei kang pei ai mang,” napi nai ni teng y vaineng abeu veng.

²⁴Naibaly ni ly theu i amhm teng y, “Ati kahnei ai mo?” napi. Naibaly amhm my ly, “Baptis sa nai keung johan i lu hnei jau,” napi.

²⁵Naibaly ni ly awn parai naimy samrang teng y kun praw i, “Saibi y Baptis sa nai keung Johan i lu kai ai pei praw ai nai ngai,” nanai hnei.

²⁶Naibaly samrang ly khri pa-rei paleung mawn parai, na i py mymy i vaineng abeu nai hawi biu o ahawi naichi deaungkho y py ni ai aei ai nai ngai y.

²⁷Naibaly samrang ly mymy ai typ nai keung tavaimi leaungrei ai pato praw iy, ni i lu la ai nai leu pei: naibaly ni ly theaung y ni i lu tameang iy,

²⁸ni i lu ly saibi y syn i, anglo teng y pei: naibaly anglo my bi baly amhm teng y pei teang.

²⁹Naibaly Johan teng y abangnaichi ly huna nai thai iy, ni i veu kalawm i, angawm y up u.

³⁰Naibaly amtaw thau naichi ly Isu teng y achu iy, ati cheaungkhang nichi i atiti sa nai hawi patiu nai ngierei py ni teng y thui pi bebe.

³¹Naibaly mymy ly nichi teng y, “Nangmychi my tlairei daichi ka-vym y jeu u takhra ly, anawn u rai,” napi. Ati mana nai mo nabaly khumi neangneangchi adeng meimeaung na i, biu khrairei cho u ra y na bo.

³²Hunaibaly nichi ly paleaung mang daichi ka-vym y chei u takhra.

³³Naibaly khumichi ly nichi chei u nai thym khala y niu i, neangneangchi ly nichi ai pany, naibaly avang tleirei i dengdairei hu y kheu y angpreng u achu nai nichi ai kalym vui.

³⁴Hunaibaly mymy ly kacheng y angkhyh kha y khumi mipui ka-teng ny y nai niu iy, typ nai keung by y nai beramchi kamta atawm nai deaungkho y khrikhri pa-rei pahen i, nichi ai leu neangneang patiu amteaung.

³⁵Naibaly kani patyh parai bo nabaly abangnaichi ly mymy teng y chei iy, “Hini ly daichi ka-vym meingtym ne, kani py patyh parai veng bo;

³⁶hinichi ai ly achi ahawi tengtang i hlau y hawi avang y py chei u iy, cha ai nai atiti mo van u thai ai nai chei hai kyh,” napi.

³⁷Na i py mymy ly nichi teng y, “Nangmychi my cha ai nai atiti pei u,” napi nai pathang. Naibaly nichi ly mymy teng y, “Kaichi ly tako pia vui pangrei nai tangka cho chungvai nyhrei vang van iy cha ai nai pei ai a?” napi.

³⁸Naibaly mymy ly nichi teng y, “Nangchi ly tako phi majierei awm mo? Khen u cham,” napi. Naibaly nichi ly pany bo nabaly, “Phi pangrei hawi ngo amai nyhrei py,” napi.

³⁹Naibaly mymy ly nichi bawibawi ai acha kangheng tleaung y kamkawm kamkawm ateh hai ai nai nichi teng y leu pei.

⁴⁰Naibaly nichi ly chungvai chungvairei, vui pang vui pangrei amjyn naimy ateh u.

⁴¹Naibaly ni my ly tako phi pangrei hawi ngo amai nyhrei la i, kani mang y khen iy kawn nai leu thui i, theng baw theng baw, naibaly nichi i mo y pawi pi ai nai abangnaichi teng y pei; ngo amai nyhrei py bawibawichi theung y paji teang.

⁴²Naibaly nichi bawibawi ly cha i kajeu kawi u bebe.

⁴³Naibaly nichi i cha nai kamthom hawi ngo kamlai py akhui nai ly teaung holai nyhrei kawi teang.

⁴⁴Tako phi cha naichi ly neampacho ka-cheang ryry naimy sang pangrei awm.

⁴⁵Naibaly mymy kypkyp my khumi mipuichi ai amprei hai nai sala y, mymy chei y rai kha y ho mang vai y Bethsaida avang y angpeang man ai nai abangnaichi ai ly paleaung y atang hai praw.

⁴⁶Naibaly mymy ly nichi ai amprei hai nai bo y ly, chiu sa ai nai mawi y lyn kalau.

⁴⁷Naibaly kani dym bo nabaly paleaung ly ang um pareaung y awm i, ni ly mymy tlairei kacheng y awm.

⁴⁸Naibaly ali paka ma nai deaungkho y nichi i ta-pai hai nai paleung bi nai sai ang niu iy, mymy ly khutawi y rai kha y ang tleaung y nichi mang y tako tapai naimy, nichi ai katlen ai nai tau bo.

⁴⁹Na i py nichi ly mymy ai ang tleaung y tako nai niu khala y ly, tavau khumi palawn i, aeu u: nichi bawibawi ly mymy ai niu nai paleung dah na na.

⁵⁰Na i py mymy ly nichi ai preng praw i, “Paleung awmnem naimy awm u; kai teu na a; jei u moh,” napi.

⁵¹Naibaly mymy ly nichi teng y paleaung y atang teang iy, ali ly anawn ryp.

⁵²Naibaly nichi ly tako phi satang dawn pany y i, paleung kyh chawn veng nai deaungkho y paleung theung y khri pa-rei lyh parai.

⁵³Naibaly nichi ly hu mang vai y angpeang iy Kenesaret pri i kacheng y tym i, paleaung ly tui peang y pakheng.

⁵⁴Naibaly nichi ly paleaung i nai angkhyh nai bo y khumi mipuichi ly mymy ai ma praw i,

⁵⁵huni ahawi tengtang meingtym tleirei y angpreng u tengteang na: naibaly mymy awm, nanai pany naira tleirei y ly no naichi ai ira tleaung y aseaung naimy ajeaung u.

⁵⁶Naibaly avang katheang y py, avang kalen y py, hlau y py, ma mang y py mymy i kun naira tleirei y, nichi ly no naichi ai seng meingtym y paseaung mang mang na: naibaly nichi ly mymy i kanih tawm y py nam thai i khyly, nanai takeng u; naibaly nam nai ngiereichi ly hawi ryp hawi ryp bo.