Read Khumi Chin MARKA 7 Bible Online

MARKA 7 - Khumi Chin bible

MARKA 7

¹Naibaly Jerusalem avang i dengdairei jeu nai Pharisaichi hawi Reita patiu nai keungchi amichi mo ly mymy teng y achu u bo.

²Naibaly nichi ly mymy teng y abangnai phyreichi ai ly kiu chai y naimy tako cha nai niu bo. (Chai y, nanai ly asi y, nanai sai ne.)

³Pharisaichi hawi Judachi bawibawi ly miteaungchi i tanyn tangai cheng nai deaungkho y nichi i kiu hawihai asi y baly cho vai y:

⁴naibaly seng i dengdairei vawi nai khala y py tui ahiu y baly cho vai y. Leu takhra neangneang tangai cheng ai nai, khauchi, laawmchi, kheu paja laawmchi paju ai nai nga nai py awm asai rai.

⁵Hunaibaly Pharisaichi hawi Reita patiu nai keungchi my ly, “Ati mana nai nang teng y abangnaichi ly miteaungchi i tanyn kamta tako y naimy, kiu chai y naimy tako cha lawh mo?” napi nai deng.

⁶Naibaly mymy ly nichi teng y, “Isaia my nangchi tapawp naichi i satang thui rym nai ly teng khyp, ‘Hini khumichi ly nichi i labeaung y ly kai ai tahm ang khai i, Mymychi i paleung ly kai hawi palo parai veng;

⁷Nichi i reita patiu naira y ly khumichi i leu pei nai patiu lawh iy, Nichi i kai ai chiu nai ly jawmjawm teu,’ nanai tajiu nai kamta.

⁸Nangchi ly Tameuh i leu pei nai ly patlaw jo iy, khumi i tanyn patawm u cheng lawh nai na a hi ly,” napi.

⁹Naibaly mymy my teang nichi teng y, “Nangchi ly nangmychi i tanyn patawm thai ai nai Tameuh i leu pei nai ai ly ngai u y lawh nai ly ka-vo khri pa-rei pany u mang!

¹⁰Mosi my ly, ‘Ngamhm ngampo ai tahm khai,’ napi: naibaly, ‘Ami py amhm ai mo ampo ai mo pasawi nai ngierei ai ly padei takengkei ai nai tla,’ napi bi.

¹¹Na i py nangchi my ly, ‘Ami my mymy i amhm teng y mo, ampo teng y mo, Kai ly nang ai sabawm ai avo nai ly Korban lawn veng bo, napi baly, (huni ly Tameuh i vui y khai takhra veng bo, nanai sai ne,)

¹²amhm i vui y mo, ampo i vui y mo ati sai py sa pi ai nai pei u y lawh;

¹³nangchi i tanyn khai nai ly Tameuh i leu pei nai ai ly tama hai nai bo he; nangchi ly hunai kamta atiti neangneang sa u lawh,” napi.

¹⁴Naibaly mymy ly khumi mipuichi ai palau bi i, nichi teng y, “Nangchi bawibawi ly kai i leu tangai u ly dawn pany u:

¹⁵khumi angam mang i dengdairei mymy i taku theung y kun nai ly ni ai chai hai thai y ai nai ha py by y leang; khumi i taku theung i dengdairei theu naichi naini huni khumi ai chai hai y nai ne.

¹⁶[Ami py thai ai nai kano awm baly thai sy,]” napi.

¹⁷Naibaly mymy ly khumi mipuichi ai angtheung y kun pi veng nai bo y abangnaichi my ly huni pata nai leu mymy ai deng palai bi.

¹⁸Naibaly mymy ly nichi teng y, “Nangchi py huna tanrei pany y jojo rai nai sai a?

¹⁹Ati py angam mang i dengdairei khumi i taku theung y kun nai ngierei ly ni i paleung theung y kun y i, ni i kajeu theung y kun iy, ei thau naira y theu veng nai deaungkho y ni ai ly chai hai thai y ai nai pajau y, nanai ly pany u y nai sai a?” napi. (Huni ly cha ai nai amjy cheaungkhang ly cha ngau, nanai sai ne.)

²⁰Naibaly mymy my teang, “Khumi i taku theung i dengdairei theu nai ly huni kypkyp my ly khumi ai chai hai y reng nai ne.

²¹Taku theung i nai khumi i paleung theung i dengdairei ly kamngo dawn nairachi theu reng:

²²angai naichi, paviu naichi, khumi ai padei naichi, pajang sa naichi, paleung ano naichi, kamngo naichi, tapawp naichi, paleaung naichi, akeng naichi, thui preaung naichi, am-e naichi, pathu naichi ly:

²³huni atiti kamngo naichi bawibawi ly taku theung i dengdairei theu iy, khumi ai ly chai hai y reng nai ne,” napi.

²⁴Naibaly mymy ly angthau iy hu i dengdairei theu i, Tura hawi Sidon ka-peang y chei. Naibaly mymy ly yhm y kun iy, ami pany ai nai py ngai y; na i py mymy ly aheu pajau y.

²⁵Hunaibaly neampachy leaungrei, ni i chaniu deaungdichy vawinam my nam nai ly mymy i satang thai iy jeu i, mymy i kheu keung y ambeu praw.

²⁶Huni neampachy ly Krik khumi ne i, cheng ly Suro-Phawiniki ne. Naibaly mymy ly ni i chaniu taku theung i dengdairei vawinam patheu pi ai nai takeng.

²⁷Naibaly mymy ly ni teng y, “Chanauchi kajeu kawi man rai sy; chanauchi i tako la pi iy, uichi teng y aphi lawh nai ly avo y leang,” napi.

²⁸Na i py ni my ly mymy teng y, “Ne, Areng, ne mang ly sabawi anui y uichi py chanauchi i tako dei ly cha reng chy bo,” napi nai pathang.

²⁹Naibaly mymy ly ni teng y, “Hini nang i leu thui nai deaungkho y tako teu; vawinam ly nang i chaniu taku theung i dengdairei theu bo,” napi.

³⁰Naibaly ni ly mymy i yhm y vawi iy chanau ai ly vawinam my theu pi vui nai, ira y aseaung nai niu.

³¹Naibaly mymy ly Tura pri i dengdairei theu bi iy, Sidon avang mang tako leu i Dekapoli pri y tako prei nai Kalili ang y tym.

³²Naibaly khumi leaungrei kano kapang, leu py chai thai y nai ai ly mymy teng y hawi iy, ni i tlang tleaung y kiu tamam ai nai takeng.

³³Naibaly ni ai ly khumi mipuichi theung i nai ly mymy tlairei hawi takhra iy, mymy i kiu pajeung ly ni i kano kho y hawn, naibaly pachi pathawi iy ni i palai y nam pi:

³⁴naibaly mymy ly kani mang y khen iy taho sun i ni teng y, “Ephatha” napi. (Huni ly “Am-eaung jau,” napi nai sai ne.)

³⁵Hunaibaly ni i kano ly am-eaung iy, palai y kawm naira py asu i, chai pyn naimy leu katheu.

³⁶Naibaly mymy ly ami ai py thui pi y ai nai nichi teng y leu pei; na i py khri pa-rei kam iy py nichi ly aeu hai ra aeu hai ra i, ‘Mymy ly ati cheaungkhang hawihai palai sa bo;

³⁷kano kapang ai py kano thai hai, leu katheu thai y nai ai py leu katheu hai bo,” napi nai khri pa-rei lyh u na.