Read Khumi Chin MARKA 8 Bible Online

MARKA 8 - Khumi Chin bible

MARKA 8

¹Huni neng khala y ly khumi mipui ka-teng ny y nai awm bi iy, nichi ly ati sai py cha ai nai by y i, mymy ly abangnaichi ai palau iy nichi teng y,

²“Khumi mipuichi ly vai kai teng y kani thomrei awm i, nichi ly cha ai nai ati sai py by y nai deaungkho y kai ly nichi ai khri pa-rei pahen na;

³biu hai naimy nichi i yhm y katako hai baly nichi ly lam sala y paha u ai; nichi theung i nai phyreichi ly kamlo parai ra i dengdairei jeu nai i,” napi.

⁴Naibaly abangnaichi my ly, “Ami nai hinichi cha ai nai ka-lawn tako phi ly hini daichi ka-vym y ly ma mang i nai nga thai ai mo?”, nanai mymy ai pathang.

⁵Naibaly mymy ly nichi teng y, “Tako phi majirei awm u mo?” nanai deng. Nichi my ly, “Phi saryhrei”, napi.

⁶Naibaly mymy ly khumi mipuichi ai khaileaung y ateh ai nai leu pei; naibaly tako phi saryhrei la i, kawn nai leu thui pajau nai bo y theng baw theng baw i, nichi i mo y pawi pi ai nai abangnaichi teng y pei: naibaly nichi ly khumi mipuichi i mo y pawi pi.

⁷Ngo katheang py maidenrei awm: mymy ly hunichi ai py amtheaung hai iy nichi i mo y pawi pi ai nai leu pei bi.

⁸Hunaibaly nichi ly cha i, kajeu kawi u bo: nichi i cha nai kamthom akhui nai py saipa saryhrei awm.

⁹Nichi ly sang palyhrei mo awm: naibaly mymy ly nichi ai amprei hai.

¹⁰Naibaly mymy ly abangnaichi hawi vanrei paleaung y atang praw i, Dalmanutha pri tengtang y chei vui.

¹¹Naibaly Pharisaichi ly theu iy mymy ai cham ai nai mymy teng y kani pri mang i dengdairei atiti ka-ma-ra hau naimy ni ai deng u.

¹²Naibaly mymy ly khri pa-rei taho sun i, “Ati mana nai vai deung i kangthauchi ly ka-ma-ra hau lawh mo? Meitang khyp kang thui pi, vai deung i kangthauchi teng y ly ka-ma-ra pipi patei ai ny y”, napi.

¹³Naibaly mymy ly nichi ai tako pi veng i, paleaung y atang bi iy, hu mang vai y angpeang.

¹⁴Naibaly abangnaichi ly tako syn ai nai tami veng i, tako phi harei chy ny y baly paleaung y ly takhra ha py by y.

¹⁵Naibaly mymy ly nichi teng y, “Pharisaichi i angbo y hawi Heroda i angbo y py tau tleaung y awm u ly, amkym u”, napi cheng.

¹⁶Naibaly nichi ly mymychi tengtawi arum u iy, “Tako by y pasi lawh nai deaungkho y na a”, napi.

¹⁷Naibaly Isu ly huna nai pany iy nichi teng y, “Ati mana nai tako by y nai deaungkho y arum u mo? Vai py nangchi pany y jojo rai a? Dawn nai py pany y jojo rai a? Nangchi i paleung kyh chawn veng bo a?

¹⁸Mei awm nai iy niu u y a? Kano awm nai iy thai u y a? Pany u jo y nai sai a?

¹⁹Kai ly sang pangreichi theung y tako phi pangrei theng baw theng baw nai khala y ly cha nai kamthom teaung kakawi majirei akhui u mo?”, napi. Naibaly nichi my ly mymy teng y, “Holai nyhrei”, napi.

²⁰“Naibaly sang palyhreichi theung y saryhrei nai khala y ly cha nai kamthom saipa kakawi majirei akhui u mo?”, napi. Nichi my ly mymy teng y, “Saryhrei”, napi.

²¹Naibaly mymy ly nichi teng y, “Vai py nangchi ly dawn nai pany y jojo rai lo-oh?”, napi.

²²Naibaly nichi ly Bethsaida avang y tym. Naibaly mymy teng y mei kamju ai hawi u i, ni ai nam ai nai takeng.

²³Naibaly mymy ly mei kamju i kiu y amkhaw iy, avang i dengdairei pahawi; naibaly ni i mei y pachi pathawi i, ni i tlang tleaung y kiu tamam nai bo y, “Atiti niu thai a?”, nanai deng.

²⁴Naibaly ni ly dengtheang i, “Khumichi kaniu, dengkeaung tako nai kamta naimy kaniu”, napi.

²⁵Naibaly mymy ly ni i mei y kiu tamam bi: naibaly mymy ly chai pyn pa-rei niu iy hawi ryp i, ati cheaungkhang hawihai palai niu.

²⁶Naibaly mymy ly, “Avang y py kun moh”, nanai ni ai yhm y vawi hai.

²⁷Naibaly Isu hawi abangnaichi py theu i, Philipi Kaisari ka-peang i avang takhra takhra y chei u; naibaly tako nai tarawi y mymy ly abangnaichi teng y, “Amichi my kai ai ami ang napi mo?”, nanai deng.

²⁸Naibaly nichi my ly, “Baptis sa nai keung Johan na a, ang napi; kalangchi ly Elija na a, ang napi; kalangchi ly amo ami mo na a, ang napi”, nanai thui pi.

²⁹Naibaly mymy ly nichi teng y, “Tumbaly nangchi ly kai ai ami napi mo?”, nanai deng. Petera my ly mymy teng y, “Nang ly Krista ne”, napi nai pathang.

³⁰Naibaly mymy i satang ly ami teng y thui pi y ai nai nichi ai leu pei kheng.

³¹Naibaly Khumi i Chapo ly atiti neangneang patang ai nai saichi py, miteaung kehchi hawi, pathyp pi nai keung kalen kehchi hawi, Reita patiu nai keungchi my ngai y ai nai saichi py, ni ai padei ai nai saichi py, kani thomrei nai kha y angthau teang ai nai saichi py nichi ai patiu amteaung bo.

³²Mymy ly huni leu chai pyn pa-rei thui nai ne. Naibaly Petera ly mymy ai hawi takhra iy preng.

³³Na i py mymy ly hi iy abangnaichi ai khen i, “Setan, kai i nithun mang y anaw la, nang ly Tameuh i atitichi dawn y nai ly, Khumi i atitichi dawn lawh nai ne na a hi ly”, napi nai Petera ai preng.

³⁴Naibaly mymy ly khumi mipuichi ai ly abangnaichi hawi palau i nichi teng y, “Ami py kai teng y abang ai nai ngai baly amy i kangai khai su iy amy i kraws apu naimy kai teng y abang sy.

³⁵Ati mana nai mo nabaly ami py amy i hengra apalawi ai nai ngai nai ngierei ly tama ai: ami py kaimy hawi Satang Kahawi deaungkho y amy i hengra tama nai ngierei ly apalawi ai.

³⁶Ami py hini khaileaung pri bomrei nga iy amy i hengra tamo lawh sy, mymy i vui ati amran ai mo?

³⁷Ami my mymy i hengra i jeng y ati pei ai mo?

³⁸Ami py vai deung kangthau pajang sa nai hawi kamngo sa reng naichi theung y kaimy ai hawi kai i leu ai py kaji hai nai ngierei ly, Khumi i Chapo ly kani pri i amtaw thau naichi hawi mymy i Ampo i nang parai naira apu naimy ang jeu nai neng khala y ly, huni khumi ai ly ang kaji hai teang ai”, napi.