Read Khumi Chin MARKA 9 Bible Online

MARKA 9 - Khumi Chin bible

MARKA 9

¹Naibaly mymy ly nichi teng y, “Meitang khyp kang thui pi, hi i angdo nai phyreichi ly Tameuh i peang nai ly atiti sa thai naira hawi tym nai niu u y ryrei ly dei naira den py pateng ai ny y,” napi.

²Naibaly Isu ly kani tariurei nai khala y Petera hawi, Jakob hawi, Johan ai py hawi takhra iy, mawi asang parai naira y mymychi my tlairei chei hai kalau; naibaly nichi i mo y mymy i meimai awm nai sai ly takhra bo;

³naibaly mymy i ateaung ly khaileaung pri i kanih pasiu nai keungchi nanai ly huna tanrei kaleung hai thai y nai pa-rei kaleung nai sadi na.

⁴Naibaly Elija nini Mosi ly nichi teng y amteng i Isu hawi arum.

⁵Naibaly Petera ly pathang i Isu teng y, “Rabbi awi, kaichi i vui hi y awm ai nai hawi parai; kaichi my taichy thomrei so si ba, nang i vui harei, Mosi i vui harei, Elija i vui harei,” napi.

⁶(Ni my ly khri pa-rei jei nai deaungkho y mymy ly mana mana thui ai mo, nanai dawn pajau y.)

⁷Naibaly mymychi ai khupanym my khiu meuh iy, khupanym theung i dengdairei raawi theu i, “Hini ly kai i Chapo ngai parai nai ne, mymy i leu tangai u,” napi.

⁸Naibaly nichi ly dengtheang i nichi teng y Isu ai leaungrei ny y baly ami ai py niu y.

⁹Naibaly nichi ly mawi i dengdairei kathiu nai thym khala y, Khumi i Chapo kadeichi theung i dengdairei angthau bi nai bo y ny y baly, nichi i atiti niu nai ly ami ai py thui pi y ai nai ang napi cheng.

¹⁰Hunaibaly nichi ly huni leu paleung y pateung me jo i, “Kadeichi theung i dengdairei angthau bi ai nai ly mana nai sai mo?” nanai adeng.

¹¹Naibaly nichi my ly mymy teng y, “Reita patiu nai keungchi ly, ‘Elija jeu man ai nai tla,’ nanai ly ati mana nai sai mo?” nanai deng.

¹²Naibaly mymy ly nichi teng y, “Elija ly jeu man ai nai angchi yb i, ati cheaungkhang sa palai bi ai; naibaly Khumi i chapo ly atiti neangneang patang iy, amichi my ni ai tahm khai y nai awm ai nai tla, nanai mymy i satang ly ati mana nai tajiu nai mo?

¹³Na i py kang thui pi, Elija ly tym veng bo: naibaly mymy i satang tajiu nai kamta khyp my, nichi ly mymy i tlang tleaung y nichi i ngaingai py sa chum veng nai bo,” napi.

¹⁴Naibaly nichi ly abangnaichi teng y tym nai kha y mymychi i ahawi y khumi mipui ka-teng ny y nai hawi, Reita patiu nai keungchi my aei hai nai py niu.

¹⁵Naibaly khumi mipuichi bawibawi ly mymy ai niu iy khri pa-rei lyh i, mymy teng y angpreng u praw iy kawn nai leu thui pi.

¹⁶Naibaly mymy ly nichi teng y, “Nichi hawi ati leu aei u mo?” napi nai deng.

¹⁷Naibaly khumi mipuichi theung y leaungrei my ly ni teng y, “Sara awi! Kai i chapo leu katheu y nai vawinam my nam nai ai ly nang teng y kang hawi; ni ai patiu naira tleirei y atlym hai mawp reng,

¹⁸hunaibaly ni ly pachi phawn tla sobam i ho kachai iy veung jei ryry bo; hunaibaly nang khi y abangnaichi teng y patheu ai nai kanapi i, nichi ly so thai y pasi lawh,” napi nai pathang.

¹⁹Naibaly mymy ly nichi teng y, “Aw vai deung kangthau ym naira by y naichi awi, kai ly nangchi teng y mana tanrei kang awm hai ai mo? mana tanrei kang kham hai thai ai mo? Ni ai ly kai teng y hawi u,” napi.

²⁰Naibaly ni ai ly mymy teng y hawi u; naibaly vawinam ly mymy ai niu phai niu bo nabaly deaungdi ai khri pa-rei kyn hai praw iy, ni ly khaileaung y atlym i, pachi phawn phro phro na pa-rei theu naimy khri pa-rei atapi na.

²¹Naibaly mymy ly ampo teng y, “Hina nai awm angchei nai ly mana tanrei kra bo mo?” nanai deng. Ni my ly,

²²“Deaungdi khala i nai bo; hunaibaly ni ai tama hai ai nai mai y py tui y py neangneang atlyh hai reng nai bo; na i py nangmy sai sairei sa pajau baly kaichi ai pahen ly, sabawm kyh,” napi.

²³Naibaly Isu ly ni teng y, “Nang sa pajau baly e! Ym nai khumi i vui ly ati cheaungkhang sa pajau na a,” napi.

²⁴Hunaibaly deaungdi i ampo my ly, “Kai ym mang, kai i ym thai y naira y kai ai sabawm kyh,” napi.

²⁵Naibaly Isu ly khumi mipuichi angpreng achu dudu nai niu kha y, vawinam ai jo i ni teng y, “Nang vawinam leu katheu thai y nai hawi kano kapang awi, ni i taku theung i nai theu ly, kun bi moh, nanai leu kang pei,” napi.

²⁶Hunaibaly ni ly aeu iy mymy ai khri pa-rei kyn hai pajau nai bo y theu vui bo: naibaly deaungdi ly dei nai kamta na, hunaibaly khumi nawi keh naichi my ly, “Dei nai na a,” napi.

²⁷Na i py Isu my ly ni i kiu y amkhaw iy pathau, naibaly ni ly angthau ryp.

²⁸Naibaly mymy ly yhm y kun i, nichi my tlairei awm kha y abangnaichi my ly, “Ati mana nai kaichi ly patheu thai y lawh be?” nanai deng.

²⁹Naibaly mymy ly nichi teng y, “Hini amjy ly chiu sa naira y ny y baly mana khala y py patheu thai y leang,” napi.

³⁰Naibaly nichi ly hu i nai theu iy, Kalili pri y tako prei i, ni ly ami py pany ai nai ngai y.

³¹Ati mana nai mo nabaly mymy ly abangnaichi ai patiu i nichi teng y, “Khumi i Chapo ai ly khumichi i kiu y patiu hai ai i, ni ai padei u ai; naibaly padei u nai bo y kani thomrei kani y ly angthau teang ai,” napi.

³²Na i py nichi ly mymy i leu thui nai ly dawn ai nai pany y, mymy teng y khy deng vam y.

³³Naibaly nichi ly Kapernaum avang y tym i, mymy ly yhm angtheung y awm nai thym khala y ly nichi teng y, “Lam y ly ati leu aei u mo?” nanai deng.

³⁴Na i py nichi ly mymychi theung y ami len keh ai mo? nanai lam y aei u chum veng nai deaungkho y sai py katheu y.

³⁵Naibaly mymy ly ateh iy holai nyhreichi ai palau i nichi teng y, “Ami py kangman keh awm ai ngai nai ngierei ly bawibawichi tleaung y kangkhym keh y awm ai nai tla i, bawibawichi ai sabawm nai keung y awm ai nai tla.

³⁶Naibaly mymy ly deaungdichy leaungrei ai pahawi iy nichi theung y angdo hai: naibaly ni ai takawi i nichi teng y,

³⁷“Ami py kai i amyn deaungkho y hinai kamta deaungdichy leaungrei ai py kawn nai ngierei ly kaimy ai kawn nai bo; ami py kai ai kawn nai ngierei ly kai ai kawn nai ny y leang, kai ai pato nai keung ai kawn nai bo,” napi.

³⁸Johan my ly ni teng y, “Sara awi, kaichi ly ami mo nang i amyn y vawinamchi ai patheu nai niu i, ni ly achi teng y abang nai ny y nai deaungkho y kaichi my paka veng na a,” napi.

³⁹Na i py Isu my ly, “Paka u reng moh; kai i amyn y atiti lyh ai awm nai sa makho iy, kai ai thui preaung praw thai ai nai khumi ami py by y.

⁴⁰Achi ai paka y nai khumi ly achi i mang y asa nai na a.

⁴¹Ami py nangchi ly Krista i khumi ne nai deaungkho y nangchi ai tui khaurei nei ai nai pei nai ngierei ly, meitang khyp kang thui pi, ni ly kawn nai vang ly pipi tamo pajau y leang.

⁴²Naibaly ami py hini kai ai ym nai keung theangchichy naichi theung y leaungrei ai py atlym hai nai ngierei ly, mymy i kaneaung y choh nip naira lengseaung kalen pui awi hai iy, pangli tui y aphi vui i khyly, mymy i vui hawi keh alam ai.

⁴³Naibaly nang i kiu my nang ai atlym hai baly tameang vui; kiu angym naimy ngari angawm, mai dei pajau y naira y tla nai tleaung y ly, kiu angym y naimy heng naira y kun ai nai nang i vui hawi keh alam.

⁴⁴[Hu y ly nichi i kaleung dei vai y; naibaly mai py dei vai y.]

⁴⁵Naibaly nang i kheu my nang ai atlym hai baly tameang vui; kheu angym iy ngari angawm y aphi nai tleaung y ly kheu tabai naimy hengra y kun ai nai nang i vui hawi keh alam.

⁴⁶[Hu y ly nichi i kaleung dei vai y, naibaly mai py dei vai y.]

⁴⁷Naibaly nang i mei ly nang ai atlym hai baly takhawi piu vui:

⁴⁸mei angym iy ngari angawm, kaleung dei vai y nai hawi mai dei vai y naira y nang ai aphi nai tleaung y ly, mei makengrei awm iy, Tameuh i peang naira y kun ai nai nang i vui hawi keh alam.

⁴⁹Khumi bawibawichi ai mai y lum hai ai.

⁵⁰Palawi ly hawi, na i py palawi ly dau veng baly ati my lum hai bi ai mo? Nangmychi kypkyp teng y palawi awm sy ly, ado u,” napi.