Read Khumi Chin LUKA 10 Bible Online

LUKA 10 - Khumi Chin bible

LUKA 10

¹Naibaly huni pajau khala y Areng my khumi takhra leaung vui saryhreichi ai vawi i, mymy i chei ai tau nai avang tleirei hawi, meingtym tleirei y mymy i mo mang y leaung nyh leaung nyhrei ai pato.

²Naibaly mymy ly nichi teng y, “Choh tyn ai nai neangneang awm, na i py kalop sa nai keungchi ly di ala; hunaibaly kalop sa ai nai keungchi ai mymy i choh tyn ai naira y pato ai nai hlau keung teng y takeng u.

³Chei u, khen cham, kasui theung y beram cho awm nai kamta kang pato nai bo he.

⁴Tangka yh hawi jibo hawi phainai py syn u moh, lam sala y ami ai preng u praw moh.

⁵Naibaly nangchi i kun nai yhm tleirei y, ‘Hini yhm y ly awmnem nai tym sy,’ nanai thui u man.

⁶Naibaly hu y awmnem nai chanau awm baly, nangchi i awmnem nai leu ly ni i tlang tleaung y tym ai; awm y baly nangchi i tlang tleaung y ali teang ai.

⁷Huni yhm y awm u jojo ly, nichi my ang pei nai ngierei ly cho nei u; kalop sa nai keung ly vang nga ai nai ataing.

⁸Yhm tleirei lyp u moh. Naibaly nangchi i kun nai avang ngierei y ang kawn baly, nichi my ang sawn pi nai ngierei ly cho u; huni i avang y no naichi ai py hawi so pi; naibaly nichi teng y,

⁹‘Tameuh i peang nai ly nangchi ahawi y tym bo,’ tapi.

¹⁰Na i py nangchi i kun nai avang tleirei y nangchi ai kawn y baly, huni i lam y tako u iy,

¹¹‘Nangchi avang i spryh kaichi i kheu padawi y akau nai ly nangchi i nai ly nangchi tlang tleaung y ka kaji pyn bo; na i py Tameuh i peang nai ly nangchi ahawi y ang tym bo, nanai pany u,’ tapi.

¹²Kang napi kai ly, huni kani y ly huni avang patang ai nai tleaung y ly Sodom avang patang ai nai ly hawi kyh alam ai.

¹³“Aw Korazin awi, nang ly taham si! Aw Bethsaida awi, nang ly taham si! Nangni i meingtym y atiti rengrang sa naichi ly Tura hawi Sidon avang y sa nai ne i khyly, nini ly jangni ks-so paisiu kanih akhiu nai, maiphu theung y ateh iy uikhei pawn ai bo.

¹⁴Na i py tara chih nai kani y ly nangchi tleaung y ly Tura hawi Sidon avang i patang ai nai ly hawi kyh alam ai.

¹⁵Naibaly nang Kapernaum avang awi, nang ai ly kani pri y tym pa-rei tahm pasang ai a? Nang ai ly tavau kho y tym pa-rei tahm panem ai na a.

¹⁶“Ami py nangchi i leu tangai baly kai i leu tangai nai bo mang; ami py nangchi ai ngai y baly kai ai ngai y nai bo mang; ami py kai ai ngai y baly, kai ai pato nai keung ai ngai y nai bo mang,” napi.

¹⁷Naibaly vui saryhrei naichi ly kawn parai naimy vawi ali teang iy, “Areng, vawinamchi ai py nang i amyn deaungkho y kaimychi my ngaingai sa pajau,” napi.

¹⁸Naibaly ni my ly nichi teng y, “Amlo sadi kamta Setan ly kani pri mang i dengdairei tla nai kaniu na a.

¹⁹Khen cham, nangchi ly pavuichi hawi, kani taaichi ai chiu pajau ai nai hawi, paleung ka-e i sa thai naira bawibawi tleaung y peang pajau ai nai py leu kang pei mang; naibaly ati sai py nangchi ai no hai pajau y ai mang.

²⁰Na i py vawinamchi ai ly nangmychi my nga ngai sa pajau nai deaungkho y kawn u moh; kani pri mang y naini nangchi i amyn tajiu nai deaungkho y kawn u,” napi.

²¹Hunai thym khyp khala y mymy ly Phailo Kachai y khri pa-rei kawn i, “Aw Ngaai, kani khaileaung Areng, nang ly khumi kacheng hawi paleung ha naichi teng y hini leu payh iy, deaungdi chymplei naichi teng y amteng hai nai deaungkho y kang palo mang; ne, Ngaai awi, hunai kamta sa ai nai nang ly hawi, nanai pany.

²²Ngaai my ati cheaungkhang bawibawi kai teng y au bo. Naibaly Chapo ami mo, nanai ly ampo ny y baly ami py pany y; Ampo py ami mo, nanai ly Chapo hawi, ami teng y Chapo my amteng hai ai nai ngai nai ny y baly ami py pany y,” napi.

²³Naibaly abangnaichi mang y hi i, “Nangchi i atiti niu nai ngierei y niu nai mei ly taham hawi:

²⁴kang thui pi, amo neangneangchi hawi areng neangneangchi py nangchi i atiti niu naichi ly niu ai nai ngai, na i py den py niu y; nangchi i kano y thai naichi py thai ai nai ngai, na i py den py thai y,” nanai kangviu y napi.

²⁵Naibaly khen cham, Reita pany nai keung ami mo angdo i mymy ai cham ai nai, “Sara, deungtasarei hengra nga ai nai mana kasa ai mo?” napi.

²⁶Naibaly mymy ly ni teng y, “Reita y mana tajiu mo? Nang ly mana mana phain mo?” napi.

²⁷Naibaly ni my ly, “Nang i Areng Tameuh ai ly nang i paleung verei hawi, nang i phailo verei hawi, nang i atho bawibawi hawi, nang i dawn nai bawibawi hawi nang tamen ai nai tla; nangmy ai atamen nai kamta nangmy i saleaungchi ai py tamen ai nai tla, nanai he,” nanai pathang.

²⁸Naibaly ni my ly mymy teng y, “Nang i pathang nai teng parai mang: huna nai sa baly nang heng ai,” napi.

²⁹Na i py ni my ly eaung ai nai tau i Isu teng y, “Naibaly kai i saleaung khumi ly ami mo?” napi.

³⁰Isu my pathang i, “Ami mo Jerusalem i dengdairei Jeriko avang y satla nai, lam sala y damrachi hawi avum i, hunichi my ly ni i ateaung lawm pi pawn veng iy dei vi pa-rei my ni ai pakhau i khai su.

³¹Naibaly pathyp pi nai keung leaungrei huni lam y ly tako ape khyp i, ni ai niu baly lam teng mang en vui.

³²Naibaly hunai kamta Levi cheng i khumi leaungrei huni meingtym y tym i ni ai niu baly, lam teng mang en vui teang.

³³Na i py Samari khumi leaungrei ly khuleaung chei nai tarawi y ni i awm naira y tym i, ni ai niu baly khrikhri pa-rei pahen, naibaly ni teng y chei iy,

³⁴tamo y ly asi tui hawi kreip athai hang py thi pi i bam pajau baly, mymy i keaungngo kano kasau tleaung y atang hai; naibaly charai y chei hai i kry bo.

³⁵Naibaly khawn mang y ly pia vui pangrei nai tangka cho nyhrei patheaung i, charai typ nai keung teng y pei iy, ‘Mymy ai kry ly, hini bo i khei nai ly kaimy ali teang kha y kang heung teang ai,’ napi.

³⁶“Hunichi leaung thomrei theung y ly damrachi hawi avum nai i saleaung khumi ly mani ne ai nai athang khai mo?” napi.

³⁷Naibaly ni my ly, “Mymy ai pahen nai keung,” napi. Isu ly mymy teng y, “Chei ly, nang py hunai kamta so teang,” napi.

³⁸Naibaly nichi ly khuleaung chei nai tarawi y mymy ly mani avang y mo kun; naibaly neampachy leaungrei, amyn Martha napi nai ly mymy i yhm y ni ai anga hai.

³⁹Ni ly amnau neampachy leaungrei awm, amyn ly Mari: huni my ly Areng i kheu keung y ateh iy, ni i leu tangai.

⁴⁰Na i py Martha ly biu an amsi ryry nai khrukhra la na i, ni teng y chei iy, “Areng, kai i amnau my kalop sa nai kaimy tlairei patlaw jo nai ly dawn hai y a? Kai ai sabawm ai nai thui pi kyh ba,” napi.

⁴¹Naibaly Areng my ly, “Martha, Martha, nang ly atiti neangneang dawn ala nai, khrukhrala na na a tu ly; na i py aly len keh nai harei awm;

⁴²Mari i kahawi vawi nai ly la pi ai nai tlo y leang,” nanai pathang.