Read Khumi Chin LUKA 12 Bible Online

LUKA 12 - Khumi Chin bible

LUKA 12

¹Huna nai khumi mipui sang neangneang achiu lengleang na pa-rei achu nai thym khala ly Isu my abangnaichi teng leu thui amteaung i, “Pharisaichi i angbo, tapawp naira y ly amkym u.

²Na i py amteng y ai nai heu nai ly ha py by y; pany y ai nai apha nai py ha py by y.

³Hunai deaungkho y nangchi i kaveng y thui nai ngierei ly kangvang y thai hai ai; panglai katem theung y kano keung y nangchi i leu thui nai ly amphu salo y aeu hai ai.

⁴“Naibaly ahawichi awi, kang thui pi, Tlang y padei iy, huni bo y ati takhra so bi thai y naichi ai ly jei u moh;

⁵na i py nangchi ly ami ai jei ai nai tla mo, nanai kang thui pi rym ai; padei nai bo y py ngari angawm y aphi bi pajau ai nai keung ai phai jei u; ne, huni ai phai jei u, kang napi kai ly.

⁶Li tavo chy pangrei y pia nyhrei jo u vai y a?

⁷Na i py nichi theung y Tameuh ly ha py takhawi vai y. Nangchi i sam amai malawn py kati be na a. Jei u moh; nangchi ly li tavo chy neangneangchi tleaung y py teng keh na a.

⁸“Naibaly kang thui pi, Amichi i mo y kai ai apha y nai ngierei ai ly Tameuh i kani pri i amtaw thau naichi i mo y Khumi i Chapo my ni ai apha hai y teang ai.

⁹Na i py amichi i mo y kai ai apha nai ai ly Tameuh i kani pri i amtaw thau naichi i mo y apha hai teang ai.

¹⁰Naibaly Khumi i Chapo ai cheh nai ngierei ai ly pahen pi ai: na i py Phailo Kachai y khrairei thui tamawn nai khumi ai ly pahen pi y ai.

¹¹Naibaly achura yhm i khumichi hawi, arengchi hawi, miteaung kehchi i mo y ang hawi nai khala y, ‘Mana katlau ai mo? Ati leu kathui ai mo? nanai paleung adi adiu nai awm u moh;

¹²huna nai neng khala ly nangchi i thui ai nai ka-vo ly Phailo Kachai my ang patiu ai,” napi.

¹³Naibaly khumi mipuichi theung i ami mo leaungrei ly Isu teng y, “Sara, jai teng y kai ai yhmtheaung paji ai nai thui pi kyh,” napi.

¹⁴Na i py ni my ly mymy teng y, “Nai awi, nangni i tlang tleaung y tara chih nai keung hawi, yhmtheaung paji ai nai keung y kai ai sa nai ly ami mo?” napi.

¹⁵Naibaly mymy ly nichi teng y, “Amkym u ly, paleung ano lyhlyh naira y ly akry u: yhmtheaung nang naira y ly khumi heng lawh nai ny y leang,” napi.

¹⁶Naibaly mymy ly nichi teng y pata nai leu thui i, “Khumi kanang leaungrei awm i, my i hlau khri pa-rei pa-tiu thym na.

¹⁷Naibaly adawn i, ‘Mana kasa ai mo hi ly? Kai i choh khai achu ai naira by y ly,’ napi.

¹⁸Mymy my teang, ‘Hina nai kasa ai; kai i choh beuchi aphrei ai i, hini tleaung y kalen sa iy, hu y ly kai i choh hawi yhmtheaung bawibawi khai achu ai.

¹⁹Naibaly kai i hengra teng y, Hengra awi, saneng neangneang i vui nang yhmtheaung pateung achu bo he; anawn ly, cho nei, amo theu naimy awm ba, kanapi ai,’ napi.

²⁰Na i py Tameuh my ni teng y, ‘Kamthu awi, vai dym ly nang i hengra kang la pi ai bo; naibaly nang i yhmtheaung pateung achu nai ly ami nga ai mo?’ napi.

²¹Amy i vui yhmtheaung pateung iy, Tameuh ai amkhaw y pui nai ly hinai kamta awm reng,” napi.

²²Naibaly mymy ly abangnaichi teng y, “Hunai deaungkho y kang thui pi, ‘Kaichi ati cha ai mo? nanai nangchi i hengra i vui hawi, ‘Kaichi ati ateaung ai mo? nanai nangchi i tlang i vui py paleung bi u moh.

²³Cha ai nai tleaung y ly hengra ty keh, ateaung tleaung y py tlang ty keh.

²⁴O-achi ai phai dawn u cham; nichi ly choh py tiu y, tyn py tyn y, choh pai py choh beu py by y; na i py Tameuh my nichi ai pacho reng; nangchi ly tavochi tleaung y mana tanrei teng keh mo?

²⁵Naibaly nangchi theung y huna nai paleung bi nai deaungkho y amy i jeng mang miurei asang hai thai nai ly ami awm mo?

²⁶Hini chy malawn py so u thai y pui nai ly, ati mana nai ati takhrara y paleung bi u lawh?

²⁷“Jeupawmchi i prau nai sai dawn cham: hunichi ly kalop py so y, palo py kyn y: na i py kang thui pi, Solomon malawn py mymy i nang nai bawibawi amthyp khala y hini harei tahm matem py by y.

²⁸Hunaibaly nangchi ym nai di naichi awi, daichi acha kangheng, vaini ati heng iy khawn mang y ly mai y teih ryp nai ai malawn py Tameuh my huna tanrei pateaung baly, hunichi tleaung y ly nangchi ai ateaung mana tanrei ang pei ai mo?

²⁹“Naibaly nangchi cha ai nai, nei ai nai hau u lyhlyh moh, naibaly paleung adi adiu nai kamta py awm u moh.

³⁰Huni atiti bawibawichi ly khaileaung pri y cheng cheaungkhangchi my hau; na i py hunichi ly nangchi i aly aeang nanai Ngampo my ang pany pi yb nai bo.

³¹Mymy i peang nai phai hau u, naibaly hunichi py ang pei panawi bi ai mang.

³²Kamkawm di naichi awi, jei u moh; Ngampo my ka-peang ang pei nai ly khri pa-rei ang kawn.

³³Nangchi i awm nai ngierei jo u ly, khumi ngarichi teng y pei u; kani pri mang y kangviuchi tym y naira y, thaikem my cho y naira y, tangka yh tangym thai y nai hawi, yhmtheaung tamo pajau y nai py so u.

³⁴Nangchi i yhmtheaung awm naira ngierei y nangchi i paleung py awm ai.

³⁵“Neina akyn iy nangchi i maisi py angveaung jo nai awm u ly;

³⁶yhmkeung my aju palyn nai pawi i dengdairei vawi nai khala y ang tym iy, katheu takhei baly, paeaung praw thai ai nai ajeng rym naichi kamta awm u.

³⁷Yhmkeung jeu nai neng khala y miseaung ajeng rym naimy niu nai miseaungchi ai ly taham hawi ai; meitang khyp kang thui pi, ni my ly neina akyn ai i, mymychi ai biu o hai iy nichi ai kry ai.

³⁸Naibaly aneng hyh y mo, angthau nai neng khala y mo ang tym iy huna nai niu baly, huni miseaung ly taham hawi ai.

³⁹Na i py hini ly pany u, yhmkeung my kangviu khumi tym ai nai neng pany i khyly mymy ly o rym ai i, mymy i yhm ateng pi vau ai nai khai su y leang bo.

⁴⁰Nangchi py aeng ryhryh naimy awm u, nangchi i dawn y nai neng khala y ly Khumi i Chapo ly ang jeu ai,” napi.

⁴¹Naibaly Petera my, “Areng, hini pata nai leu ly kaimychi my tlairei ai thui pi nai a, khumi bawibawichi ai thui pi nai a?” napi.

⁴²Naibaly Areng my, “Hunaibaly dengtheaungchi ai kry iy avo nai neng tleirei y biu an dawn pi ai nai yhmkeung i khai nai yhmtheaung kry nai keung ka-ym kaawm cheng nai ly ami mo?

⁴³Mymy i yhmkeung ang jeu nai neng khala y miseaung huna nai kamta sa nai ai niu nai ly taham hawi ai.

⁴⁴Meitang khyp kang thui pi, mymy i awm nai bawibawichi tleaung y kry keung y khai ai.

⁴⁵Na i py huni miseaung ly mymy i paleung y, ‘Kai i yhmkeung ly tym y leang rai mang,’ na iy miseaung neampachy neampacho ai pakhau iy cha nei nai pavui khyly,

⁴⁶huni miseaung i yhmkeung ly ni i dawn y nai kani y, pany y nai neng khala y ang jeu ai, naibaly khri pa-rei chip ajiu piu iy, khumi ka-ym by y naichi i nga nai kamta nga hai ai.

⁴⁷Yhmkeung i kangai pany se iy, aeng rym y nai hawi, yhmkeung i kangai py so y nai miseaung ai ly neangneang pakhau ai.

⁴⁸Na i py pany y nai i tlang tleaung y pakhau ai nai ataing pa-rei atiti sa nai khumi ai ly maidenrei chy pakhau khyh ai. Naibaly ami teng y neangneang pei baly mymy teng y neangneang hnei ai; amichi my ami teng y neangneang au baly mymy teng y ang hnei ra hnei ra ai.

⁴⁹“Khaileaung pri y mai pala ai nai kang jeu nai ne; vai py kang dudu jau khyly kana kai y!

⁵⁰Na i py kai baptisma nga ai nai awm rai, huni law y nai ryrei ly kai khri taho amchei na ly.

⁵¹Kai ly khaileaung pri y aly naira tym hai ai nai kang jeu, nanai dawn u lawh a? Ny y leang, kang thui pi, amprei hai ai nai kang jeu nai teu;

⁵²vai dengdairei dengtheung harei y khumi leaung pangrei akhawi takhra ai, leaung thomrei my leaung nyhrei ai, leaung nyhrei my leaung thomrei ai tiu ai;

⁵³nichi ai akhawi hai takhra iy, chapo my ampo ai, ampo my chapo ai: amhm my chaniu ai, chaniu my amhm ai: amni my lengo ai, lengo my amni ai tiu ai,” napi.

⁵⁴Naibaly mymy ly khumi mipuichi teng y, “Nangchi ly ni dym mang y khupanym theu nai niu baly, ‘Kani nai ai bo,’ na u praw lawh; naibaly ne khyp ryp veng.

⁵⁵Naibaly tokalawi ali aho nai pany baly, ‘Khri pa-rei bi ai,’ na u; naibaly ne khyp ryp veng.

⁵⁶Tapawp naichi awi, nangchi ly khaileaung pri hawi, kani awm nai sai py hawihai pany kawp be, ati mana nai vai i neng awm nai sai ly pany kawp y lawh a?

⁵⁷Ati mana nai y nangmychi i hawi naira ly chih u y lawh a?

⁵⁸Naibaly tara chih nai keung i mo y nang ai seu nai khumi hawi nang tako nai kha y ly, tako hawi nai thym khala y amrawi ai naira hau tanga; ti y baly ni ly tara chih nai keung i mo y ang pahawi ta-li ai i, tara chih nai keung my ly pajeng nai keung teng y ang au iy, pajeng nai keung my ly theaung y ang paeung lawh na.

⁵⁹Kang thui pi, pia sei chy py nang pe angym y ryrei ly hu i dengdairei nang pipi theu ai ny y,” napi.