Read Khumi Chin LUKA 14 Bible Online

LUKA 14 - Khumi Chin bible

LUKA 14

¹Naibaly hina nai awm, mymy ly Anawn Kani y Pharisai leaungrei i yhm y biu cha ai nai chei khala y nichi my khen patawn jo.

²Naibaly khen cham, Isu i mo y tlang verei bau nai ami mo neampacho leaungrei awm.

³Hunaibaly Isu my Reita pany nai keungchi hawi Pharisaichi ai pathang i mychi teng y, “Anawn Kani y hawi sa ngau a, so ngau y a?” napi.

⁴Na i py mychi ly katheu y. Naibaly mymy ly ni ai amkhaw i hawi sa iy, tako hai bo.

⁵Naibaly mymy ly nichi teng y, “Nangchi theung y ami mo keaungngo kano kasau mo, sira mo tuikan y tlo khyly, Anawm Kani y py atheu praw y ai a?” napi.

⁶Naibaly huni leu py nichi pathang thai y bi bo.

⁷Naibaly heang naichi ly atehra kahawi keh vawi reng nai niu i, nichi teng y pata nai leu thui:

⁸“Aju palyn nai pawi y biu cha ai nai ami my mo ang heang nai khala y ly atehra kahawi keh y ateh u moh: ti y baly nang tleaung y khumi len keh nai ai heang vui ai i, nang ai ang heang nai keung my ly, ‘Hini atehra ly aheang pi,’ ang napi lawh ai;

⁹naibaly nang ly kangji nga naimy atehra hawi y kehkeh naira y ateh makho lawh na.

¹⁰Hunai deaungkho y ang heang nai khala ly atehra hawi y kehkeh naira y phai ateh; hunaibaly nang ai heang nai keung my jeu iy nang teng y, ‘Nai awi, tahm asang kyh naira asyh ba,’ napi iy, nang i biu o hai naichi i mei ka-niu y my nang ai ang palo ai.

¹¹Ami py tahm apasang nai ngierei ai ly tahm panem ai; tahm apanem nai ai ly tahm pasang ai,” napi.

¹²Naibaly mymy ly mymy ai heang nai keung teng y py, “Kani thun y mo, vum y mo nang pawi sa nai khala y ly, nang i ahawichi hawi, ngamjo ngamnauchi hawi, nang i misochi hawi, nang i saleaung khumi kanangchi ai ly heang u reng moh: ti y baly ang heang teang ai i, ang heung kaleih ai.

¹³Na i py nang ly pawi sa nai khala y ly khumi kamawnchi hawi, khumi kaphrachi hawi, kheu kambaichi hawi, mei kamjuchi ai phai heang u.

¹⁴Hunichi my ly ang heung ai nai by y nai deaungkho y nangchi taham hawi ai; khumi kahawichi angthau bi nai neng khala y ly ang heung bi ai,” napi.

¹⁵Naibaly ni i biu o ahawi nai ami mo leaungrei huna nai thai i ni teng y, “Tameuh i peang naira y biu cha ai nai khumi ly taham hawi,” napi.

¹⁶Na i py mymy ly ni teng y, “Ami mo vum y pawi len parai nai sa i, khumi neangneangchi ai heang.

¹⁷Naibaly cha ai nai neng baly heang naichi teng y ly, ‘Jeu u jau, vai ly bawibawi pajau bo,’ napi ai nai miseaung ai pato.

¹⁸Naibaly nichi bawibawi leu harei amkhaw iy, akhi ai naira awm bebe. Kangman keh my ly mymy teng y, ‘Kai ly hlau van i khen ai nai tla; kai ai pahen ly, akhi hai kyh ba,’ napi.

¹⁹Naibaly khumi takhra my py, ‘Kai ly si pangrei van i, hawi mo hawi y mo cham ai nai chei ai nai tla; kai ai pahen ly, akhi hai kyh ba.’ napi bi.

²⁰Naibaly khumi takhra my, ‘Kai ly aju la i kang jeu thai y leang,’ napi taleang bi.

²¹“Naibaly miseaung my ly ni i yhmkeung teng y huni satang thui pi. Hunaibaly yhmkeung ly kado theu i miseaung teng y, ‘Theu ly, lam y py, taki tavai y py chei kaliki ly, kamawmchi, khumi kaphrachi, mei kamjuchi, kheu kambaichi ai hi y pahawi,’ napi.

²²Naibaly miseaung my ly, ‘Areng nang i leu pei nai kamta sa nai bo, na i py meingtym palai jojo rai,’ napi.

²³Naibaly yhmkeung my miseaung teng y, ‘Theu ly, lam kalen y py, yhm meaungteng y py chei ly, kai i yhm kawi ai nai khumichi ai kun hai tanga.

²⁴Kang thui pi, kai i heang nai khumichi ly leaungrei py kai i pawi sa naira y cha ai ny y leang,’ napi,” nanai thui pi.

²⁵Naibaly khumi mipui ka-teng ny y naichi ni teng y chei teang: hunaibaly mymy ly hi i nichi teng y,

²⁶“Ami py kai teng y jeu nai ly mymy i ampo hawi amhm hawi, aju hawi chanauchi hawi, mymy i amjo amnauchi hawi tuichochi hawi, mymy i hengra ai py niu ngai y nai by y baly, kai teng y abang nai khumi lawn thai y leang.

²⁷Ami py amy i kraws apu naimy kai teng y abang nai ny y baly, kai i khumi lawn thai y leang.

²⁸“Nangchi theung y ami py yhm ka-sang sa ai nai tau baly, angchei kha y ateh iy cheang pajau ai nai amy i yhmtheaung awm mo by y mo, nanai vang pasym y ai a?

²⁹Ti y baly lengseaung leng jo iy cheang pajau y pasi lawh baly, khen nai ngiereichi my ly,

³⁰‘Huni khumi ly yhm leng i cheang pajau y pasi lawh be,’ nanai ang panui hai lawh na.

³¹Naibaly samrang ami mo samrang takhra ai tiu ai nai chei ai nai kha y, angchei y ly ateh iy, khumi meaung kateaung nyhrei hawi atiu ai nai chei nai ly khumi meaung kateaungrei hawi nam vam mo, vam y mo adeng y ai a?

³²Ti y baly samrang takhra ly kamlo paraira y awm nai thym khala y my aly ai nai leu hnei ai nai savai pato ai.

³³Hunai kamta ly nangchi theung y ami py ni i awm nai bawibawi khai su y nai ngierei ly kai i khumi lawn thai y leang.

³⁴Palawi ly hawi, na i py palawi py dau veng baly ati my lum hai bi ai mo?

³⁵Khaileaung i vui py, ei khai achu naira i vui py hawi y bo; khumichi ly aphi veng. Ami py thai ai nai kano awm baly thai sy,” napi.