Read Khumi Chin LUKA 15 Bible Online

LUKA 15 - Khumi Chin bible

LUKA 15

¹Naibaly akeu cheaung nai khumichi hawi, khumi kamngo bawibawichi ly ni i leu tangai ai nai mymy ahawi y tapai.

²Naibaly Pharisaichi hawi Reita patiu nai keungchi my ly. “Hini khumi ly khumi kamngochi ai kawn i, nichi teng y biu cha teang ly,” nanai jo sei u lenglang.

³Naibaly mymy ly nichi teng y hini pata nai thui pi i,

⁴“Nangchi theung y ami py beram chungvairei awm iy, huni theung y harei tamo khyly, daichi ka-vym y vui takaw ho ngan takawrei nai ly daw jo iy, tama nai niu ali y ryrei ly ami mo hau y ai nai?

⁵Naibaly niu teang baly kawn parai naimy apu hawp.

⁶Naibaly yhm y tym baly my i ahawichi hawi saleaungchi ai palau achu i mychi teng y, ‘Kai ai kawn hai kyh, kai i beram tama nai ly kaniu teang bo,’ na be.

⁷Kang thui pi, hunai kamta ly khumi kahawi vui takaw ho ngan takawrei uikhei palai ai nai by y naichi tleaung y ly, khumi kamngo leaungrei uikhei nai ai ly kani pri mang i awm naichi my kawn keh ai.

⁸“Naibaly neampachy ami py pia vui pangrei nai horei awm iy, harei tamo sy; maisi thawn i yhm pasi iy, niu ali teang y ryrei ly ami mo hawihai hau y ai nai?

⁹Naibaly niu teang baly ahawichi hawi my i saleaungchi ai palau achu i, ‘Kai ai kawn hai kyh, kai i pia vui pangrei nai tama nai ly kaniu teang bo,’ na be.

¹⁰Kang thui pi, khumi kamngo leaungrei uikhei nai ai Tameuh i kani pri mang i amtaw thau naichi my kawn.

¹¹“Naibaly khumi ami mo chapo leaung nyhrei awm.

¹²Naibaly deaungdi keh my ly ampo teng y, ‘Ngaai, kai i vui yhmtheaung pei,’ napi. Naibaly yhmtheaung ly myni teng y paji.

¹³Naibaly kani kra y naimy chapo deungdi keh my ly mymy i vui yhmtheaung bawibawi la achu iy, pri kamlo paraira y chei vui; hu y ly saw ala nai yhmtheaung pasum ryry atyhtyh.

¹⁴Naibaly pasum krai khala y huni pri y ly khrikhri pa-rei takang theu, naibaly mymy ly avaw angchei bo.

¹⁵Hunaibaly mymy ly huni pri i khumi leaungrei teng y chei i, ni hawi atabi; naibaly huni my ly ni ai eu biu pei ai nai hlau mang y pato.

¹⁶Naibaly eu i cha nai keu hawi mymy i kajeu apakawi ai nai khrikhri pa-rei ngai; naibaly ami py ni ai ati sai py pei y.

¹⁷“Naibaly ni ly adawn vau nai khala y, ‘Ngaai teng y ly tham naichi neangneang biu cho lei y nai awm nai iy, kai ly hi y biu kanglam y kadei ai lawh bo.

¹⁸Kai ly angthau iy ngaai teng y chei ai i mymy teng y, Ngaai, kani pri mang i hawi nang i mei ka-niu y py kai kamngo sa lawh; nang i chapo pathi ai nai py ataing y leang bo;

¹⁹nang teng y nangmy i tham nai khumi leaungrei kamta palawn teu ba, kanapi ai,’ napi.

²⁰Naibaly angthau i ampo teng y chei. Naibaly kamlo dengdairei ampo my ni ai niu i khrikhri pa-rei pahen, naibaly angpreng iy tangbeng y pachawm ryry.

²¹Naibaly chapo my mymy teng y, ‘Ngaai, kani pri mang i hawi, nang i mei ka-niu y kai kamngo sa lawh; nang i chapo pathi ai nai py ataing y leang bo,’ napi.

²²Na i py ampo my ly mymy i miseaungchi teng y, ‘Kanih hawi keh nai lo kaliki ly, akhiu hai u; kiu pajeung y kiu sabyh hawi, kheu y phainai py pachu hai u,

²³si cho veung hawi keh nai lo u ly, tleh u; kawn parai naimy cho u sina;

²⁴hini kai i chapo ly dei nai, heng ali teang nai bo he; tama nai kaniu ali teang nai bo he,’ napi. Naibaly amo theu parai naimy awm u bo.

²⁵“Naibaly chapo miteaung keh nai ly hlau y awm; naibaly ni ly yhm y tym ai nai khala ly lam nai hawi, atiti beu nai katyn py thai bo.

²⁶Naibaly mymy i miseaung leaungrei ai palau i, ‘Ati na lawh?’ nanai deng.

²⁷Naibaly ni my ly mymy teng y, ‘Ngamnau ang vawi bo; noso kahawi avum teang nai deaungkho y ngampo my si cho veung hawi keh nai tleh na a,’ napi.

²⁸Naibaly mymy ly kado theu i kun ngai y bo; naibaly ampo my ly theu iy ni ai parawi.

²⁹Na i py mymy ly ampo teng y, ‘Khen cham, saneng hi jirei kai nang i kalop kang sa pi bo, nang i leu py tlen py kang tangai y nai ly awm vai y; na i py kai i ahawichi hawi amo theu naira sa ai nai mi-i cho khrairei kai ai pei vai y;

³⁰na i py hini, nang i chapo, bimachi teng y nang i yhmtheaung cha krai nai keung vawi baly, mymy i vui si cho veung hawi keh nai tleh hai lawh ly,’ nanai pathang.

³¹Naibaly ampo my ly ni teng y, ‘Deang awi, nang ly kai teng y awm jo nai chy bo. Kai i awm nai ngierei ly nang i na a;

³²amo theu nai kawn parai naimy awm ai nai tla chy bo; hini ngamnau ly dei nai heng teang nai na a; tama nai niu teang nai na a,’ napi,” nanai thui pi.