Read Khumi Chin LUKA 17 Bible Online

LUKA 17 - Khumi Chin bible

LUKA 17

¹Naibaly mymy ly abangnaichi teng y, “Atlym nairachi ly awm y ai nai awm thai y leang; na i py atlym naira awm hai nai keungchi ly taham si!

²Hini khumi theangchichy nai tleaung y leaungrei ai atlym hai ai nai keung ai ly, my i kaneaung y choh nip naira lengseaung awi hai iy pangli tui y pala i khyly, mymy i vui hawi keh alam ai.

³Hawi hai palai adawn u: ngamjo ngamnau my atiti kamngo sa baly ni ai parip; mymy ly paleung adawn ali baly ni ai pahen.

⁴Mymy ly kanirei y nang i tlang tleaung y tlen saryhrei atiti tamang iy, ‘Kai paleung adawn ali bo,’ nanai tlen saryhrei nang mang y mo leng teang baly, nang ly ni ai pahen ai nai tla,” napi.

⁵Naibaly amtaw thau naichi ly Areng teng y, “Kaichi i ym naira pei panawi khyh ba,” napi.

⁶Naibaly Areng my ly, “Nangchi i ym naira anmawi hm amairei ka-tawm awm baly, sukamin dengkeaung teng y ly, ‘Nangmy akyn ryp ly, pangli y a-ui vui,’ nanai nangchi my napi ai i, nangchi i leu tangai ryp ai.

⁷Naibaly nangchi theung y ami py li thawn nai mo, beram typ nai mo miseaung awm i khyly, li thawn nai vawi khala y, ‘De, biu o jau,’ nanai thui pi praw na a?

⁸‘Kai i cha ai nai pawi pi ly, neina atha ly, kai cho nei pajau y ryrei ly biu an amsi pi; hunai bo y nang ly cho, nei,’ nanai thui pi y ai a?

⁹Mymy i leu pei nai kamta my sa pi nai deaungkho y mymy i miseaung teng y ly kawn nai leu thui vai a?

¹⁰Hunai kamta teng nangchi py nangchi teng y leu pei nai kamta sa u bawibawi nai bo y, ‘Achi ly miseaung vang y nai tla he; sa avo naira sa nai teu,’ na u,” napi.

¹¹Naibaly hina nai ne, nichi ly Jerusalem y chei ai nai khala y mymy ly Samari hawi Kalili pri y ly tako katlen vui.

¹²Naibaly mani avang y mo kun ai nai khala y keaungsi awm nai cheichei khumi leaung horei mymy hawi avum u i, kamlora y angdo iy athorei my,

¹³“Isu Areng awi, kaichi ai pahen kyh,” napi.

¹⁴Naibaly mymy ly nichi ai niu baly nichi teng y, “Chei, pathyp pi nai keungchi teng y akhen hai u,” napi. Naibaly hina nai ne, nichi ly tako u nai thym khala y my chai u bo.

¹⁵Naibaly mychi theung i leaungrei my hawi bo, nanai apany baly tao pajeng parai naimy Tameuh ai palo nai vawi ali teang i,

¹⁶mymy i kheu keung y ambeu iy kawn nai leu thui; huni ly samari khumi ne.

¹⁷Hunaibaly Isu my pathang i, “Khumi leaung horeichi ai ly pachai u mo kana?

¹⁸Leaung takawreichi ly ma y awm mo? Hini cheng takhra khumi leaungrei ny y baly Tameuh ai palo ai nai amipy vawi ali teang y mo kana be,?” napi.

¹⁹Naibaly mymy teng y, “Angthau ly, tako ba, nang i ym naira my ang hawihai nai bo he,” napi.

²⁰Naibaly Pharisaichi my Tameuh i peang nai tym ai nai neng deng nai deaungkho y ni ly mymychi teng y, “Tameuh i peang nai ly niu thai naira y tym y leang;

²¹‘Khen cham, hi y he: hu y ho,’ nanai py ang tapi y ai; khen cham, Tameuh i peang nai ly nangchi i paleung theung y awm,” nanai pathang.

²²Naibaly mymy ly abangnaichi teng y, “Khumi i Chapo heng nai khala i kanirei niu ai ngai nai neng awm ai, na i py niu ai ny y leang bo.

²³Naibaly nangchi teng y, ‘Khen cham, hu y ho: khen cham, hi y he,’ ang napi ai; chei u moh, nichi teng y abang py abang u moh.

²⁴Amlosadi theu iy, kani anui y meingtym harei dengdairei angvang i, kani anui y meingtym takhra khrairei kangvang ko nai kamta ly, Khumi i Chapo py mymy jeu nai kani y ly hunai kamta awm teang ai.

²⁵Na i py huna nai ny y rai khala y mymy ly atiti neangneang patang ai nai tla i, vai deung i kangthauchi my ly ni ai ngai y naimy awm ai nai tla.

²⁶Nova heng nai khala y atiti awm nai kamta ly, Khumi i Chapo ang jeu bi nai kani y ly awm teang ai.

²⁷Nova ly paleaung y kun i, tuibai theu nai nichi bawibawi ai padei be veng nai kani tym y ryrei ly nichi ly cha py cha, nei py nei, apom py apom, apom ai nai py deaung paseng.

²⁸Hunai kamta ly Lota heng khala y awm teang; nichi ly cha py cha, nei py nei, van py van, jo py jo, pati py pati, yhm py sa;

²⁹na i py Sodom avang i nai Lota theu nai kani ly kani mang i dengdairei mai hawi kan kani nai i, nichi ai padei bebe.

³⁰Hunai kamta ly Khumi i Chapo my amteng nai kani y ly awm teang ai.

³¹“Huni kani y ly ami py mymy i vawnsai angtheung y awm nai, mymy ly amphu y awm baly, tawn ai nai satlo moh sy; hlau y awm nai khumi py vawi moh sy.

³²Lota i aju ai pany u jojo ba.

³³Ami py amy i hengra palawi ai naira hau nai ngierei ly tama ai; ami py amy i hengra tama nai ngierei ly apalawi ai.

³⁴Kang thui pi, huni vum y ly i naira harei y khumi leaung nyhrei awm ai i, leaungrei ai ly la vui ai, leaungrei ai ly daw jo ai.

³⁵Neampachy leaung nyhrei choh nip nai awm ai i, leaungrei ai ly la vui ai, leaungrei ai ly daw jo ai.

³⁶[Naibaly neampacho leaung nyhrei hlau y awm ai i, leaungrei ai ly la vui ai, leaungrei ai ly daw jo ai,]” napi.

³⁷Naibaly nichi my ly ni teng y, “Areng ma mang y mo?” nanai pathang. Naibaly mymy ly nichi teng y, “Mawi veu awm naira tleirei y langnachi py tym achu ai,” napi.