Read Khumi Chin LUKA 18 Bible Online

LUKA 18 - Khumi Chin bible

LUKA 18

¹Naibaly atho si y naimy chiu sa jojo ai nai tla, nanai pany hai ai nai mychi teng y pata nai leu thui i,

²“Mani avang y mo tara chih nai keung leaungrei awm. Huni khumi ly Tameuh ai py jei y, khumi ai py dawn hai y.

³Naibaly huni avang y neampachy lumai leaungrei awm i ni my ly, ‘Kai i paleung ka-e teng y vawitheung tha pi kyh,’ nanai my teng y chei jojo.

⁴Naibaly ni my ly mymy i paleung y, ‘Kai ly Tameuh ai py jei y,

⁵khumi ai py dawn hai y i py, hini neampachy lumai ly kai ai khrukhra hai nai deaungkho y vawitheung tha pi si, ti y baly ang jeu jojo ai i, kai ai akawm hai bymbym lawh na,’ napi,” nanai thui.

⁶Naibaly Areng my ly, “Tara chih nai keung hawi y nai i leu thui nai ly pany u.

⁷Naibaly mymychi i tlang tleaung y neaung kham pi rai i py, mymy i vawi naichi, vum kanithun y mymy ai palau nai keungchi ai ly Tameuh my vawitheung tha pi y ai a?

⁸Kang thui pi, mymy ly nichi ai vawitheung tha pi praw ai. Na i py Khumi i Chapo jeu ai nai neng khala ly khaileaung pri y ym naira niu ai a?” napi.

⁹Naibaly khumi kahawi ne, nanai athang akhai iy, khumi takhra bawibawichi ai tahm khai y nai keung amichi teng y mo ly hini pata nai leu py thui i,

¹⁰“Khumi leaung nyhrei achura yhm kalen pui y chiu sa ai nai lyn kalau i, leaungrei nai ly Pharisai, leaungrei nai ly akeu cheaung nai keung ne.

¹¹Pharisai ly angdo i mymy naimy hina nai chiu asa ryp, ‘Aw Tameuh, kai ly khumi takhra kamta, um paviu naichi, hawi y naichi, pajang sa naichi ny y nai hawi, hini akeu cheaung nai keung kamta py kai ly ny y nai deaungkho y nang teng y kai kawn parai ba.

¹²Kani saryhei y biu tlen nyhrei kahai; kai i nga nai ngierei horei y harei kapei,’ napi.

¹³Na i py akeu cheaung nai keung ly palo paraira y angdo i, kani mang y py dengtheang vam y nai, ‘Aw Tameuh, kai khumi kamngo ai pahen kyh,’ nanai paleung y atum ryry lawh.

¹⁴Kang thui pi, huni khumi tleaung y ly hini khumi ly eaung naimy yhm y vawi kathiu bo. Tahm apasang nai ngierei ai ly tahm panem ai, na i py tahm apanem nai ai ly tahm pasang ai,” napi.

¹⁵Naibaly nam ai nai deaungdi chymplei naichi ai py mymy teng y chei hai, na i py abangnaichi my ly huna nai niu khala nichi ai jo.

¹⁶Na i py Isu my nichi ai palau i, “Deaungdichychi ai kai teng y jeu ai nai pei u, paka u reng moh; Tameuh i peang nai ly hina naichi i vui teu.

¹⁷Meitang khyp kang thui pi, ami py Tameuh i peang nai ly deaungdichy my kawn nai ka-tawm kawn y nai ngierei ly theung y kun ai nai ly aveng,” napi.

¹⁸Naibaly miteaung keh ami mo mymy teng y, “Sara kahawi, deungtasarei hengra kanga thai ai nai mana kasa ai mo?” nanai deng.

¹⁹Naibaly Isu my ni teng y, “Ati mana nai kai ai kahawi napi mo? Leaungrei ny y baly ami py kahawi by y, huni ly Tameuh ne.

²⁰Leu pei naichi ly nang pany be: Pajang sa moh, Khumi ai padei moh, Paviu moh, Seu rumrammoh, Ngamhm ngampo ai tahm khai, nanaichi ly,” napi.

²¹Naibaly ni my ly, “Huni leu bawibawi ly kai deaungdichy khala i dengdairei kapatawm nai bo,” napi

²²Naibaly Isu my huna nai ly pany i ni teng y, “Nang ly lamrei takhawi rai; nang i awm nai ngierei jo ly, kamawnchi teng y paji, hunaibaly nang kani pri y yhmtheaung nga ai; naibaly jeu ly, kai tng y abang,” napi.

²³Na i py ni my ly khri pa-rei nang nai deaungkho y huna nai leu thai i khrikhri pa-rei paleung mawn na.

²⁴Hunaibaly Isu ly mymy ai khen iy, “Yhmtheaung nang naichi ly Tameuh i peang naira y kun ai nai mana tanrei rai na mo!

²⁵Khumi kanang Tameuh i peang naira y kun ai nai tleaung y ly kula-iu saprym kho y a-i praw ai nai rai y keh,” napi.

²⁶Naibaly huni leu thai naichi ly, “Huna nabaly heng naira ami nga pajau ai mo?” napi.

²⁷Ni my ly, “Khumi i so pajau y nai ly Tameuh my sa thai na a,” napi.

²⁸Naibaly Petera my, “Khen cham, kaichi ly kaimychi i bawibawi khai su iy nang teng y abang bo,” napi.

²⁹Naibaly mymy ly nichi teng y, “Meitang khyp kang thui pi, ami py Tameuh i peang nai deaungkho y yhm mo, aju ai mo, amjo amnauchi ai mo, amhm ampo ai mo, chanauchi ai mo khai jo nai ngierei ly,

³⁰vai heng nai khala y my py huni tleaung y nawi keh nai hawi, neng tym ai nai deungtasarei hengra py ngo y ai nai ami py awm ai ny y,” napi.

³¹Naibaly holai nyhreichi ai ly mymy teng y hawi takhra i nichi teng y, “Khen cham, achi ly Jerusalem avang y kalau ai i, amochi i leu tajiu nai bawibawi ly Khumi i Chapo i tlang tleaung y tym ai.

³²Mymy ai ly Cheng Takhrachi teng y patiu hai iy, panui hai ai i angji ngalai pa-rei sa iy ni ai pachi pathawi ai;

³³naibaly chip ai i padei ai; naibaly mymy ly kani thomrei kani y angthau teang ai,” napi.

³⁴Naibaly huni leu thui nai ly nichi ly den py dawn naira ngo y: huni leu thui nai ly mymychi teng y aheu hai i, ati thui nai mo, nanai pany y.

³⁵Naibaly hina nai ne, mymy ly Jeriko avang y tym ai nai kha y mei kamju ami mo cheaung nai lam teng y ateh;

³⁶naibaly khumi mipuichi tako nai katyn thai i, “Ati na lawh?” nanai deng.

³⁷Naibaly nichi my ly, “Nazaret Isu tako na a,” nanai thui pi.

³⁸Hunaibaly ni ly, “Isu Davida i Chapo awi, kai ai pahen kyh,” nanai aeu.

³⁹Naibaly tako man naichi my ly leu katheu y ai nai ni ai jo; na i py ni ly, “Davida i Chapo awi, kai ai pahen kyh ba,” nanai aeu ra veng.

⁴⁰Hunaibaly Isu ly angdo paw iy mymy teng y ni ai pahawi ai nai leu pei.

⁴¹Naibaly mymy i ahawi y tym baly, “Nang i tlang tleaung y ati kang sa pi ai nai ngai mo?” nanai deng. Naibaly mymy ly, “Areng, niu thai ai nai kangai,” napi.

⁴²Naibaly Isu ly mymy teng y, “Niu thai jau, nang i ym naira my ang hawihai nai bo,” napi.

⁴³Naibaly tlenrei khyh my niu praw i, Tameuh ai palo prei naimy mymy teng y abang ryp; naibaly khumi bawibawichi ly huna nai niu i Tameuh ai palo.