Read Khumi Chin LUKA 19 Bible Online

LUKA 19 - Khumi Chin bible

LUKA 19

¹Naibaly Isu ly Jeriko avang y kun i tako prei. Naibaly khen cham,

²Zakai napi nai khumi leaungrei awm; huni khumi ly akeu cheaung naichi theung y khumi kalen leaungrei ne; mymy ly khri pa-rei nang na.

³Naibaly Isu ai ly mana mana awm mo, nanai khen ai nai tau; na i py khumi mipui awm nai deaungkho y mymy khy anem parai i niu thai y.

⁴Naibaly mo mang y angpreng kalym vui iy mymy ai khen ai nai thaidu keung y lyn Isu ly huni lam tako ai nai tla khyp.

⁵Naibaly Isu ly huni meingtym tym iy angdeang kalau i ni teng y, “Zakai awi, avum jau; kai ly vaini nang i yhm y anga ai nai tla he,” napi.

⁶Naibaly mymy ly avum kaliki i, kawn parai naimy anga hai bo.

⁷Naibaly huna nai niu baly nichi bawibawi my, “Khumi kamngo teng y anga ai nai kun bo ho,” nanai josei u.

⁸Naibaly Zakai ly angdo i Areng teng y, “Khen cham Areng, kai i yhmtheaung ka-hyhrei kamawnchi teng y kapei ai; naibaly ami teng i py atiti um paviu teu i py pyh palyhrei kaheung teang ai,” napi.

⁹Naibaly Isu ly ni teng y, “Vaini ly hini yhm y paheng naira tym bo, mymy py Abraham i chapo leaungrei ne teang.

¹⁰Khumi i Chapo ly tama naichi ai hau ai nai hawi paheng ai nai py ang jeu nai ne,” nanai thui.

¹¹Naibaly nichi ly huni leu tangai nai thym khala y mymy ly Jerusalem y tym kasa nai deaungkho y hawi, nichi ly Tameuh i peang nai ly amteng ryp ai nai ym nai deaungkho y py pata nai leu thui pi tabawi.

¹²Hunaibaly mymy ly hini leu thui i, “Khumi kanang ami mo pri peang ai nai leu la iy ali bi ai nai, pri kamlo paraira y chei.

¹³Naibaly mymy i miseaungchi leaung horei ai palau i mychi teng y muku tangka horei pei i nichi teng y, ‘Kai kang tym ali y ryrei ly hini hawi ka-pai so u,’ napi.

¹⁴Na i py mymy i khumichi ly ni ai niu ngai y i, ‘Hini khumi ai ly kaichi ai peang ai nai ngai y,’ napi ai nai kangkhym y savai pato.

¹⁵“Naibaly hina nai ne; mymy ly pri peang ai nai nga iy ali teang baly, my i miseaung tangka pei naichi ai kangpeung majirei nga mo, nanai pany ai nai palau hai.

¹⁶Naibaly kangman keh nai ly jeu i, ‘Areng, nang i muku tangka ly horei peung na a,’ napi.

¹⁷Naibaly mymy ly ni teng y, ‘Miseaung kahawi, nang i sa nai hawi mang; maiden chy naira y ka-ym awm nai deaungkho y avang horei y peang,’ napi.

¹⁸Naibaly huni bo i leaungrei ang jeu iy, ‘Areng, nang i muku tangka ly pangrei peung na a,’ napi.

¹⁹Naibaly mymy ly ni ai py, ‘Nang py avang pangrei y peang,’ napi.

²⁰Naibaly khumi takhra ang jeu bi i, ‘Areng khen cham, hini nang i muku tangka ly kai nihdan y tapau jojo na a; nang khumi ngang ngang pui nai deaungkho y kang jei;

²¹nang i khai y naira y py nang la lawh reng i, nang i tiu y naira y py nang tyn lawh reng,’ napi.

²²Naibaly ni my ly mymy teng y, ‘Miseaung kahawi ny y nai, nangmy i labeaung theu nai leu y my kang pasum ai. Kai ly khumi ngang ngang pui i, kai khai y naira y py la reng nai, kai i tiu y naira y py tyn reng nai nang pany lo-oh?

²³Huna nabaly ati mana nai y kai i tangka ly ka-pai sa naichi i yhm y khai y lawh? Hunaibalykaimy vawi iy, kangpeung hawi kanga ai nai tla,’ napi.

²⁴Naibaly mymy ahawi i angdo naichi teng y, ‘Ni i muku tangka ly lo pi ly, muku tangka horei awm nai khumi teng y pei,’ napi.

²⁵(Nichi my ly mymy teng y, ‘Areng ni ly muku tangka horei awm ly,’ napi.)

²⁶‘Kang thui pi, awm nai khumi ngierei teng y ly pei panawi ai i, by y nai khumi teng y ly mymy i awm angchi nai py la pi ai.

²⁷Na i py hini kai ai tiu nai keungchi, mychi ai peang ai nai kai ai ngai y nai khumichi ai ly pahawi u ly, kai i mo y padei u,’ nanai,” napi.

²⁸Naibaly huna nai leu thui pajau khala y ly Jerusalem mang y chei kalau nai mymy ly mo mang y tako.

²⁹Naibaly hina nai ne, mymy ly Olive mawi napi naira y Bethphaki hawi Bethani avang ahawi y tym iy, abangnaichi theung i leaung nyhrei ai pato i,

³⁰“Nangni i mo kataw i avang y chei hawi ly, hu y nangni kun hawi angchei nai kha y keaungngo kano kasau cho pakheng nai, ami py atang vai y nai niu hawi ai mang; huni ai su hawi ly, pahawi hawi.

³¹Naibaly ami py, ‘Tuni ly ati sa ai nai su hawi vui mo?’ nanai ang deng baly, ‘Areng my aly awm,’ tapi,” napi.

³²Naibaly pato nai nini ly chei hawi i, myni teng y thui naikamta khypkhyp niu hawi.

³³Naibaly nini ly keaungngo kano kasau ai su nai thym khala y yhmkeung my ly nini teng y, “Keaungngo kano kasau ly ati mana ai nai su hawi vui lawh mo?” napi.

³⁴Naibaly nini my ly, “Areng my aly awm,” napi.

³⁵Naibaly Isu teng y pahawi hawi i, keaungngo kano kasau tlang tleaung y myni i kanih bai iy, Isu ai atang hai.

³⁶Naibaly mymy i chei ai nai lam y mychi i kanih bai u prei.

³⁷Naibaly mymy ly tym ai kasa nai kha y Oliv mawi lem ai nai khala y ly, abangnaichi khumi mipui neang neang my ly ati rengrang sa nai bawibawi niu nai deaungkho y kawn i, tao pajeng parai pa-rei,

³⁸“Areng i amyn y jeu nai Samrang ly taham hawi; kani pri mang y aly nai leu tym sy, salo kangteng y ly nang parai nai awm sy,” nanai Tameuh ai palo bo.

³⁹Naibaly khumi mipuichi theung y Pharisai phyreichi ly mymy teng y, “Sara awi, nang teng y abangnaichi ai ly parip ba,” napi.

⁴⁰Naibaly ni my ly, “Kang thui pi hinichi my thui y baly lengseaungchi my aeu ai,” nanai pathang.

⁴¹Naibaly tym ai nai takengkei khala ly avang niu i vo hai i,

⁴²“Aw nang ly, vai hini sala y awmnem ai nai leu ly pany tanga i khyly! Na i py vai ly nang niu y ai nai heu pi veng bo.

⁴³Nang ai tiu naichi ly nang ahawi y apai sa iy ang katanmeuh ai i, nangchi theu thai y ai nai ang awm pi khyp ai.

⁴⁴Nang theung i nang i chanauchi hawi nangmy ai py khaileaung y athorei my aphi ai i, nang theung i lengseaung tleangleang nai ha py ang khai ai ny y; nang ly ang de nai neng khala nang pany y nai deaungkho y; huna nai kani ly nang i tlang tleaung y ang tym ai,” napi.

⁴⁵Naibaly achura yhm kalen pui y kun iy atiti jo nai keungchi ai patheu amteaung i nichi teng y,

⁴⁶“Kai i yhm ly chiu sa nai yhm ne ai, nanai tajiu nai awm, na i py nangchi my ly damrachi i tapiu y palawn u lawh,” napi.

⁴⁷Naibaly mymy ly kani tleirei achura yhm kalen pui y patiu reng. Naibaly pathyp pi nai keung kalenchi hawi, Reita patiu nai keungchi hawi, khumi mipuichi theung i miteaung kehchi ly mymy ai tama hai ai nai sai hau u.

⁴⁸Na i py khumi mipuichi my ly mymy i leu hawihai tangai nai deaungkho y sa ai nai sai ngo u y.