Read Khumi Chin LUKA 20 Bible Online

LUKA 20 - Khumi Chin bible

LUKA 20

¹Naibaly kanirei nai ly hina nai ne, mymy ly achura yhm kalen pui y khumichi ai patiu nai hawi, Satang Kahawi thui pi nai khala y pathyp pi nai keung kalenchi hawi Reita patiu nai keungchi ly miteaung kehchi hawi mymy teng y tym miu; naibaly nichi ly mymy teng y,

²“Hini nang i atitichi sa nai ly ami i leu y sa nai mo? Ami my leu ang pei nai mo? Thuipi,” napi.

³Naibaly mymy ly nichi teng y, “Kai py leu sairei kang deng teang ai: kai ai thui pi teang ba;

⁴Johan i baptis sa nai ly kani pri mang i nai a, khumi i nai a?” nanai pathang.

⁵Naibaly nichi ly adawn u i, “Kani pri mang i nai,’ napi baly ‘Ati mana nai y mymy i leu ym u y lawh?’ ang napi ai.

⁶Naibaly ‘Khumi i nai,’ napi baly khumi bawibawichi my kaichi ai lengseaung y aphi ai; Johan ai ly amo ne, nanai ym vui nai y,” napi.

⁷Hunaibaly nichi ly, “Ma mang i nai mo kaichi pany y,” nanai pathang.

⁸Naibaly Isu my nichi teng y, “Kai py hini kai i atitichi sa nai ly ami i leu y sa nai mo, nanai kang thui pi y leang,” napi.

⁹Naibaly mymy ly khumichi teng y hini pata nai leu thui amteaung i, “Ami mo kreip akho sa i kry nai keungchi teng y hlau ai nai vang pei iy, kra rawm ai nai pri takhra y chei vui.

¹⁰Naibaly neng khala y ly kreip akho i athai ly mymy i vui pei ai nai kry nai keungchi teng y miseaung leaungrei ai pato; na i py kry nai keungchi my ly ni ai pakhau iy, kiu ka-keu my ali hai teang veng.

¹¹Naibaly mymy ly miseaung takhra ai pato bi i, nichi ly ni ai py pakhau i, angji ngailai pa-rei my sa iy kiu ka-keu my ali hai teang bo.

¹²Naibaly pa-thom pato taleang bi i huni ai py nichi ly tamo pei iy aphi vui bi.

¹³Naibaly kreip akho keung my ly, ‘Mana sa hawi mo hi ly? Kai i chapo ngai keh nai ai pato ai khyh bo; ni ai ly tahm khai ai ngaw khyh,’ napi.

¹⁴Na i py kry nai keungchi my ni ai niu baly, ‘Hini ly yhmtheaung kamtym ne: achi ly ni i yhmtheaung amtym thai ai nai padei u sina,’ nanai arum u.

¹⁵Hunaibaly nichi ly kreip akho i dengdairei ni ai patheu praw i, padei vui bo. Hunaibaly kreip akho keung my ly nichi i tlang tleaung y mana mana sa ai mo?

¹⁶Mymy ly jeu ai i, huni akho kry nai keungchi ai ly tama hai vui iy, kreip akho ly khumi takhrachi teng y au ai,” napi. Naibaly nichi ly huna nai thai iy, “Huna tanrei kaau ly tym moh sy,” napi.

¹⁷Na i py mymy ly nichi ai khen iy, “Tumbaly hini leu tajiu nai ly ati mo? ‘Yhm sa nai keungchi i lengseaung ngai y nai ly, Huni kypkyp ly taki i lengseaung avo keh nai palawn bo,’ nanai ly.

¹⁸Ami py huni lengseaung tleaung y atlym nai ngierei ly kawi phiu ai i, ami ai py ti krup ipsaly dei piupa ai,” napi.

¹⁹Naibaly huni neng khyp khala y ly reita patiu nai keungchi hawi, pathyp pi nai keung kalenchi my ni ai patiu ai nai sai hau u; na i py khumi mipuichi ai jei, huni pata nai leu ly mymychi ai padeang’ nai leu ne, nanai pany.

²⁰Naibaly mymy ai ly aripeng i tara chih naira y hawi, aly peang naira y au thai ai nai, mymy i leu thui tamang naira amo jo ai nai, khen paryp nai khumi, khumi kahawi kamta awm hyp veng naichi ai py pato.

²¹Nichi my ly mymy teng y, “Sara, nang ly leu meitang khyp naimy thui py thui, patiu py patiu, ami ai py patle takhra lawh y naimy, Tameuh i lam y py leu meitang khyp naimy patiu reng, nanai kaichi pany.

²²Kaichi ly Kaisara teng y akeu pei nai ly pei ngau a pei ngau y a?” nanai deng.

²³Na i py mymy ly nichi i deng tapawp nai sai pany i nichi teng y,

²⁴“Pia vui pangrei nai tangka cho kai ai patei u cham.

²⁵Hini i myn hawi amyn ly ami i mo?” napi. Naibaly nichi my ly, “Kaisara i,” napi. Naibaly ni my ly nichi teng y, “Ne nabaly, Kaisara i atitichi ly Kaisara teng y pei u ly, Tameuh i atitichi ly Tameuh teng y pei u bei,” napi.

²⁶Hunaibaly nichi ly khumi mipuichi i mo y ni i leu thui tamang naira y patiu ai nai ngo y iy, ni i pathang nai ly lyh parai i sai py katheu y.

²⁷Naibaly angthau bi ai nai by y, nanai Saddukaichi theung i amichi mo ly mymy teng y chei u i ni teng y,

²⁸“Sara awi, Mosi my, ‘Ami py ni i amjo amnau my aju la i chanau so y naimy dei sy, ni i amjo amnau i aju tavau ai la iy, ni i amjo amnau i vui ti ampreng pi ai nai tla,’ nanai tajiu nai awm.

²⁹Naibaly amjo amnau leaung saryhrei awm i chalu ly aju la iy chanau so y naimy dei vui.

³⁰Pa-nyh nai my ly ni ai la; pa-thom nai my py la ryp bi;

³¹hunai kamta teang leaung saryhrei ly ha py chanau so y naimy dei bebe.

³²Huni bo y ly huni neampachy py dei.

³³Hunaibaly angthau bi nai kha y ly nichi theung y mani i aju lawn ai mo? Nichi leaung saryhreichi ly ni ai pom be bo,” napi.

³⁴Naibaly Isu my nichi teng y, “Vai deung kangthauchi ly apom py apom, apom ai nai py deaung paseng:

³⁵na i py huni pri y hawi, kadeichi theung i nai angthau bi naira y abawi ai ataing ai naichi ly apom py apom y, apom ai nai py deaung paseng y;

³⁶nichi ly dei py dei ali thai y leang bo; nichi ly kani pri i amtaw thau naichi kamta tanrei awm; nichi ly angthau bi nai chanau lawn nai deaungkho y Tameuh i chanauchi ne.

³⁷Na i py khumi kadeichi ai pathau bi ai, nanai Mosi my py Areng ai ly, ‘Abraham i Tameuh, Isaka i Tameuh, Jakob i Tameuh,’ nanai amyn pathi nai khala y lymlo kangpho y pany hai khyp.

³⁸Mymy ly kadeichi i Tameuh ny y leang, kanghengchi i Tameuh teu; mymy deaungkho y bawibawichi ly heng bebe veng,” napi.

³⁹Naibaly Reita patiu nai keung amichi mo ly, “Sara, nang i thui nai teng khyp mang,” nanai pathang.

⁴⁰Naibaly nichi ly leu takhra deng ali ai nai vam y bo.

⁴¹Naibaly mymy ly nichi teng y, “Krista ly Davida i chapo ne, nanai ly ati mana nai thui nai sai mo?

⁴²Sam cha-iu y ly Davida kypkyp my ly, ‘Areng ly kai i Areng teng y,

⁴³Nang i paleung ka-echi ai ly nang i kheu khai naira kapalawn y ryrei ly Kai i lamtang mang y ateh napi be, napi.

⁴⁴Hunaibaly Davida my ly ni ai Areng napi lawh baly, mana nai ni i chapo ne thai ai mo?” napi.

⁴⁵Naibaly khumi bawibawichi i ka-thai y mymy ly abangnaichi teng y, “Reita patiu nai keungchi teng y ly amkym u; nichi ly baichu kangjiu pachiu iy pavai nai ngai lawh,

⁴⁶seng meingtym y nichi ai chiu nai hawi, achura yhm y tahm asang keh nai atehra hawi, pawi sa naira y tahm asang keh nai meingtym py ngai parai lawh.

⁴⁷Nichi ly neampachy lumaichi i yhmtheaung cha pi, naibaly tapawp ai nai tau nai kra parai pa-rei my chiu sa u lawh: hunichi ai ly pasum nai tleaung y pasumra ai,” napi.