Read Khumi Chin LUKA 21 Bible Online

LUKA 21 - Khumi Chin bible

LUKA 21

¹Naibaly mymy ly angdeang i khumi kanangchi my ly khai achu naira y mymychi atiti pei pala nai thym khala y niu.

²Naibaly neampachy lumai kamawn teichy ami mo pia nyhrei pala nai py niu.

³Hunaibaly mymy ly, “Meitang khyp kang thui pi, hinichi bawibawi tleaung y py hini neampachy lumai kamawn teichy i pala nai nawi keh.

⁴Hunichi bawibawi ly pasym nai theung i kamlai talam nai ne; hini naini asawi aem nai theung i apacho ai naira bawibawi pala keih na ly,” napi.

⁵Naibaly amichi mo achura yhm kalen pui i lengseaung hawi parai nai hawi, atiti pei achu iy ka-pu palum nai sai thui nai thym khala y ni my ly,

⁶“Nangchi i hini atiti niu nai ly panawi y nai lengseaung tleangleang nai ly hi y ha py awm ai ny y; huna nai kani tym ai,” napi.

⁷Naibaly nichi my ly mymy teng y, “Sara, huni atitichi ly mana khala y tym ai mo? Huni atitichi tym ai nai kasa khala y ly ka-ma-ra ati awm ai mo?” nanai deng.

⁸Naibaly ni my ly, “Nangchi ai ang tapawp y ai nai tau tleaung y awm u; ati mana nai mo na balykhumi neangneangchi my, ‘Kai ne he,’ ‘Neng ang tym bo,’ nanai kai i amyn angam nai ang jeu ai; nichi teng y ly abang u moh.

⁹Naibaly atiu nai leu hawi, khrukhrala nai satang nangchi thai nai khala y ly jei u moh: hunichi ly tym man ai nai angchi yb teu, tem ai naira naini tym ryp ai nai ny y leang rai,” napi.

¹⁰Naibaly mymy ly nichi teng y, “Cheng takhra hawi cheng takhra atiu ai i, pri takhra hawi pri takhra atiu ai.

¹¹Kaleih py khri pa-rei theu ryry ai i, meingtym takhra takhra y takang py theu ai, no nai michi py aki ai, kani mang i dengdairei atiti ka-jei awm naichi hawi ka-ma-ra lyh parai tlai naichi py awm ai.

¹²Na i py huni atiti bawibawi tym y rai khala y nangchi ai ang patiu ai i, achura yhm y hawi, theaung y py ang hawi ai, kaimy i amyn deaungkho y samrangchi hawi miteaung kehchi i mo y ang hawi ai.

¹³Huni ly nangchi ai eaung naira nga hai ai.

¹⁴Naibaly nangchi i tlau ai nai leu dawn u rym y ai nai, nangchi i paleung hawihai khaw u.

¹⁵Nangchi i paleung ka-e bawibawichi my paka iy ei thai y ai nai, labeaung hawi cheng naira kang pei ai.

¹⁶Naibaly ngamhm ngampochi, misochi, ahawichi my py ang patiu hai ai i, nangchi theung y phyreichi ai ly ang padei hai ai.

¹⁷Kaimy i amyn deaungkho y khumi bawibawichi my nangchi ai niu ngai y ai.

¹⁸Na i py nangchi i sam amairei py tamo y leang mang.

¹⁹Nangchi i kham pajau naira my ly nangchi i hengra ai ly lawi hai ai.

²⁰“Na i py nangchi ly tavaimichi my Jerusalem avang y katanmeuh nai niu khala ly, huni ly tama ai bo, nanai pany u.

²¹Huna nai khala y ly Judai pri i kaawmchi ly mawi y preang u pawn sy; huni theung y awm naichi py theu u pawn sy; daichi y awm naichi ly huni theung y kun u moh sy.

²²Satang tajiu nai bawibawi ly tym thai ai nai, huni kani ly vawitheung tha nai kani ne.

²³Huni kani y ly khaileaung pri y khrikhri pa-rei kamtang tym ai nai hawi, hini chengchi i tlang tleaung y kado theu nai tym ai nai deaungkho y py, deaungdi aniu naichi hawi deaungdi kanu kanei naichi ly taham si ai.

²⁴Naibaly nichi ly haisau bo y dei ai i, cheng cheaungkhangchi teng y miseaung y hawi ai; naibaly Cheng Takhrachii neng angym y ryrei ly Cheng Takhrachi my Jerusalem ai ly chiu nai tli ai.

²⁵Naibaly kanito y py, lo y py ka-si y py ka-ma-ra awm ai, pangli tui kamsau hawi, tui sampyh len nai deaungkho y khaileaung pri y py cheng cheaungkhangchi teng y patang naira hawi, paleung bi naira py tym ai;

²⁶khumichi ly jei nai hawi, khaileaung pri y atiti tym ai nai dawn nai deaungkho y dei vi dei vi ai; kani mang i atiti sa thai nairachi ai py ang hyn hai ai.

²⁷Huna nai khala y ly Khumi i Chapo ly atiti sa thai naira hawi, khri pa-rei nang parai naira hawi khupanym theung y jeu nai niu u ai.

²⁸Naibaly hina nai atitichi tym angchei nai khala y ly khen u kalau ly, angdeang u, ati mana nai mo nabaly nangchi ai atleu ai naira ly kasa nai bo,” napi.

²⁹Naibaly mymy ly nichi teng y pata nai leu thui i, “Thaidu keung hawi, dengkeaung bawibawi ai khen u;

³⁰sai ang pho bo nabaly huni ly nangchi niu i nisa theu ai bo, nanai nangmychi my pany.

³¹Hunai kamta teang, nangchi py hina naichi tym nai niu khala y ly Tameuh i peang nai ly kasa bo, nanai pany u.

³²Meitang khyp kang thui pi, hinichi bawibawi tym angym y ryrei ly vai deung i kangthauchi ly tamo y ai.

³³Kani khaileaung ly tama ai i, kai i leu ly tamo y ai.

³⁴“Na i py tau tleaung y awm u, ti y baly cha nai kajeu kawi ala nai hawi, mhm pavui nai hawi, heng nai sala y awm nai sai dawn nai hawi nangchi i paleung y kawi ala ai i, huni kani y ly deaung man nai kamta tlenrei khyh my nangchi i tlang tleaung y tym miu lawh na.

³⁵Hunai kamta khyp khaileaung tleaung i awm nai bawibawichi teng y ly tym ai.

³⁶“Hunaibaly huni atiti tym ai nai bawibawi ly nangchi lawi ai ataing ai nai hawi, Khumi i Chapo i mo y angdo ai ataing ai nai py, mana khala y py chiu sa nai tarawi y ajeng u paryp,” napi.

³⁷Naibaly mymy ly kani tleirei achura yhm kalen pui y patiu iy, vum tleirei theu i Olive mawi napi naira y jei.

³⁸Naibaly mymy i leu tangai ai nai khumi bawibawichi ly khawn angthodyh y achura yhm kalen pui y ni teng y chei reng.