Read Khumi Chin LUKA 22 Bible Online

LUKA 22 - Khumi Chin bible

LUKA 22

¹Naibaly tako angbo abawi y nai, Katlen Vui nai pawi napi nai ly kasa bo.

²Naibaly pathyp pi nai keung kalenchi hawi, Reita patiu nai keungchi my ly khumi mipuichi ai jei nai deaungkho y mymy ai padei ai nai sai hau ryry.

³Naibaly Setan my holai nyhreichi theung y abawi nai Juda, Iskariota napi nai i taku theung y kun iy,

⁴ni ly chei i nichi teng y mymy ai patiu hai thai ai nai pathyp pi nai keung kalenchi hawi, tavaimi luchi hawi ka-vo arum.

⁵Hunaibaly nichi ly khri pa-rei kawn i tangka pei ai nai adeu.

⁶Naibaly ni ly avo napi iy, khumi mipuichi by y nai sala y mymy ai patiu hai ai nai sai ka-vo hau ryry.

⁷Naibaly tako angbo abawi y nai kani, Katlen Vui nai pawi y beram cho apathyp ai nai kani ly tym i,

⁸Isu my Petera hawi Johan ai ly, “Achi ly Katlen Vui nai pawi cha thai ai nai pawi ba,” nanai pato.

⁹Naibaly nini my ly ni teng y, “Ma mang y pawi ai nai ngai mo?” napi.

¹⁰Naibaly mymy ly nini teng y, “Khen cham, nangni ly avang y kun hawi iy, neampacho leaungrei kacheang y tui apu nai avum hawi ai mang, ni i kun nai yhm y phai abang ly, kun hawi ba.

¹¹Naibaly yhmkeung teng y ly, ‘Sara my, Kai teng y abangnaichi hawi Katlen Vui nai pawi kacha ai nai angvyn i awm naira sambeu ly ma mang y mo? ang napi,’ tapi ba.

¹²Hunaibaly mymy ly salo i sambeu kau parai nai, vawn awm angchi nai ang patei ai mang; hu y pawi hawi rym,” napi.

¹³Naibaly nini ly chei hawi i myni teng y thui nai ka-tawm khyp my niu hawi, naibaly Katlen Vui nai pawi pawi hawi rym.

¹⁴Naibaly neng khala y ly mymy ly biu o i abangnaichi py o hai teang.

¹⁵Naibaly mymy ly abangnaichi teng y, “Kai ly atiti patang y rai khala y hini Katlen Vui nai pawi kang cha hai ai nai khrikhri pa-rei ngai bo.

¹⁶Kang thui pi, hini ly Tameuh i peang naira y angym y ryrei ly kai cho ali y leang bo,” napi.

¹⁷Naibaly mymy ly khau la iy kawn nai leu thui pajau baly, “Hini lo u ly, amji u; kang thui pi,

¹⁸Tameuh i peang nai tym y ryrei ly vai i dengdairei kreip angjyn athai hang ly kanei ali y leang bo,” napi.

¹⁹Naibaly mymy ly tako la iy kawn nai leu thui pajau baly theng baw theng baw iy nichi teng y pei i, “Hini ly kai i ngan, nangchi i vui pei nai ly: kai ai pany jo ai nai hini ly so u jojo,” napi.

²⁰Naibaly dym biu cha pajau nai bo y hunai kamta teang khau la iy, “Hini khau ly kai i thi y leu maikawm kangtha ne, nangchi i vui theu nai ly.

²¹Na i py khen cham, kai ai patiu hai ai nai keung i kiu ly kai i ahawi y sabawi tleaung y awm.

²²Thui yb nai kamta Khumi i Chapo ly chei takengkei ai, na i py ni ai patiu hai ai nai keung ly taham si!” napi.

²³Naibaly nichi my, “Kaichi theung y huna nai sa ai nai ly ami mo?” nanai adeng u.

²⁴Naibaly mymychi theung y len keh naira y ami ai khai ai mo, nanai aei naira theu bo.

²⁵Naibaly mymy ly nichi teng y, “Cheng Takhrachi i samrangchi ly mymychi i tlang tleaung y areng lawh; mychi tleaung y aly peang nai keungchi ly Amhm Ampo napi lawh.

²⁶Na i py nangchi ly hunai kamta ny y leang; nangchi theung y len kyh nai khumi ly deaungdi kyh nai kamta awm sy: areng keh nai khumi ly kalop amsi nai keung kamta awm lawh sy.

²⁷Ami len keh mo? Biu o nai keung a, kalop amsi nai keung a? Biu o nai keung ny y lawh a? Na i py kai ly nangchi theung y kalop amsi nai keung kamta awm ly.

²⁸Kai ly parawi naira avum nai sala ryrei ly kai ai awm hai nai keung nangchi ne;

²⁹hunaibaly kai i peang naira y kai i sabawi y nangchi cha nei thai ai nai,

³⁰Ngaai my kai ai peang naira ang sa pi rym nai kamta, peang naira kang sa pi rym mang:hunaibaly Israela cheng holai nyhreichi ai tara chih pi nai areng atehra y nangchi ateh ai.

³¹“Simon, Simon, khen cham, setan my choh alai nai kamta alai thai ai nai nangchi ai ang hnei na a;

³²na i py nang i ym naira phra y ai nai chiu kang sa pi bo; nang ly hi ali teang nai khala y ly nangmy i amjo amnauchi ai khaw hai ba,” napi.

³³Naibaly ni my ly mymy teng y, “Areng, nang teng y ly theaung y hawi, dei naira y py chei teang ai nai kavam na a,” napi.

³⁴Naibaly mymy ly, “Petera, kang thui pi, nang ly kai ai pany y, nanai kai ai tlen thomrei apha y ryrei ly vaini a kheaung ai ny y,” napi.

³⁵Naibaly mymy ly nichi teng y, “Tangka yh hawi, jibo hawi, phainai hawi syn y naimy kang pato nai khala y ly atiti avaw u a?” napi. Nichi my ly, “Avaw y leang,” napi.

³⁶Naibaly mymy ly nichi teng y, “Na i py vai ly ami py tangka yh hawi jibo hawi awm baly syn sy, ami py haisau by y baly kanih jo iy van sy.

³⁷Kang thui pi, ‘Ni ai ly khumi kamngochi theung y kati tabawi bo,’ nanai tajiu nai ly kai i tlang tleaung y tym ai nai tla: kai i satang ly angym be ai bo,” napi.

³⁸Naibaly nichi my ly, “Khen cham Areng, hi y haisau nyhrei awm,” napi. Ni my ly, “Hawi bo,” napi.

³⁹Naibaly mymy ly theu iy mymy i reita kamta Olive mawi y chei i abangnaichi py abang teang.

⁴⁰Naibaly mymy ly huni meingtym y tym baly, “Parawi naira y kun u y ai nai chiu so u,” napi.

⁴¹Naibaly mymy ly lengseaung aphi nai ka-pho ryrei mo ra y chei takhra i,

⁴²kheukhu di iy chiu sa i, “Ngaai, nangmy avo nabaly hini khau ly kai teng i nai tasyh pi kyh ba; na i py kaimy ngaingai ny y naimy, nangmy ngaingai phai ne sy,” napi.

⁴³Naibaly kani pri mang i dengairei kani pri i amtaw thau nai leaungrei ly ni ai amcheng hai ai nai mymy teng y amteng.

⁴⁴Naibaly mymy ly khrikhri pa-rei phailo seaung i, chiu sa patyp bi, naibaly mymy i ka-ui ly thi amai len parai nai kamta khaileaung y leaung.

⁴⁵Naibaly mymy ly chiu sa pajau iy angthau i abangnaichi teng y chei: nichi ly paleung mawn nai deaungkho y i ngym nai niu i mymychi teng y,

⁴⁶“Ati mana nai i ngym lawh? Nangchi parawi naira y kun u y ai nai angthau u ly, chiu so u,” napi.

⁴⁷Naibaly mymy ly thui nai thym khala y khen cham, khumi mipuichi ang jeu i, holai nyhreichi theung i Juda napi nai ly mo mang y tako; naibaly pachawm ai tau nai tapai.

⁴⁸Na i py Isu my ly ni teng y, “Juda, Khumi i Chapo ai ly pachawm iy patiu hai ai nai lo-oh?” napi.

⁴⁹Naibaly mymy ahawi i khumi my ly atiti tym ai nai ly pany i, “Areng, kaichi ly haisau hawi ateng ai a?” napi.

⁵⁰Naibaly nichi theung y ami my mo pathyp pi nai keung kalen keh i miseaung ai ly ateng i, lamtang mang i kano sei thlau vui.

⁵¹Isu my pathang i, “Tuna tanrei hawi bo,” napi iy, ni i kano y nam iy hawihai teang bo.

⁵²Naibaly Isu ly mymy teng y jeu nai pathyp pi nai keung kalenchi hawi, achura yhm kalen pui tavaimi luchi hawi, miteaung kehchi teng y py, “Haisauchi hawi thengbeangchi hawi syn iy, damra ai patiu ai nai ka-tawm theu u nai lo-oh?

⁵³Kai ly nangchi teng y achura yhm kalen pui y kani tleirei awm nai khala y ly kai ai patiu ai nai tau u y pui be: na i py vai ly nangchi i neng py ne, kaveng my aly peang nai i neng py ne teang,” napi.

⁵⁴Naibaly ni ai patiu iy pahawi i, pathyp pi nai keung kalen keh i yhm y pakun; na i py Petera ly kamlo dengdairei hui pajyh.

⁵⁵Naibaly nichi ly lyum y mai liu iy ateh achu i, Petera py nichi theung y ateh teang.

⁵⁶Naibaly ni ly mai kangvang y ateh nai thym khala y anglo ami mo ni ai niu i khen ryry iy, “Hini khumi py mymy teng y awm nai teang na a hi ly,” napi.

⁵⁷Na i py mymy ly, “Lo awi, kai ly ni ai ly pany y leang,” nanai apha.

⁵⁸Naibaly tanarei kha y ly khumi takhra my ni ai niu bi i, “Nang py nichi theung i khumi teang na a tu ly,” napi. Petera my ly, “Nai awi, kai ny y leang,” napi.

⁵⁹Naibaly nari harei mo khala y khumi takhra my, “Hini py mymy teng y awm nai khyp bo: Kalili pri i khumi teang ly,” napi akhikan.

⁶⁰Petera my, “Nai awi, nang i leu thui nai ly kai pany y ly,” napi. Naibaly tlenrei khyh my ni ly leu katheu thym khyp khala y a kheaung ryp bo.

⁶¹Naibaly Areng ly amhi iy Petera ai khen. Naibaly Areng my ni teng y, “Vaini ly a kheaung y rai kha y nangmy kai ai tlen thomrei apha ai,” napi nai leu ly Petera my adawn vau ryp bo.

⁶²Naibaly ni ly theu iy vo ryry.

⁶³Naibaly Isu ai patawn nai keungchi ly mymy ai panui py panui hai, pakhau py pakhau.

⁶⁴Naibaly mymy i mei y ly bam iy, “Nang ai ami my pakhau mo? Thuipi!” nanai deng u lawh.

⁶⁵Leu takhra neangneang py thui tamawn iy jo u.

⁶⁶Naibaly khutawi bo nabaly mipuichi i miteaung kehchi, pathyp pi nai keung kalenchi hawi Reita patiu nai keungchi py achu; naibaly mymy ai nichi i tara chih nai keungchi teng y pahawi i,

⁶⁷“Nang Krista ne khyp baly kaichi ai thui pi,” napi.

⁶⁸Naibaly mymy ly nichi teng y, “Kangthuipi i py nangchi ym ai ny y leang:deng i py nangchi pathang ai ny y leang.

⁶⁹Na i py vai i dengdairei Khumi i Chapo ly Tameuh i atiti sa thai naira i lamtang mang y ateh ai bo,” napi.

⁷⁰Naibaly nichi bawibawi my ly, “Nang ly Tameuh i Chapo ne khypkhyp a?” napi.

⁷¹Mymy ly nichi teng y, “Nangchi my ne khyp, nanai pathi bo,” napi. Naibaly mymychi ly, “Pany ai naira takhra ati ngai jau mo? Mymy i labeaung i theu nai achi my pany khyp veng jau chy bo,” napi.