Read Khumi Chin LUKA 23 Bible Online

LUKA 23 - Khumi Chin bible

LUKA 23

¹Naibaly achu naichi bawibawi ly angthau iy Isu ai Pilata teng y pahawi u.

²Naibaly nichi ly, “Hini khumi ly kaichi i cheng ai taphra ai nai Kaisara teng y akeu cheaung ai nai py paka i, Krista, samrang amlawn, nanai kaichi pany,” nanai seu amteaung bo.

³Naibaly Pilata my ly ni teng y, “Nang ly Judachi i samrang ne a?” nanai deng. Naibaly mymy ly ni teng y, “Nang ly thui khyp bo,” nanai pathang.

⁴Naibaly Pilata my ly pathyp pi nai keung kalenchi hawi, khumi mipuichi teng y ly, “Hini khumi i tlang tleaung y ly ati sai py hawi y naira kaniu y leang,” napi.

⁵Na i py nichi my ly, “Ni ly Kalili pri y amteaung iy, hini meingtym y tym pa-rei Judai pri verei y patiu i, khumi bawibawichi ai khrukhra hai,” napi nai ty ra.

⁶Naibaly Pilata ly hina nai thai iy, ni ly Kalili pri i khumi ne mo, ny y mo, nanai deng.

⁷Hunaibaly Heroda i ka-peang i khumi ne, nanai pany i Heroda teng y pato bo; hunai thym khala y ly ni py Jerusalem y awm teang.

⁸Naibaly Heroda my Isu ai niu baly khrikhri kawn na, mymy i satang thai nai deaungkho y kra parai nai dengdairei mymy ai niu ai nai ngai parai jojo, atiti mo sairei rengrang sa nai niu ai nai athang khai.

⁹Naibaly mymy ly leu neangneang deng, na i py ni ly ati sai py pathang y.

¹⁰Naibaly pathyp pi nai keung kalenchi hawi, Reita patiu nai keungchi ly angdo iy khrikhri pa-rei seu bi.

¹¹Naibaly Heroda hawi my i tavaimichi ly ni ai tahm khai y i panui hai: naibaly kanih vang kateng akhiu hai iy Pilata teng y pato bi bo.

¹²Naibaly huni kani y ly Heroda nini Pilata ly ado bo, ti y rai khala y ly ado y.

¹³Naibaly Pilata ly pathyp pi nai keung kalenchi hawi, miteaung kehchi hawi, khumi bawibawichi ai palau achu i nichi teng y,

¹⁴“Khumichi ai taphra piupa nanai, hini khumi ai ly kai teng y nangchi my tha nai he, naibaly khen cham, nangchi i mo y kaimy ni ai chih i, nangchi i seu naira y ly hini khumi i tlang tleaung y ati sai py tamang naira kaniu y leang.

¹⁵Ne, Heroda py niu y leang, kaichi teng y ang pato lawh bi nai teu; khen cham, dei ai nai ataing na pa-rei ati sai py so y leang.

¹⁶Hunaibaly kaimy chip ai i patheu ai,” napi.

¹⁷[Mymy ly pawi kani y ly theaung y tla nai leaungrei ai patheu ai nai tla.]

¹⁸Na i py tlenrei khyh my vanrei aeu i, “Hini khumi ai lo la, Barabba ai phai patheu pi,” napi.

¹⁹(Ni ly avang y ati mo damra sa nai deaungkho y hawi, khumi ai padei nai deaungkho y theaung y tla bo.)

²⁰Pilata my ly Isu ai patheu ai nai ngai i mymychi teng y leu thui bi, na i py nichi ly aeu u i,

²¹“Kraws tleaung y tahen, kraws tleaung y tahen,” napi.

²²Naibaly ni my ly tlen thomrei naira y ly nichi teng y, “Ati na i bo? Ati tamang naira awm mo? Dei ai ataing na pa-rei mymy i tlang tleaung y ati sai py kaniu y be: hunaibaly ni ai chip iy patheu ai bo,” napi.

²³Na i py nichi my ly athorei my kraws tleaung y tahen ai nai takeng tanga. Naibaly nichi raawi my pajau bo.

²⁴Naibaly Pilata my ly nichi i hnei nai kamta sa ai nai leu patlym bo.

²⁵Naibaly damra sa nai hawi, khumi ai padei nai deaungkho y theaung y tla nai ai ly mymychi i hnei nai kamta patheu pi bo; na i py Isu ai ly mymychi ngaingai ana ai nai au bo.

²⁶Naibaly nichi ly ni ai pahawi nai thym khala y Simon, Kurini avang i khumi, daichi mang i dengdairei jeu nai ai patiu i, Isu i nithun mang y tako iy apu pi ai nai, mymy i tlang tleaung y kraws neang bo.

²⁷Naibaly khumi mipui ka-teng ny y nai hawi, neampachychi paleung y atum iy vo ryry naichi hawi ni teng y abang.

²⁸Na i py Isu my ly nichi mang y hi iy, “Jerusalem chaniuchi awi, kai ai vo hai y han, nangmychi ai hawi, nangchi i chanauchi i vui phai vo hai u.

²⁹Khen cham, neng tym ai i, huni kani y ly, ‘Neampachy teng naichi hawi, deaungdi aneng vai y nai kajeuchi hawi, deaungdi nei vai y nai kanuchi ly tahm hawi,’ napi ai.

³⁰Hunai khala y ly nichi ly mawi ka-sangchi teng y, ‘Kaichi ai akai hai mawp kyh,’ naibaly mawichi teng y, ‘Kaichi ai tleng hai mawp kyh,’ napi ai.

³¹Dengkeaung kangheng ai malawn py hina tanrei sa baly, kadei ai ipsaly mana tanrei sa ai mo?” napi.

³²Naibaly mymy hawi vanrei padei ai nai takhra leaung nyhrei ai pahawi teang:nini ly khumi kamngo ne.

³³Naibaly Lu Hiu napi nai meingtym y tym i, hu y ly mymy ai kraws tleaung y tahen; khumi kamngo nini ai ly lamtang mang y leaungrei, langvawi mang y leaungrei tahen teang.

³⁴Naibaly Isu ly, “Ngaai nichi ai ly pahen ba, nichi i atiti sa nai ly pany y nai teu,” napi. Naibaly ni i ateaungchi ly amji ai nai tambe va.

³⁵Naibaly khumi mipuichi ly angdo iy angdeang. Naibaly miteaung kehchi my py, “Ni ly khumi takhrachi ai malawn py palawi chy bo; Tameuh i vawi nai Krista ne khyp baly amy ai py apalawi sy bei,” nanai panui hai.

³⁶Naibaly tavaimichi my py panui hai i mymy teng y chei iy, kreip athai hang katho talam pi i,

³⁷“Nang ly Judachi i Samrang ne khyp baly apalawi bei,” napi.

³⁸Naibaly mymy i salo mang y ly, “Hini khumi ly Judachi i Samrang ne,” nanai cha awm.

³⁹Naibaly khumi kamngo tahen nai leaungrei my ly, “Nang ly Krista ny y a? Apalawi ly, kaini ai py palawi bei,” nanai ni ai panui hai.

⁴⁰Na i py takhra leaungrei my ly pathang i, “Nang ly Tameuh ai py jei y nai sai a? Vanrei ngari ang pei nai ly?

⁴¹Na i py ani ly ataing khyp, amyni i hawi y sa nai vang nga nai teu; na i py hini khumi ly ati sa py hawi y sa nai by y,” nanai ni ai jo.

⁴²Naibaly mymy ly “Isu nangmy i peang naira y nang tym khala y kai ai pany jo ba,” napi.

⁴³Naibaly ni my ly mymy teng y “Meitang khyp kang thui pi, vaini ly nang py kai teng y Paradais y awm teang ai mang,” napi.

⁴⁴Naibaly kanithun kha y mo, kani ka-reu khala y khrairei pri veng be i, kani kangvang jum bo.

⁴⁵Naibaly achura yhm kalen pui i kanih jang nai ly sala y asei kra vui bo.

⁴⁶Naibaly Isu ly tao pajeng parai naimy aeu i, “Ngaai, nang i kiu y kai i phailo kang au ba,” napi. Naibaly huna nai thui pajau iy mymy i phailo patlaw bo.

⁴⁷Naibaly tavaimi chungvairei lu ly huna naichi niu i, “Hini khumi ly khumi kahawi ne khyp nai bo, lawi pajau y,” nanai Tameuh ai palo ryp.

⁴⁸Naibaly huni atiti khen ai nai khumi mipui achu nai bawibawichi ly huna nai sa naichi niu i, mymychi i paleung y atum ryry naimy vawi ali teang bo.

⁴⁹Naibaly mymy i meimai pany naichi bawibawi hawi, Kalili pri i dengdairei abang nai neampachychi ly huna nai sa naichi angdeang nai kamlo parai ra y angdo.

⁵⁰Naibaly khen cham, khumi leaungrei amyn ly Josepha, tara chih nai keung, khumi meitang hawi khumi kahawi awm.

⁵¹(Mymychi i tara chih nai hawi atiti sa nai py avo tapi y nai bo.) Judachi i avang Arimathai i khumi ne, Tameuh i peang nai ly tym ai nai athang khai reng nai ne.

⁵²Huni khumi ly Pilata teng y chei iy Isu i veu hnei i,

⁵³la iy kanih mai ka-syn hawi kajawi iy, lengseaung takeu nai angawm, ami ai py up vai y naira y up bo.

⁵⁴Naibaly huni kani ly Sa Rym Nai Kani ne, Anawn Kani py kasa parai veng bo.

⁵⁵Naibaly Kalili pri i dengdairei mymy hawi vanrei jeu nai neampachychi ly hui jojo i, angawm hawiveu up nai sai niu u.

⁵⁶Naibaly vawi u teang iy, atiti mui hawi nai amjychi hawi, rimuichi py sa u rym. Reita kamta anawn kani y kalop so u y nai ne.