Read Khumi Chin LUKA 24 Bible Online

LUKA 24 - Khumi Chin bible

LUKA 24

¹Naibaly nichi ly Anawn Kani y leu pei nai kamta anawn bo, na i py kani saryhrei angchei i kani khutawi y kyh rai khala y nichi ly atiti rimui sa rym naichi ly syn iy, angawm y chei bo.

²Naibaly angawm i lengseaung ly pali vui nai niu u iy, kun i Isu i veu ly niu y pasi lawh.

³Naibaly hina nai ne, nichi ly huna nai y dawn tamang tyh nai thym khala y ly khen cham,

⁴Khumi leaung nyhrei, kanih kangvang alaukau nanai akhiu iy, nichi ahawi y angdo;

⁵naibaly jei nai mymychi i meimai khaileaung y byh nai thym khala y, nini my ly nichi teng y, “Ati mana nai khumi kadei theung y khumi kangheng ai hau u lawh?

⁶Mymy ly hi y by y leang bo, angthau teang bo. Kalili pri y awm nai khala y nangchi teng y leu ang thui pi nai ly pany u ali ba:

⁷Khumi i Chapo ai ly khumi kamngochi i kiu y patiu hai iy kraws tleaung y tahen ai i, kani thomrei kani y ly angthau teang ai nai tla, nanai ly,” napi.

⁸Naibaly nichi ly huni leu adawn vau bi i, angawm i dengdairei vawi teang iy,

⁹Holai hareichi hawi khumi takhra bawibawichi teng y py huni atitichi bawibawi ly thui pi.

¹⁰(Nichi ly Mari Makdalini hawi, Joanna hawi, Jakob i amhm Mari hawi ne; naibaly mymychi teng y neampachy takhrachi py amtaw thau naichi teng y ly huni satang thui pi teang.)

¹¹Na i py nichi ly huni leu ai ly leu rumrang nai palawn i ym pi y.

¹²Na i py Petera ly angthau iy angawm mang y angpreng nai meung iy bih i, kanih mai ka-synchi awm takhra nai niu; hunaibaly atiti awm nai sai ly rengrang tlai ly napi naimy yhm y vawi ali teang.

¹³Naibaly khen cham, huni kani y mychi theung i khumi leaung nyhrei ly avang harei, Emmau napi naira y chei hawi: huni avang ly Jerusalem i dengdairei hlau vui tariurei palo.

¹⁴Naibaly nini ly atiti tym nai bawibawi ly arum hawi prei.

¹⁵Naibaly hina nai ne, nini ly arum nai adeng hawi thym khala y Isu ly nini teng y tapai i, vanrei tako teang bo.

¹⁶Na i py mymy ai ma thai y ai nai nini i mei pali hai veng.

¹⁷Naibaly mymy ly nini teng y, “Nangni tako nai tarawi y arum hawi nai ly ati leu mo?” napi. Naibaly nini ly meimai takhui sui naimy angdo hawi bo.

¹⁸Naibaly amyn Kleopa napi nai my ly ni teng y, “Vai dymkhawn ly Jerusalem y nangmy tlairei awm khyh nai sai a? Vai dymkhawn i hu y atiti awm nai pany y nai keung nang ne a? nanai pathang.

¹⁹Naibaly ni my ly nini teng y, “Ati satang mo?” napi. Naibaly nini ly ni teng y, “Nazaret Isu i satang; mymy ly Tameuh hawi khumi bawibawi i mei ka-niu y leu y hawi atiti sa naira y py amo amyn amthang parai nai ne;

²⁰naibaly pathyp pi nai keung kalenchi hawi, kaichi i meiteaung kehchi py ni ai padei ai nai leu pei nai pahawi nai ly, kraws tleaung y tahen.

²¹Na i py ni ly Israelachi ai lawi hai ai nai keung ne ai nai kaichi ly athang khai parai na iy. Ne, huni khyh ny y i, huni atiti tym nai ly vaini kani pa-thom awm bo.

²²Huni ny y nai py kaichi i kamkawm neampachy amichi mo khawn angthodyh angawm y chei iy kaichi ai paleung khup hai:

²³ni i veu niu y naimy Tameuh i kani pri i amtaw thau naichi amteng nai niu i, nichi my ly, ‘Ni ly heng teang bo,’ nanai thui, napi.

²⁴Naibaly kaichi i kamkawm phyreichi ly angawm y chei i, neampachychi i thui nai kamta khyp my niu, na i py mymy ai ly niu y,” napi.

²⁵Naibaly ni my ly nini teng y, “Khumi cheng y naichi awi! Amochi i leu thui nai bawibawi ym naira y kapawpchi awi!

²⁶Krista ly huna nai atiti patang iy nang parai naira y kun ai nai angchi ny y a?” napi.

²⁷Naibaly Mosi hawi amochi i tajiu nai bawibawi amteaung iy, Tameuh i cha-iu bawibawi y amymy isatang tajiu nai ngierei ly nini ai thui pi pachai bo.

²⁸Naibaly nini i chei ai nai avang y ly tym vi bo i, mymy ly kamlo kyh y chei ai tau nai ka-tawm sa.

²⁹Naibaly nini my ni ai kam i, “Kaini teng y ango ba; kani py pathyp bo, kani py avah ai bo,” napi. Naibaly mymy ly nini teng y anga ai nai kun bo.

³⁰Naibaly hina nai ne: mymy ly nini hawi biu o nai ateh i tako la iy, kawn nai leu thui i theng baw iy nini teng y pei.

³¹Naibaly myni i mei ang vang i ni ai ma ryp bo; naibaly ni ly tama pi ryp veng.

³²Naibaly nini ly “Lam y ani hawi arum nai hawi, Tameuh i cha-iu leu ang thui pi pachai nai thym khala y ly, ani paleung pran ti y a?” na hawi.

³³Naibaly hunai thym khala y ly nini angthau i Jerusalem y ali teang, naibaly holai hareichi hawi nichi i ahawichi ly,

³⁴“Areng ly angthau bi khypkhyp bo; Simon teng y py amteng bo,” napi nai arum achu nai niu.

³⁵Naibaly nini my py lam y atiti tym nai hawi, tako theng baw iy ni ai ma tatang nai sai py thui pi teang.

³⁶Naibaly huna nai leu thui thym khala ly mymy kypkyp my nichi theung y angdo iy, “Nangchi teng y paleung awmnem naira awm sy,” napi.

³⁷Na i py nichi ly khrikhri pa-rei ka-jei awm nai palawn iy jei parai i, phailo ai niu nai dawn.

³⁸Naibaly ni my ly nichi teng y “Ati mana nai paleung bi u mo? Ati mana nai nangchi paleung y dawn nai awm u lawh?

³⁹Kai i kiu kheuchi khen u, kaimy kypkyp chy bo he; kai ai panem ly, khen u cham; nangchi my niu nai kamta phailo ly ngan hawi hiu by y leang,” napi.

⁴⁰Naibaly huna nai thui pajau iy ni i kiu kheuchi nichi teng y patei.

⁴¹Naibaly nichi kawn ala nai ym y asai rai, rengrang tlai napi nai thym khala y mymy ly nichi teng y, “Hi y atiti cha ai nai awm a?” napi.

⁴²Naibaly ngo pangai nai beangrei pei.

⁴³Naibaly mymy ly la i nichi i mei ka-niu y cha bo.

⁴⁴Naibaly mymy ly nichi teng y, “Hini ly kai i leu na a. Mosi i Reita hawi, amochi i cha-iu hawi, sam cha-iu y ly kai i satang tajiu nai ngierei tym ai nai sai, nangchi teng y kai awm nai khala kang thui pi reng ly,” napi.

⁴⁵Naibaly Tameuh i cha-iu leu sai pany thai ai nai mychi i paleung cheng hai bo.

⁴⁶Naibaly mychi teng y, “Krista ly patang ai i, kani thomrei kani y ly kadeichi theung i nai angthau bi ai nai tla;

⁴⁷naibaly mymy i amyn y uikhei ai nai leu hawi, kamngo pahen ai nai leu py Jerusalem y pateaung iy, cheng cheaungkhangchi teng y thui pi ai nai tla, nanai tajiu nai awm.

⁴⁸Nangchi ly huna nai bawibawi pany nai keungchi ne.

⁴⁹Naibaly khen cham, Ngaai i adeu nai ly nangchi teng y kang pato ai; na i py salo mang i dengdairei nangchi ai atiti sa thai naira y amthyp hai y ryrei ly avang y ajeng u jo rai ba,” napi.

⁵⁰Naibaly mymy ly Bethani ahawi y tym pa-rei nichi ai hawi:naibaly mymy i kiu pheu iy nichi ai amtheung hai.

⁵¹Naibaly hina nai ne, amtheaung hai nai thym khala y nichi hawi amprei i, ni ai ly kani pri mangy pahawi kalau veng bo.

⁵²Naibaly ni ai chiu i, khri pa-rei amo theu parai naimy Jerusalem y ali teang bo;

⁵³naibaly nichi ly achura yhm kalen pui y Tameuh ai palo u jojo.