Read Khumi Chin LUKA 4 Bible Online

LUKA 4 - Khumi Chin bible

LUKA 4

¹Naibaly Isu ly Phailo Kachai my kawi i, Jordan tavo dengdairei ali teang;

²naibaly diabola my parawi nai tarawi y daichi ka-vym y Phailo my pahawi nai kani vui palyhrei awm. Naibaly hunai kha y ly mymy ly ati sai py cho y i, kangkhym y ly kajeu alam bo.

³Naibaly diabola my ni teng y, “Nang ly Tameuh i Chapo ne nabaly hini lengseaung ly tako lawn ai nai leu pei bei,” napi.

⁴Naibaly Isu my ni teng y, “Khumi ly tako harei khyh naira y ly heng y leang,’ nanai tajiu nai awm,” nanai pathang.

⁵Naibaly mymy ai pahawi kalau iy tlenrei khyh my khaileaung pri peang naira bawibawi patei.

⁶Naibaly diabola my ni teng y, “Hini bawibawi tleaung y peang ai nai hawi, hunichi i nang naira py kang pei ai; kai teng y ang pei nai bo i, kaimy i ngai nai ngiereichi teng y kapei reng.

⁷Hunaibaly nang ly kai ai chiu baly, hini bawibawi nang i ne bebe ai,” napi.

⁸Naibaly Isu my ni teng y, “Nang i Areng Tameuh ai phai chiu ly, mymy i kalop harei phai so khyh, ‘nanai tajiu nai awm,’” nanai pathang bi.

⁹Naibaly mymy ly ni ai Jerusalem y pahawi iy, achura yhm kalen pui saleung kamsui y angdo hai i ni teng y, “Nang ly Tameuh i Chapo ne nabaly, hi i dengdairei tabo kathiu;

¹⁰‘Nangmy ai typ ai nai nang i mo y molam y mymy kani pri i amtaw thau naichi ai leu ang pei ai,’ nanai hawi.

¹¹‘Nichi i kiu y nang ai dawmkhawn ai, Ti y baly nang i kheu ly lengseaung y thip lawh na,’ nanai py tajiu nai awm lawh,” napi.

¹²Isu my ni teng y, “Nang i Areng Tameuh ai ly cham moh,’ nanai awm na a,” nanai pathang bi.

¹³Hunaibaly diabola ly ni ai cheaungkhangra y parawi pajau baly avo nai neng ajeng ai nai tako vui bo.

¹⁴Naibaly Isu ly Phailo i sa thai naira apu iy Kalili pri y vawi ali teang: naibaly ni i satang ly huni pri tengrang meingtym tleirei y amthang.

¹⁵Naibaly mymy ly nichi i achura yhm takhra takhra y leu patiu i, khumi bawibawi my ni ai palo.

¹⁶Naibaly ni ly mymy i tleaungri aveang nai Nazaret avang y tym: naibaly mymy i sa reng nai kamta Anawn Kani y achura yhm y kun iy, phain ai nai angdo.

¹⁷Naibaly amo Isaia i cha-iu ly mymy teng y pei. Naibaly cha-iu aeang lam iy, hini tajiu naira i nai vawi i,

¹⁸“Khumi kamawnchi teng y Satang Kahawi thui ai nai ang khai takhra nai deaungkho y, Areng i Phailo ly kai i tlang tleaung y awm; Miseaungchi teng y alaw hai ai nai leu hawi, Mei kamjuchi teng y mei angvang teang ai nai leu thui ai nai py, Ana patang naichi ai patheu ai nai py,

¹⁹Areng i avo nai saneng i satang thui ai nai py ang pato nai ne, ‘nanai he,’ napi

²⁰Naibaly mymy ly cha-iu taeang iy kalop sa nai keung teng y pei ali teang i ateh bo. Naibaly achura yhm i khumi bawibawichi ly ni ai khen ripati na.

²¹Naibaly mymy ly nichi teng y, “Hini Tameuh i cha-iu leu sai ly vaini nangchi i kano y thai hai angym bo,” nanai thui amteaung.

²²Naibaly nichi bawibawi ly mymy ai kawn iy ni i labeaung i theu nai tamen nai leu ly lyh parai na i, “Hini khumi ly Josepha i chapo ny y lawh kha?” napi.

²³Naibaly ni my ly nichi teng y, “Nangchi ly, ‘Daitang awi, nangmy ai hawi aso ba: Kapernaum avang y nang i atiti sa nai kaichi thai nai ngierei ly hi y nangmy i meingtym y py so ba,’ nanai pata nai leu ly thui pi thlethle ai ngaw khyh,” napi.

²⁴Naibaly mymy ly, “Meitang khyp kang thui pi, amo ami ai py amy i avang my kawn vai y leang.

²⁵Meitang khyp kang thui pi, Elija awm khala ly saneng thomlo tariurei kani amdeng iy, pri y khrikhri pa-rei takang theu i, Israela pri y neampachy lumai neangneang awm;

²⁶na i py nichi theung i nai ami teng y py Elija ai pato y, Sidon pri mang y Sarepta avang y neampachy lumai leaungrei teng y naini pato khyh.

²⁷Naibaly amo Elisa awm khala py Israela pri y keaungsi man nai khumi neangneang awm; na i py nichi theung i nai ami ai py pachai y: Naaman, Suria pri i khumi leaungrei ai naini pachai khyh,” napi.

²⁸Naibaly achura yhm i khumi bawibawichi ly huni leu thai baly khrikhri pa-rei kado theu,

²⁹naibaly angthau pawn iy avang i dengdairei ni ai patheu i, mymy ai aphi vui ai nai nichi avang i tangam peang mang y pahawi.

³⁰Na i py ni ly mymychi i sala y tako prei i, tako joja ryp.

³¹Naibaly mymy ly Kalili pri y avang harei Kapernaum y chei kathiu i, Anawn Kani y nichi ai leu patiu.

³²Naibaly mymy ly phom awm parai naimy leu thui nai deaungkho y nichi ly mymy i leu patiu nai ly lyh parai.

³³Naibaly achura yhm y ly vawinam my nam nai khumi leaungrei awm i, ni ly tao pajeng parai pa-rei my,

³⁴“Aw, Nazaret Isu awi, kaichi hawi nang hawi ati amtawm mo? Nang ly kaichi ai tama hai ai nai jeu nai a? Nang ai ly kai pany mang, Tameuh i Khumi Kachai ne,” nanai aeu.

³⁵Naibaly Isu my ni ai jo i, “Katheu moh, ni i taku theung i nai theu jau,” napi. Naibaly vawinam ly ni ai sala y atlym hai chum iy, no hai y naimy ni i taku theung i nai theu.

³⁶Naibaly nichi bawibawi khri pa-rei lyh na i, “Hini ly ati leu mo? Phom awm parai nai hawi sa thai naira y py vawinamchi ai leu pei i theu u lawh ly,” nanai arum u.

³⁷Naibaly mymy i satang ly huni pri tengtang meingtym tleirei y amthang.

³⁸Naibaly mymy ly angthau iy achura yhm i dengdairei theu i Simon i yhm y kun. Naibaly Simon i ampi ly khrikhri pa-rei keaung no na i, mymy teng y ni i vui takeng pi.

³⁹Naibaly mymy ly ni i ahawi y angdo iy no nai ai jo i, keaung no nai ly pra ryp bo, naibaly ni ly angthau praw i nichi ai kry.

⁴⁰Naibaly kani avah nai thym khala y no nai cheaungkhang no nai ngiereichi ai ni teng y pahawi u i, mymy ly nichi i tlang tleaung y kiu tamam bawibawi i hawi sa pi bebe.

⁴¹Vawinamchi py, “Nang ly Tameuh i Chapo ne,” nanai aeu naimy khumi neangneangchi i taku theung i nai theu u. Naibaly mymy ly Krista ne, nanai nichi ly pany nai deaungkho y, ni my nichi ai jo i katheu ai nai pei y.

⁴²Naibaly khutawi baly mymy ly theu i ka-vymra y chei; naibaly khumi mipuichi ly ni ai hau i ni teng y chei u teang iy, mymychi ai khai jo y ai nai patawn ai nai tau,

⁴³Na i py ni my ly nichi teng y, “Avang takhra y py Tameuh i peang nai Satang Kahawi kathui pi ai nai tla, huni molam y kai ai ang pato nai tang,” napi.

⁴⁴Hunaibaly ni ly Kalili pri y achura yhm takhra takhra y leu thui.