Read Khumi Chin LUKA 6 Bible Online

LUKA 6 - Khumi Chin bible

LUKA 6

¹Naibaly hina nai ne, mymy ly Anawn Kani tlenrei nai ly choh bai y tako prei i, abangnaichi ly choh vui khei, naibaly kiu y kanawi pyn iy cha u.

²Naibaly Pharisai amichi mo ly, “Ati mana nai Anawm Kani y so ngau y nai sa u lawh mo?” napi.

³Naibaly Isu my pathang i nichi teng y, “Davida hawi mymy teng y abangnaichi ly kajeu alam nai khala y atiti sa nai ly phain u y nai sai a?

⁴Huna nai ni ly Tameuh i yhm y kun i, pathyp pi nai keung harei cha ngau khyh nai khai takhra nai tako la iy cha, abangnaichi teng y py pei teang nai leu ly?” napi.

⁵Naibaly mymy ly nichi teng y Khumi i Chapo ly Anawn Kani i Areng na a,” napi.

⁶Naibaly hina nai ne, Anawn Kani takhra y mymy ly achura yhm y kun i leu patiu; naibaly lamtang mang i kiu amkhyn nai khumi leaungrei hu y awm.

⁷Naibaly Reita patiu nai keungchi hawi, Phreisaichi py ni ai seu ai naira nga thai ai nai Anawn kani y hawi sa ai mo so y ai mo, nanai khen u paryp.

⁸Naibaly ni my ly mychi i paleung y dawn nai ly pany i kiu amkhyn nai khumi teng y, “Angthau ly, sala y angdo ba,” napi.

⁹Naibaly ni ly angthau iy angdo. Naibaly Isu my nichi teng y, “Anawn Kani y hawi sa ai nai mo, taphra ai nai mo, paheng ai nai mo, padei ai nai mo sa ngau a? nanai nangchi teng y kang deng,” napi.

¹⁰Naibaly nichi bawibawi ai khen akiprei iy ni teng y, “nang i kiu pataw,” napi. Naibaly ni ly hunai kamta sa i kiu ly hawi teang bo.

¹¹Hunaibaly nichi ly khrikhri pa-rei kado theu u i, Isu ai sa ai nai sai arum u bo.

¹²Naibaly hina nai ne, huni neng khala y mymy ly theu i chiu sa ai nai mawi y chei iy Tameuh teng y vum torei chiu sa.

¹³Naibaly khutawi baly ni teng y abangnaichi ai palau i, nichi theung i nai holai nyhreichi ai vawi takhra iy amyn y py amtaw thau naichi, nanai pathi;

¹⁴Simon, Petera pathi teang nai hawi, ni i amnau Andria hawi, Jakob hawi, Johan hawi, Philipa hawi, Bartholomai hawi, Matthai hawi, Thoma hawi,

¹⁵Alphai i chapo Jakob hawi, Simon, Zelota pathi nai hawi,

¹⁶Jakob i chapo Juda hawi, mymy ai patiu hai nai keung Iskariota Juda py ne.

¹⁷Naibaly mymy ly nichi hawi vanrei chei kathiu i adym y angdo iy, ni teng y abang nai khumi mipuichi hawi Judai pri meingtym tleirei hawi, Jerusalem hawi, Tura hawi Sidon pangli peang i nai py khumi neangneang awm teang i, ni i leu tangai ai nai hawi nichi i no hawi sa pi ai nai py jeu u nai ne;

¹⁸hunaibaly vawinam my nam nai khumichi ai py hawi sa pi bo.

¹⁹Naibaly ni teng i dengdairei sa thai naira theu i, khumi bawibawichi ai hawi sa pi nai deaungkho y khumi mipui bawibawi mymy ai nam ai nai tau.

²⁰Naibaly angdeang i abangnaichi ai khen iy, “Khumi kamawnchi awi, nangchi ly taham hawi; Tameuh i peang naira ly nangmychi i ne.

²¹“Vai kajeu alam naichi awi, nangchi ly taham hawi; nangchi ly bym pa-rei nga ai. “Vai vo naichi awi, nangchi ly taham hawi; nangchi ly panui ai.

²²“Khumi i Chapo deaungkho y khumichi my nangchi ai niu ngai y nai ang jo iy, nangchi i amyn hawi y, nanai nichi my paleang nai khala y ly nangchi tahm hawi ai.

²³Huna nai kani y ly kawn u ly, amo theu naimy achaw u; khen cham, kani pri mang y nangchi i kawn nai vang ka-teng ny y nai awm; huna nai kamta teang nichi i amsi sangumchi ly amochi i tlang tleaung y sa reng nai ly.

²⁴“Na i py khumi kanangchi awi, nangchi ly taham si! Nangchi ly awmnem naira nga bo.

²⁵“Vai kajeu kawi naichi awi, nangchi ly taham si! Nangchi ly kajeu alam ai. Vai panui naichi awi, nangchi ly taham si! Nangchi ly paleung py mawn ai, vo py vo ai.

²⁶“Khumi bawibawichi my ang palo nai khala y nangchi ly taham si! Hunai kamta nichi i amsi sangumchi ly tapawp nai amochi i tlang tleaung y sa nai ly.

²⁷“Na i py kai i leu tangai naichi teng y kang thui pi. Nangchi i paleung ka-echi ai tamen u ly, nangchi ai niu ngai y naichi ai kahawi so u ly;

²⁸nangchi ai pasawi nai keungchi ai amtheaung hai u ly, nangchi ai ana nai keungchi ai chiu so pi u ly.

²⁹Tangbeng makengrei mang y tabeang nai keung ai ly makengrei mang py amteng tlam; naibaly nang i kanih ang la pi nai keung ai ly nang i baichu py la ai nai paka moh.

³⁰Hnei nai keung ngiereichi teng y pei u ly; naibaly nangchi i yhmtheaung ang la pi nai keung teng y ly hnei u ali moh.

³¹Naibaly amichi my nangchi i tlang tleaung y so pi khyly nanai ngai nai ngierei ly, mychi i tlang tleaung y py so pi teang.

³²“Naibaly nangchi ai tamen nai keungchi ai harei tamen u khyh baly kawn naira ati nga u ai mo? Khumi kamngochi py mymychi ai tamen nai keungchi ai ly tamen teang na a.

³³Naibaly nangchi i tlang tleaung y hawi sa naichi teng y nangchi hawi sa teang khyh baly, kawn naira ati nga u ai mo?

³⁴Khumi kamngochi py huna nai kamta sa teang na a. Naibaly nangchi nga teang ai nai athang khai nai keungchi teng y harei atiti alai ai nai pei u khyh baly kawn naira ati nga u ai mo? Khumi kamngochi py amychi i nga teang ai nai khumi kamngochi teng y alai ai nai pei teang na a.

³⁵Na i py nangchi i paleung ka-echi ai tamen u ly, nichi i vui kahawi so u ly, dawn amcheng y naimy alai ai nai pei u; hunaibaly nangchi i kawn nai vang ly nawi ai i, Salo Kangteng i chanau lawn u ai; ni ly kawn ai naira pany y naichi ai hawi, khumi kamngochi ai py paheng nai keung ne.

³⁶Ngampo ly amichi ai pahen nai kamta, nangchi py pahen u teang.

³⁷“Nangchi ai cheh y ai nai cheh u reng moh; pasum u reng moh, naibaly nangchi ai pasum y ai; pahen u, naibaly nangchi ai pahen ai;

³⁸pei u, hunaibaly nangchi ai pei ai, hawihai palai my ne nai, nop a iy, tahyn a iy, lem phra phreang naimy nangchi i phai tleaung y ang pei ai. Nangchi i ne nai kamta ang ne pi ali teang ai,” napi.

³⁹Naibaly mymy ly nichi teng y pata nai leu thui pi: ‘Mei kamju my mei kamju ai pahawi thai a? Nini leaung nyhrei ly angawm y tlo hawi mei y ai a?

⁴⁰Amtiu nai khumi ly mymy ai patiu nai keung tleaung y len y leang: na i py khumi leaung leaungrei ly amtiu angym nai bo y ly mymy ai patiu nai keung kamta awm teang ai.

⁴¹Naibaly nangmy i mei y satleang awm nai ly dawn y naimy, ngamjo ngamnau i mei y patho chy awm nai ly ati mana nai niu lawh mo?

⁴²Nangmy i mei y satleang awm nai ly niu y pui naimy ngamjo ngamnau teng y, ‘Amjo amnau awi, nang i mei y patho chy awm nai ly lo pi veng si,’ mana napi thai ai mo? Tapawp nai khumi awi, nangmy mei i satleang phai lo man veng, hunaibaly ngamjo ngamnau i mei y patho chy awm nai la veng ai nai ly chai pyn pa-rei niu ai

⁴³“Keung hawi nai ly athai hawi y nai athai vai y; keung hawi y nai ly athai hawi nai athai thai y. Keung tleirei mychi i athai y amny thai bawibawi.

⁴⁴Khumichi ly angjyn aleng awm nai keung y thaidu jaw vai y leang: naibaly angleng keung y kreip athai py jaw vai y leang.

⁴⁵Khumi kahawi ly ni i paleung i yhmtheaung kahawi i dengdairei atiti kahawi patheu reng, khumi kamngo ly ni i paleung yhmtheaung hawi y naira i dengdairei atiti hawi y nai patheu reng: ni i paleung y kawi palai nai ly labeaung y thui reng.

⁴⁶“Naibaly nangchi ly kai i leu tangai y pui naimy ati mana nai kai ai ‘Areng, Areng,’ napi lawh mo?

⁴⁷Kai i leu thui nai thai i patawm nai ngierei ly ami atawm mo, nanai kang thui pi ai.

⁴⁸Mymy ly yhm sa nai keung, thiu parai pa-rei tai iy lengseaung pui tleaung y lengseaung leng nai kamta atawm; naibaly tui len iy, tui ry kaho my huni yhm y stiu i, hawihai palai sa nai deaungkho y amchyh lei y.

⁴⁹Na i py leu thai iy patawm y nai khumi ly, lengseaung leng y naimy khaileaung salo y yhm sa nai keung kamta atawm; naibaly huni yhm ai ly tui ry kaho my stiu i anawi praw ryp; naibaly huni yhm anawi seaungkhrang nai ly ka-teng ny y,” napi.