Read Khumi Chin LUKA 7 Bible Online

LUKA 7 - Khumi Chin bible

LUKA 7

¹Naibaly mymy ly khumichi i kano kathai y mymy i leu bawibawi thui pajau iy Kapernaum avang y kun.

²Naibaly tavaimi chungvairei lu ami mo mymy i miseaung ngai parai nai leaungrei no i, dei vi dei vi na.

³Hunaibaly ni ly Isu i satang thai baly, mymy i miseaung ai hawi sa pi ai nai takeng ai nai ni teng y Juda miteaung kehchi ai pato.

⁴Naibaly nichi ly Isu teng y tym baly hawihai palai takeng i, “Ni ai ly hina nai sa pi ai nai avo parai y!

⁵Mymy ly kaichi i cheng ai py tamen, kaichi i achura yhm py ni my ang sa pi,” napi.

⁶Hunaibaly Isu ly nichi hawi chei bo. Naibaly yhm y tym ai nai kasa baly tavaimi chungvairei lu ly ni teng y mymy i ahawichi ai pato i, “Areng jeu rai pailai y han sy, nang pui pui chaly kai i yhm y kun ai nai ataing y leang:

⁷hunai deaungkho y kai nang teng y kang jeu ai nai py ataing y leang, nanai kadawn; leu sairei phai thui baly kai i miseaung ly hawi ryp ai mang.

⁸Kai py ami i leu anui y awm nai teu, kai i anui y tavaimichi awm; leaungrei teng y ‘Chei,’ kanapi baly chei; kalang teng y ‘Jeu,’ kanapi baly jeu : kai i miseaung teng y, ‘Hini so,’ kanapi baly sa,” napi.

⁹Naibaly Isu ly huni leu thai baly mymy ai lyh parai i amhi iy, khumi mipui abangnaichi teng y ly, “Kang thui pi, Israelachi theung y py hina tanrei ym naira ly kai avum vai y,” napi.

¹⁰Naibaly khumi pato naichi ly yhm y vawi ali teang i miseaung ai no hawi nai niu u.

¹¹Naibaly kra y nai sala y mymy ly avang harei, Nain napi naira y chei i, abangnaichi hawi mipui neangneangchi py chei u teang.

¹²Naibaly avang apai katheu ahawi y tym kha y khen cham, khumi kadei ai angjeaung nai theu, amhm i chapo leaungrei awm khyh nai ne, mymy ly neampachy lumai ne: naibaly avang i khumi neangneangchi ly mymy teng y awm teang.

¹³Naibaly Areng ly neampachy lumai ai niu baly khrikhri pa-rei pahen i, “Vo reng moh,” napi.

¹⁴Naibaly mymy ly ahawi y chei iy tlang y nam; hunaibaly angjeaung nai khumichi ly angdo i mymy ly, “Deang awi, angthau jau kang napi,” napi.

¹⁵Naibaly khumi kadei ly ateh i leu katheu amteaung iy, Isu my amhm teng y au.

¹⁶Naibaly khumi bawibawichi jei u i, Tameuh ai palo iy, “Achi theung y amo len parai nai awm bo,” napi; naibaly, “Tameuh my mymy i khumichi ai de nai bo,” nanai py thui bi.

¹⁷Naibaly huni mymy i satang ly Judai pri verei y hawi, huni tengtang meingtym tleirei y py amthang.

¹⁸Naibaly Johan teng y abangnaichi ly huni satang bawibawi mymy teng y thui pi.

¹⁹Hunaibaly Johan ly mymy teng y abangnai leaung nyhrei ai palau iy Areng teng y pato i, “Jeu ai nai keung ly nang ne a, kaichi ly khumi takhra ai ajeng ai a?” nanai thui.

²⁰Naibaly nini ly ni teng y tym baly, “Baptis sa nai Johan my, “Jeu ai nai keung ly nang ne a, kaichi ly khumi takhra ai dawn ai a? nanai deng ai nai nang teng y kaini ai ang pato nai he,” napi.

²¹Naibaly hunai thym khyp khala y Isu my no naichi ai hawi, no awm naichi ai hawi, vawinam my nam naichi ai py neangneang hawi sa pi: mei kamju neangneangchi ai py mei angvang hai.

²²Naibaly mymy ly nini teng y, “Tako hawi ali teang ly, nangni i atiti niu nai hawi thai nai ly Johan teng y thui pi; mei kamjuchi py mei angvang u bo, kheu kangbaichi py tako u bo, keaungsichi ai py pachai bo, kano kapangchi py kano ha ali u bo, kadeichi ai py pathau bo, khumi kamawnchi teng y py Satang Kahawi thui pi bo.

²³Naibaly ami py kai i tlang tleaung y paleung hawi y naira ngo y nai ly taham hawi,” nanai pathang.

²⁴Naibaly Johan i khumi pato nai leaung nyhrei vawi nai bo y Isu my khumi mipuichi teng y Johan i satang thui pi i, “Nangchi ly daichi ka-vym y ati khen ai nai chei u nai kha? Ali my hm nai ahyn nai satleung ai a?

²⁵Ny y baly ati khen ai nai chei u nai kha? Ateaung kanem amthyp nai khumi ai a? Khen cham, ateaung nang parai amthyp naichi hawi, tlamsa nai khumichi py samrang i yhm y awm veng.

²⁶Ny y baly ati khen ai nai chei u nai kha? amo ai a? Ne khyp chy bo, amo tleaung y py len keh, nanai kang thui pi.

²⁷“Khen cham, kai i amtaw thau nai ai ly nang i mo y kang pato nai ne, Ni ly nang i mo y nang i lam sa pi rym ai,’ nanai ni i satang tajiu nai ly hini ne he.

²⁸Kang thui pi, neampachychi i tapen nai theung y ly Johan tleaung y len keh nai by y; na i py Tameuh i peang naira i khumi theang kyh nai py ni tleaung y ly len kyh veng rai.

²⁹Naibaly khumi bawibawi hawi, akeu cheaung nai khumichi py thai iy, Johan i baptisma reita kamta baptisma nga nai deaungkho y Tameuh ly teng, nanai pany hai u.

³⁰Na i py Pharisaichi hawi Reita pany nai keungchi ly ni teng y baptisma ngo y iy, Tameuh my mychi i vui ka-vo sa pi nai ly ngai u y.

³¹“Vai deung kangthauchi ai ly ati hawi pata ai mo? Atawm nai sai py ati atawm mo?

³²Deaungdichi ly seng meingtym y ateh iy, ‘Byhlyh kang eng pi iy nangchi ly lam y; kaichi ly hang iy nangchi ly vo y,’ nanai aeu leungtang naichi atawm.

³³Baptis sa nai Johan ly ang jeu iy tako py cho y, kreip athai hang py nei y i, ‘Vawinam my nam nai na a hi ly,’ napi u lawh.

³⁴Khumi i Chapo ly ang jeu iy, ni ly cha py cha, nei py nei i, ‘Khen cham, biu ha nai khumi, kreip athai hang ha nai khuumi, akeu cheaung nai keungchi hawi khumi kamngochi i ahawi ho,’ napi u lawh;

³⁵ne mang ly cheng naira ly my i chanauchi y eaung bo mang,” napi.

³⁶Naibaly Pharisaichi theung y leaungrei ly ni ai mymy teng y biu cha ai nai chi. Naibaly ni ly Pharisai i yhm y kun i biu o.

³⁷Naibaly khen cham, huni avang i khumi, neampachy kamngo leaungrei awm nai ly Pharisai i yhm y biu o nai mymy ateh, nanai pany i, dengjai adym kangleung y rimui syn iy,

³⁸nithun mang ni i kheu keung y vo nai tarawi y angdo, naibaly mymy i meikatui ly ni i kheu y leaung hai i, mymy i sam hawi tamui, ni i kheu y py pachawm ryry iy rimui paju.

³⁹Naibaly mymy ai chi nai keung Pharisai ly huna nai niu baly mymy i paleung theung y, “Hini khumi ly amo ne i khyly mymy ai nam nai keung neampachy ly ami mo, mana nai khumi mo, nanai pany ai bo, ni ly khumi kamngo nai i,” napi.

⁴⁰Naibaly Isu my ni teng y, “Simon, kai ly nang teng y leu sairei thui ai nai awm,” nanai pathang. Naibaly mymy ly, “Thui bei, sara,” napi.

⁴¹Naibaly Isu my, “Tangka paseng nai keung ami mo leaungrei ly khumi leaung nyhrei teng y kalai nga ai nai awm; leaungrei nai ly pia vui pangrei nai tangka cho chungvai pangrei kalai awm, leaungrei nai ly vui pangrei awm.

⁴²Naibaly nini ly pei ai nai by y i nini ai pahen mei. Hunaibaly mymy ai ly mani my tamen keh ai mo?” napi.

⁴³Simon ly, “Pahen nawi keh nai khumi athang awm,” nanai pathang. Naibaly mymy ly ni teng y, “Nang i thui nai teng mang,” napi.

⁴⁴Naibaly mymy ly neampachy mang y hi iy Simon teng y ly, “Nang ly hini neampachy ai niu a? Kai ly nang i yhm y kun iy nang ly kai ai kheu asi ai nai tui pei y: na i py mymy ly meikatui y kai i kheu sui hai iy, mymy i sam hawi tamui.

⁴⁵Nang ly kai ai pachawm py pachawm y, na i py mymy ly kai kun angchei kha i dengdairei kai i kheu y pachawm nai anawn y.

⁴⁶Nang ly kai i lu y rimui py paju y: na i py mymy ly kai i kheu y rimui paju.

⁴⁷Hunai deaungkho y kang napi, mymy i kamngo nawi parai nai ly pahen nai bo, ni ly khri pa-rei tamen na a: na i py pahen nai di baly maidenrei tamen nai py di teang,” napi.

⁴⁸Naibaly ni ly neampachy teng y ly, “Nang i kamngochi pahen nai bo,” napi.

⁴⁹Naibaly biu o ahawi naichi my, “Kamngochi ai raurei pahen nai ly ami mo hi ly?” na u.

⁵⁰Naibaly mymy ly neampachy teng y, “Nang i ym naira ly nang ai paheng bo; paleung awmnem naimy tako ba,” napi.