Read Khumi Chin LUKA 8 Bible Online

LUKA 8 - Khumi Chin bible

LUKA 8

¹Naibaly hina nai ne, hunai bo y mymy ly leu thui ai nai hawi, Tameuh i peang nai Satang Kahawitym hai prei ai nai hawi, avang kalen y py avang katheang y py amki prei i, holai nyhreichi py mymy teng y awm.

²Neampachy amichi mo, vawinam my nam nai hawi ali naichi hawi, no hawi sa pi veng naichi py mymy teng y awm teang; nichi ly Mari, mymy i taku theung i dengdairei vawinam saryhrei theu nai Makdilini napi nai ly, Heroda i yhmtheaung kry nai keung

³Chuza i aju Joanna py, Susanna py, takhra neangneangchi py ne; nichi ly mymychi i yhmtheaung dengdairei nichi ai kry.

⁴Naibaly khumi mipui ka-teng ny y nai achu i, avang tleirei i khumichi py ni teng y chei nai deaungkho y mymy ly pata nai leu thui pi:

⁵“Ti hei nai khumi ly ti hei ai nai amawi; naibaly hei nai khala y phyrei ly lam teng y tla i, khumichi my chiu iy tavochi my cha khrai.

⁶Naibaly phyrei ly thaithi tleaung y tla i prau praw: na i py khaileaung ni y nai deaungkho y jei ryp veng.

⁷Naibaly phyrei ly kabeng aleng theung y tla i, kabeng aleng ly vanrei prau hai i vawi pajeang veng.

⁸Naibaly phyrei ly khaileaung kahawira y tla i prau iy chungvairei peung,” napi. Naibaly huni leu thui thym khala y, “Ami py thai ai nai kano awm baly thai sy,” nanai aeu.

⁹Naibaly abangnaichi my ly ni teng y, “Hini pata nai leu ly ati mana nai sai mo?” nanai deng.

¹⁰Naibaly mymy ly nichi teng y, “Tameuh i peang naira i leu kathiuchi ly nangchi pany ai nai pei bo; na i py khumi takhrachi teng y naini nichi ly niu iy py niu thai y ai nai hawi, kano y thai iy py dawn naira pany thai y ai nai, pata nai leu harei thui khyh.

¹¹Pata nai leu ly hini ne: Choh ti ly Tameuh i leu ne.

¹²Naibaly lam teng y tla naichi ly leu thai naichi ne, naibaly diabola ly jeu i, nichi ly ym y iy pahengra ngo thai y ai nai, nichi i paleung theung i nai leu la pi praw veng.

¹³Naibaly thaithi tleaung y tla nai ly hinichi he: nichi ly leu thai baly kawn prai naimy tangai ryp; na i py tangjyn den py ngo y i tanarei chy ym iy parawi nai neng tym khala ly anawn ali veng ryp.

¹⁴Naibaly kabeng aleng theung y tla nai ly hinichi he: nichi ly leu thai nai bo y vawi iy, heng khala y dawn nai saichi hawi, nang nairachi hawi, tlamsa nairachi my achih hai i athai thawn y.

¹⁵Naibaly khaileaung kahawira y tla nai ly hinichi he: paleung kateng kahawi naimy leu thai iy patawm jojo i hawihai palai athai.

¹⁶“Ami py maisi thawn iy laawm tleng vai y; kun nai ngiereichi kangvang niu thai ai nai khai naira y khai khyh.

¹⁷Pheaung y ai nai apha nai ati sai py by y, pany y ai nai hawi amteng y ai nai leu kangviu ati sai py by y.

¹⁸Hunaibaly nangchi i thai nai sai ly mana awm mo, nanai amkym u me ba; ami py atiti awm nai ngierei teng y ly ang pei panawi bi ai; ami py atiti by y nai ngierei teng i nai ly mymy i awm yb nai angchi, nanai athang khai nai raurei py la pi ra ai,” napi.

¹⁹Naibaly ni i amhm hawi amjo amnauchi ly mymy teng y chei tapai, na i py khumi mipui awm mamang nai deaungkho y ni i ahawi y tym thai y.

²⁰Naibaly ni teng y, “Ngamhm hawi ngamjo ngamnauchi ly nang ai niu ai ngai nai angam mang y angdo u jo ho!” nanai thui pi.

²¹Naibaly mymy ly nichi teng y, “Tameuh i leu thai iy patawm naichi ly kai i amhm hawi kai i amjo amnau na a,” nanai pathang.

²²Naibaly huna nai thym khala y kanirei nai ly mymy ly abangnaichi hawi paleung y atang i nichi teng y, “Ang vai mang y angpeang u sina,” napi.

²³Hunaibaly akan iy angpeang nai thym khala y mymy ly i ngym veng; naibaly ang y ali khu theu i, nichi i paleaung ly tui kawi dudu i, nichi ly khri pa-rei ka-jei awm na.

²⁴Naibaly nichi ly mymy i ahawi y athui iy palaw i, “Areng, Areng, kaichi tama ai bo he,” napi. Naibaly mymy ly anglaw iy ali hawi tui sampyh ai py jo; naibaly aham i rym ryp bo.

²⁵Naibaly mymy ly nichi teng y, “Nangchi i ym naira ly ma mang y awm mo?” napi. Naibaly nichi ly jei i lyh parai nai, “Hini ly ami kha? Ali hawi tui sampyh malawn py leu pei i tangai lawh ly,” na u lengleang.

²⁶Naibaly nichi ly Kalili pri kataw i Kerasin pri y tym.

²⁷Naibaly kacheng y angkhyh nai bo y avang i khumi, vawinam my nam nai ami mo leaungrei ni hawi avum. Huni khumi ly kanih akhiu y nai kra parai bo, den py yhm y awm y, tapreaung y awm lawh.

²⁸Naibaly ni ly Isu ai niu baly aeu iy, ni i mo y ambeu i athorei my, “Isu, Salo Kangteng Tameuh i Chapo awi, kai hawi nang hawi ati amtawm naira awm mo? Hini kang takeng nai bo he, kai ai patang hai moh kyh jemjem ba,” napi.

²⁹(Isu my vawinam ai ly huni khumi i taku theung i dengdairei theu ai nai leu pei veng bo. Huni khumi ai ly vawinam my nam jojo i, amichi my deaungki hawi sengkry py thiu kawm iy typ ryhryh i py, ni ai kawm naira ly leu hai bawi iy, vawinam my ni ai daichi ka-vym y paryh jojo.)

³⁰Naibaly Isu my, “Nang i amyn ami mo?” nanai deng. Naibaly ni my ly, “Neang Neang,” napi; (ni i taku theung y vawinam neangneang kun nai deaungkho y.)

³¹Naibaly angawm kalawi by y naira y chei ai nai leu pei y ai nai Isu teng y takeng u.

³²Naibaly huni mawi y ly eu kanghu pui tlai bo; naibaly nichi ly hunichi i taku theung y kun thai ai nai leu pei ai nai ni teng y takeng. Naibaly mymy ly avo, napi.

³³Naibaly vawinamchi ly huni khumi i taku theung i nai theu iy, euchi i taku theung y kun bo: naibaly eu kanghu ly angthiu mang y angpreng kathiu iy ang y taba i, tui pathai i dei thleang.

³⁴Naibaly khawn nai keungchi ly huni atiti sa nai niu i, angpreng iy avang y py, hlau y py thui pi.

³⁵Naibaly mana lawh mo, nanai khen ai nai chei u hawm i nichi ly Isu teng y tym, naibaly vawinam theu vui nai khumi ly kanih akhiu iy paleung kari awm naimy Isu i kheu keung y ateh nai niu i nichi ly jei u.

³⁶Naibaly niu naichi ly vawinamchi my nam nai ai hawi sa pi nai sai ly nichi teng y thui pi.

³⁷Naibaly Kerasin pri tengtang i khumi bawibawichi ly khrikhri pa-rei jei nai deaungkho y ni ai ly mymychi teng i dengdairei chei veng ai nai takeng; naibaly mymy ly paleaung y atang iy ali teang bo.

³⁸Na i py vawinamchi theu veng nai khumi my ly Isu teng y awm jo ai nai takeng.

³⁹Na i py Isu my ly, “Nang i yhm y vawi ly, Tameuh my nang i vui mana tanrei ang sa pi nai sai ly thui pi,” nanai pato veng. Hunaibaly tako iy avang kalen bawibawi theung y ly Isu my mymy i vui mana tanrei ang sa pi nai sai ly aeu hai.

⁴⁰Naibaly Isu ly ali teang khala ly khumi mipuichi my ajeng bawibawi nai deaungkho y ni ai kawn u.

⁴¹Naibaly khen cham, khumi leaungrei, amyn Ja-ira, achura yhm miteaung keh ly jeu i, Isu i kheu keung y ambeu iy my i chaniu harei awm khyh nai, saneng holai nyhrei mo dei vi dei vi nai deaungkho y mymy i yhm y jeu ai nai takeng.

⁴²Naibaly Isu ly chei nai thym khala y khumi mipuichi ly mymy ai i meimeaung na.

⁴³Naibaly neampachy leaungrei, saneng holai nyhrei thi ahaw nai, ni i yhmtheaung awm nai ngierei ly daitangchi teng y khei krai bo,

⁴⁴ami py hawi so pi thai y bo; ni ly mymy i nithun mang chei iy ni i kanih tawn y nam; naibaly mymy i thi ahaw nai ly tlenrei khyh my akyn praw ryp.

⁴⁵Naibaly Isu my, “Kai ai nam nai ly ami mo?” napi. Naibaly “Kai ny y leang,” napi bawibawi i, Petera hawi my i ahawichi ly “Areng, khumi mipuichi my ang i meimeaung iy anui meimeaung na chy bo,” napi.

⁴⁶Na i py Isu my, “Ami mo kai ai nam khyp, kai theung i dengdairei sa thai naira theu, nanai kai pany,” napi.

⁴⁷Naibaly neampachy ly aheu thai y, nanai pany i, kaso tahyn theu naimy chei iy, my i mo y ambeu: naibaly ni ai nam nai sai hawi, tlenrei khyh my ni i no hawi praw nai sai ly khumi bawibawi ka-niu y thui pi.

⁴⁸Naibaly ni my ly mymy teng y, “Lo awi, nang i ym naira my ang hawihai nai bo, awmnem naimy tako ba,” napi.

⁴⁹Naibaly leu katheu nai thym khala y achura yhm miteaung keh i yhm dengdairei khumi leaungrei jeu i, “Nang i chaniu ly dei veng bo, Sara ai ly akawm hai y han,” napi.

⁵⁰Isu my ly huna nai leu thai iy, “Jei moh, ym phai ym ryp, hunaibaly ni ai paheng teang ai,” napi nai pathang.

⁵¹Naibaly yhm y tym baly Petera, Johan, Jakob, deaungdi i amhm ampo, nichi ai ny y baly ami ai py kun ai nai pei y.

⁵²Naibaly khumichi bawibawi ly vo ryry nai paleung y atum ryry; hunaibaly ni my ly, “Vo u moh, mymy ly dei y leang, i ngym nai teu,” napi.

⁵³Naibaly nichi ly dei nai pany nai deaungkho y panui hai lawh veng.

⁵⁴Na i py Isu my ly ni i kiu y amkhaw iy, “Lo awi, angthau,” nanai palau.

⁵⁵Naibaly ni i phailo kun teang i angthau praw; naibaly ni ai pacho ai nai leu pei.

⁵⁶Naibaly ni i amhm ampo my lyh parai bo, na i py ni my ly huni atiti sa nai ly ami teng y py thui pi y ai nai napi kheng.