Read Khumi Chin LUKA 9 Bible Online

LUKA 9 - Khumi Chin bible

LUKA 9

¹Naibaly mymy ly holai nyhreichi ai palau achu iy vawinam bawibawichi tleaung y sa thai naira hawi, aly peang ai naira hawi, no nairachi hawi sa ai nai py pei.

²Hunaibaly Tameuh i peang nai leu thui ai nai hawi, no naichi ai hawi sa ai nai py pato.

³Naibaly mymy ly nichi teng y, “Khuleaung chei ai nai vui cheaungvawi mo, jibo mo, tako mo, tangka mo, ati sai py syn u moh; baichu nyhrei py syn u moh.

⁴Naibaly nangchi i lyn nai yhm ngierei y ly ango u ryp, hu i dengdairei theu u.

⁵Naibaly nangchi ai kawn y nai ngierei ly huni avang i dengdairei nangchi theu nai khala ly mymychi ai pany hai ai nai nangchi i kheu padawi i spryh katheng u,” napi.

⁶Naibaly nichi amsa i avang tleirei y chei preiprei iy, Satang Kahawi thui pi i no naichi ai py hawi sa pi.

⁷Naibaly areng Heroda ly huni atiti sa nai bawibawi ly thai bo: naibaly phyreichi my ly, “Johan ly dei nai angthau teang nai bo hi ly,” napi.

⁸Phyreichi my ly, “Elija amteng nai bo hi ly,” napi; phyreichi my ly, “Jangni i amo ami mo angthau teang nai bo hi ly,” nanai deaungkho y ni ly dawn tamang tyh bo.

⁹Naibaly Heroda ly, “Johan ai kaimy lu tameang khyp bo; na i py hina tanrei kai ni i satang thai nai ly ami mo?” napi. Naibaly mymy ai niu ai nai ngai bo.

¹⁰Naibaly amtaw thau naichi ly vawi teang iy ni teng y mychi i atiti sa naichi bawibawi thui pi. Naibaly mymy ly nichi ai hawi iy Bethsaida avang napi naira y chei takhra bo.

¹¹Na i py khumi mipuichi ly pany iy mymy ai hui u bo; naibaly ni my ly nichi ai kawn i Tameuh i peang nai satang thui pi, naibaly no hawi sa pi ai nai aly ngai nai ngierei ai ly hawi sa pi.

¹²Naibaly kani kareu bo; naibaly holai nyhreichi ly ni teng y chei i, “Achi ahawi tengtang i avang y hawi, hlau y chei iy anga ra yhm hawi cha ai naira nga thai ai nai khumi mipuichi ai pato kyh; achi ly ka-vymra y awm lawh ly,” napi.

¹³Mymy ly nichi teng y, “Nangmychi my cha ai nai pei u,” napi. Naibaly nichi my ly, Hini khumi bawibawichi i vui cha ai nai van pi y baly tako phi pangrei hawi, ngo amai nyhrei ny y baly ati sai by y leang,” napi.

¹⁴(Neampacho ka-cheang sasa naimy sang pangrei tahm awm ngaw khyh.) Naibaly mymy ly abangnaichi teng y, “Vui pang vui pangrei mo kamkawm kamkawm ateh hai u,” napi.

¹⁵Naibaly nichi ly hunai kamta sa i ateh hai bawibawi.

¹⁶Naibaly mymy ly tako phi pangrei hawi, ngo amai nyhrei py la iy kani mang y khen, naibaly kawn nai leu thui iy theng baw theng baw i, khumi mipuichi i mo y pawi pi ai nai abangnaichi teng y pei.

¹⁷Naibaly nichi ly cha i kajeu kawi u bebe; nichi i cha nai kamthom py teaung holai nyhrei kawi teang.

¹⁸Naibaly hina nai awm, mymy tlairei chiu sa nai thym khala y abangnaichi ly mymy teng y awm; naibaly mymy ly nichi teng y, “Khumi mipuichi my kai ai ami napi mo?” nanai deng.

¹⁹Naibaly nichi my ly, “Baptis sa nai keung Johan na a,’ ang napi; na i py phyreichi my ly, ‘Elija na a,’ ang napi; phyreichi my ly, ‘Jangni i amo ami mo angthau teang bi nai bo,’ ang napi,” nanai pathang.

²⁰Naibaly mymy ly nichi teng y, “Tumbaly nangchi ly kai ai ami napi mo?” napi. Naibaly Petera my, “Tameuh i Krista ne,” nanai pathang.

²¹Naibaly huni leu ly ami teng y py thui pi y ai nai leu pei kheng i,

²²“Khumi i Chapo ly atiti neangneang patang ai nai tla: miteaung kehchi hawi, pathyp pi nai keung kalenchi hawi, Reita patiu nai keungchi my ngai y nai awm ai nai tla, ni ai padei ai nai tla, kani thomrei kani y pathau teang bi ai nai tla,” napi.

²³Naibaly mymy ly khumi bawibawichi teng y, “Ami py kai teng y abang ai nai ngai baly, amy i kangai khai su iy amy i kraws apu naimy abang sy.

²⁴Ami py amy i hengra apalawi ai nai ngai nai ngierei ly tama ai; ami py kaimy deaungkho y amy i hengra tama nai ngierei ly, huni khumi kypkyp ly apalawi ai.

²⁵Ami py hini khaileaung pri bomrei ngo sy, amy ai ataphra iy tamo lawh sy, ni i vui ati amran ai mo?

²⁶Ami py kaimy ai hawi kai i leu ai py kaji hai nai ngierei ly, Khumi i chapo ly mymy i nang parai naira hawi, Ampo i nang parai naira hawi, kani pri amtaw thau nai kachaichi i nang parai naira py apu naimy ang jeu nai neng khala y ly, huni khumi ai ly ang kaji hai teang ai.

²⁷Teng khyp kang thui pi, hi i angdo nai phyreichi ly Tameuh i peang nai niu y ryrei ly deira den py pateng ai ny y,” napi.

²⁸Naibaly hina nai awm, huni leu thui nai bo y kani tajarei mo khala, mymy ly Petera hawi, Johan hawi, Jakob ai py hawi iy chiu sa ai nai mawi asang parai naira chei kalau.

²⁹Naibaly ni ly chiu sa nai thym khala ly, ni i meimai awm nai sai ly takhra lawh i, ni i ateaung py kaleung nai alaukau na.

³⁰Naibaly khen cham, khumi leaung nyhrei mymy hawi leu arum, hunini ly Mosi nini Elija ne;

³¹nini ly nang parai naira amthyp nai amteng i, Jerusalem y ni i dei ai nai sai satang arum.

³²Na i py Petera hawi ahawi nini py i kamhm ngam; naibaly anglaw iy ni i nang parai naira hawi, ni teng y khumi leaung nyhrei angdo nai niu.

³³Naibaly hina nai awm, hunini Isu hawi amprei nai thym khala y Petera my Isu teng y, “Sara, kaichi i vui hi y awm ai nai hawi parai; kaichi my taichy thomrei so si ba, nang i vui harei, Mosi i vui harei, Elija i vui harei,” napi; mymy ly leu thui ai nai py pany y.

³⁴Naibaly huna nai leu thui nai thym khala y khupanym my khiu iy mymychi ai deng i, khupanym theung y kun ai nai thym khala y jei u bo.

³⁵Naibaly khupanym theung i nai raawi theu i, “Hini ly kai i Chapo, kai i vawi nai ne; mymy i leu tangai u,” napi.

³⁶Naibaly raawi beang bo nabaly Isu leaungrei ai niu khyh bo. Naibaly nichi leu katheu y i hunai thym khala i mychi i atiti niu naichi ly ami teng y py thui pi y.

³⁷Naibaly hina nai awm, nichi ly khawn mang y mawi i nai kathiu nai bo y, khumi mipui ka-teng ny y nai mymy ai lamchung.

³⁸Naibaly khen cham, mipuichi theung y khumi leaungrei aeu i, “Sara, kai i chapo ai khen ai nai kang takeng, kai i chapo leaungrei awm kalei khyh.

³⁹Khen cham, vawinam my nam i aeu neangneang lawh thla; hunaibaly pachi phawn tla sobam pa-rei kyn hai i, ni ai khrikhri pa-rei thi deung hai iy khai pra bo.

⁴⁰Naibaly nang khi y abangnaichi teng y patheu ai nai katakeng, na i py nichi so thai y pasi lawh, napi.

⁴¹Naibaly Isu ly pathang i, “Aw, vai deung kangthau ym naira by y nai hawi, kateng so y naichi awi, kai ly nangchi teng y mana tanrei kang awm nai iy kang kham hai thai ai mo? Nang i chapo ai ly hi y hawi ba,” napi.

⁴²Naibaly ni ly jeu nai thym khala y vawinam my ly ni ai atlym hai khup iy khri pa-rei kyn hai lawh. Na i py Isu ly vawinam ai jo i, deaungdi ai ly hawi sa iy ampo teng y pei ali teang bo.

⁴³Naibaly khumi bawibawichi my Tameuh i nang parai nai sai lyh parai. Hunaibaly khumi bawibawichi ly ni i atiti sa nai ngierei lyh parai nai thym khala y mymy ly abangnaichi teng y,

⁴⁴“Hini leu ly nangchi i kano y kun sy: Khumi i Chapo ai ly khumichi i kiu y patiu hai ai,” napi.

⁴⁵Na i py ni i leu thui nai ly nichi dawn ai nai pany y, nichi pany thai y ai nai heu pi vui nai ne; hini leu thui nai satang py mymy teng y khy deng vam y.

⁴⁶Naibaly, “Achi theung y ami len keh ai mo?” nanai aei u.

⁴⁷Hunaibaly Isu my nichi i paleung y dawn nai ai ly pany i, deaungdichy leaungrei ai pahawi iy, mymy i ahawi y angdo hai i nichi teng y,

⁴⁸“Ami py kai i amyn deaungkho y hini deaungdichy ai kawn nai ngierei ly kaimy ai kawn nai bo; ami py kai ai kawn nai ngierei ly kai ai pato nai keung ai kawn nai bo; nangchi bawibawi tleaung y theang keh nai ly huni ly len keh,” napi.

⁴⁹Naibaly Johan my, “Areng, kaichi ly ami mo nang i amyn y vawinamchi ai patheu nai niu, naibaly ni ly achi teng y abang nai ny y nai deaungkho y kaichi my paka veng na a,” nanai pathang.

⁵⁰Isu my ly ni teng y, “Paka reng moh, nangchi ai paka y nai khumi ly nangchi mang y asa nai na a” napi.

⁵¹Naibaly hina nai awm, mymy ai pahawi kalau ai nai neng tym kasa iy, mymy ly Jerusalem y chei ai nai tau tanga i, mo mang y khumichi ai pato;

⁵²naibaly nichi ly chei iy mymy i vui sa pi rym ai nai Samari khumichi i avang harei y kun.

⁵³Naibaly my i meimai y Jerusalem mang y tapai ai nai amny nai deaungkho y nichi ly mymy ai kawn y.

⁵⁴Hunaibaly ni teng y abang nai Jakob nini Johan ly huni pany baly, “Areng, hinichi ai kang pawn ai nai kani mang i dengdairei mai palau kathiu ai nai avo na a?” napi.

⁵⁵Na i py mymy ly hi iy nini ai preng.

⁵⁶Naibaly nichi ly avang takhra y chei vui.

⁵⁷Naibaly nichi ly tako nai thym khala y ami mo neampacho leaungrei mymy teng y, “Nang i chei naira tleirei y kai abang ai,” napi.

⁵⁸Naibaly Isu my ni teng y, “Khivachi py kho awm, salo mang i tavochi py tabu awm, na i py Khumi i Chapo ly anga naira ha py by y,” napi.

⁵⁹Naibaly mymy ly khumi takhra teng y, “Kai teng y abang,” napi. Na i py ni my ly, “Areng, ngaai ai up hai veng rai si ba,” napi.

⁶⁰Na i py mymy ly ni teng y, “Kadeichi ly mychi i kadei ai up u sy bei; na i py nang ly chei ly, Tameuh i peang nai satang amthang hai bei,” napi.

⁶¹Naibaly khumi takhra my py, “Areng, kai abang ai, na i py dengtheungchi ai leu kahawi y pavum veng rai si ba,” napi.

⁶²Na i py Isu my ni teng y, “Ami py li thawn naira taveang kiu y amkhaw iy, nithun mang y khen nai ly, Tameuh i peang naira khumi lawn ai nai ataing y leang,” napi.