Read Khumi Chin Leu Thui Nai 1 Bible Online

Leu Thui Nai 1 - Khumi Chin bible

Leu Thui Nai 1

¹Hini cha-iu theung y ly Jordan tavo nisi mang i daichi ka-vym theung y tym u nai khala, Mosi my Israela chengchi teng y thui pi nai leu saichi ne. Nichi ly Supha sahawi i Jordan leaunghawi y tym u bo. Nichi i makeng mang y ly Paran mary, vai makengrei mang y ly Tophel mary, Labana mary, Hazeroth mary hawi Dizahab marychi awm.

²(Sinai mawi dengdairei Kadesa Barnea mang y Edom pri mawitleaung lam tako baly, kani holai harei ateng nai ne.)

³Israela chengchi ly Aikupta pri i dengdairei theu nai bo saneng vui palyhrei, lo holai harei, angchei i kani y ARENG my mipuichi teng y leu pei nai ngierei Mosi my thui pi pateang nai ne.

⁴Mosi ly Hesabon mary y peang nai Amori samrang Sihon ai py, Asataroth mary hawi Edrei marychi ai peang nai Bashan samrang Oka ai py, ARENG my[1]eaung hai vui nai bo y thui pi naichi ne.

⁵Mosi ly Israela chengchi Jordan tavo nisi mang i Moba khujyh y tym u nai thym khala, Tameuh i reitachi hawi leu pei naichi patiu pi amteaung bo.

⁶Mosi my, “Achi ly Sinai Mawi y awm nai thym khala, achi i ARENG Tameuh my, ‘Nangchi ly hini mawi y awm nai kra parai na bo.

⁷Tai aphrei iy khuleaung amso u jau. Amori chengchi awm nai mawitleaung pri hawi, huni sahawi i mawitleaung pri, adym angdeang, Jordan tavo jawn, tokalawi khu hawi Mrethe pangli mang y chei u. Hunaibaly Kanan pri mang y chei u, hu i bo baly Lebanon mawi lem iy Euphrat tavo tym pa-rei chei u.

⁸Nangchi i amsi pajo Abraham, Isaka, Jakob hawi nichi i kangpreangchi teng y, hini pri bawibawi pei ai, nanai ARENG my leu adeu nai ne. Nangchi chei u ly peang u,’ nanai leu ang pei,” napi.

⁹Mosi my khumichi teng y, “Achi Sinai Mawi y awm nai thym khala, kaimy nangchi ai kang thui pi nai ly ‘Nangchi ai lu sa iy kang pahawi nai kalop ly kai i vui myn ji ala bo. Kaimy leaungrei khyh ly kaso pajau y.

¹⁰Nangchi i ARENG Tameuh ly nangchi ai kani mang i ka-sichi tanrei ang peung hai bo.

¹¹Nangchi i amsi pajochi i ARENG Tameuh ly nangchi ai sang neangneang peung hai sy, adeu nai kamta amtheaung hai sy!

¹²Na i y nangchi i ka-jo ka-thui padyh padawi pi nai kalop kalen ai kaimy tlairei ly mana kasa pajau ai mo?

¹³Nangchi cheng theaung tleirei theung i, cheng nai, pany thai nai hawi lulip pany nai khumichi ai vawi u. Nichi ai nangchi i vui lu sa nai keung y kang khai pi ai,” napi.

¹⁴Nangchi my huni ai hawi, nanai ngai u bawibawi bo.

¹⁵Huna nai deaungkho y kai ly nangmychi cheng theaung theung i lulip pany nai luchi vawi iy kang khai pi bo. Phyreichi ai ly leaung sangrei, phyreichi ai ly leaung chungvairei, phyreichi ai ly leaung vui pangrei, phyreichi ai ly leaung horei peang ai nai khai pi nai ne. Huni bo y nangchi cheng theaung bawibawichi i vui takhra miteaung kehchi ai py kang khai pi bo.

¹⁶“Huni neng khala kai ly luchi teng y, “Nangmychi cheng theaung tengtawi ka-jo ka-thuichi hawi, nangchi hawi vanrei awm nai cheng takhrachi hawi ka-jo ka-thui ngiereichi py adyh adawi pa-rei chih pi u.

¹⁷Padyh padawi nai khala meimai katheang kalen khen y naimy, adyh adawi pa-rei chih u. Nangchi i padyh padawi nai ly Tameuh i kangai ne nai deaungkho y, jei u moh. Nangchi my chih pajau y nai awm lawh baly kai teng y tym hai u, kaimy chih pi ai.

¹⁸Huni neng khala my, nangchi i sa ai nai ngiereichi ai kaimy leu kang pei yb nai ne.

¹⁹“Achi ly achi i ARENG Tameuh my leu ang pei nai kamta achi sa bo. Achi ly Sinai mawi i theu nai khala, kau parai iy ka-jei awm nai daichi ka-vym tako prei naimy mawi nawi parai nai Amori pri mang y khuleaung amsa u nai ne. Achi ly Kadesa Barnea y tym nai khala y,

²⁰kaimy kang thui pi nai ly ‘Achi i ARENG Tameuh, achi i amsi pajochi i Tameuh my achi ai ang pei ai nai Amori mawitleaung pri y vai ly nangchi tym u bo. Khen u, mymy i leu pei nai kamta tiu iy peang u. Patyh u moh ly jei py jei u moh,’ nanai kang thui pi bo.

²²“Na i py nangchi ly kai teng y ahihawi iy, ‘Pri i awm nai sai khen pavui iy mani lam mang tiu ai mo, marychi i awm nai sai mana mo, nanai satang pei teang pajau ai nai achi i mo mang y khen paviu nai keungchi ai pato man sina,’ nanai tau pei u bo.”

²³“Huni ly hawi nai katau ne i, kai ly theaung harei y leaung leaungrei, khumi leaung holai nyhreichi ai vawi takhra bo.

²⁴Nichi ly mawitleaung pri Esakola leaunghawi tym pa-rei chei iy, hu y khen paviu u bo.

²⁵Nichi ly huni meingtym i theu nai thengthai phyrei ang syn pi. Achi i ARENG Tameuh my ang pei nai pri ly khri pa-rei pa-tiu khuta hawi, nanai nichimy ang thui pi u bo.

²⁶“Na i py nangchi ly nangmychi i ARENG Tameuh i leu tangai u y iy, huni pri y kun ai nai ngai u y lawh.

²⁷Nangmychi tengtawi tangam naimy, ‘ARENG ly achi ai niu ngai y nai deaungkho y Amori chengchi i kiu y achi ai dei hai ai nai Aikupta pri i dengdairei ang pahawi nai bo, nanai josei u pangau lawh.

²⁸Achi ly ati mana nai y huni pri y chei ai mo? Achi jei parai. Achi my pato nai khumichi my ang thui pi nai ly huni pri i khumichi ly achi tleaung y atho awm iy len ka-sang ne. Nichi ly kani y angteu na pa-rei asang nai mary apai theung y awm u. Khri pa-rei tleungtlang len nai khumichi ai kaniu u na a!’ nanai thui u bo.

²⁹“Na i py kaimy nangchi teng y, ‘Huni khumichi ai jei u moh.

³⁰Nangchi i ARENG Tameuh ly Aikupta y py, daichi ka-vym theung y py nangchi ai ang kry nai kamta, vai py nangchi ai pahawi iy nangchi i vui tavai ang tiu pi ai mang;

³¹ampo my chapo ai teu nai kamta, ARENG ly nangchi ai dawmkhawn iy, hini meingtym y tym pa-rei ang pahawi nai bo, nanai nangchi niu u bo,’ napi.

³²Huna nai kaimy kang thui pi teu i py, nangchi ly vum y maiteaung my,

³³kani thun y tamai angjawi my, nangchi i mo mang lam patei iy nangchi tai ai nai meingtym hau pi nai keung ARENG ai ym u y lawh,” napi.

³⁴ARENG ly nangchi i josei naichi thai nai khala kado theu i, pany hai patyp nai ly

³⁵‘Nangchi i amsi pajochi teng y pei ai adeu nai pa-tiu khuta hawi nai pri y, hini deung kangthau khumi aso y naichi theung i leaungrei py kun ai nai ngo y ai.

³⁶Jephonneh i chapo Kaleb leaungrei naini kun ai khyh. Ni ly kai i tlang tleaung y ka-ym awm nai ne i, ni i khen paviu nai pri amtym ai nai ni hawi ni i kangpreangchi teng y kapei ai,’ napi.

³⁷ARENG my nangchi i molam y kai ai py kado theu hai iy thui nai ly ‘Mosi, nang malawn py huni pri theung y kun ai ny y.

³⁸Na i py nang i bangtang Nun i chapo Josua ly huni pri y kun ai nai nga ai; Josua ai sabawm u. Ni ly Israela chengchi ai lu sa iy huni pri peang ai,’ napi.

³⁹“Naibaly ARENG my achi bawibawi teng y, ‘Nangchi ly paleung ka-echi kiu y tym ai, nanai thui nai cho deaungdichi, hawi nai hawi y nai khawilang thai y nai nangchi i cho deaungdichi naini huni pri y kun u ai. Kai ly huni pri nichi teng y pei nai deaungkho y, nichi ly peang u ai.

⁴⁰Na i py nangchi ly amhi iy Akaba pangli Katheaung mang y tako naimy, daichi ka-vym theung y amki u,’ napi.

⁴¹Nangchi my kai teng y, ‘Mosi awi, kaichi ly ARENG i tlang tleaung y kamngo sa u bo. Na i py vai kaichi i ARENG Tameuh my leu pei nai kamta, vai tavai thau u ai,’ nanai pathang u bo. Naibaly nangchi ly mawitleaung pri ai rai y naimy tiu pajau ai nai athang khai i, nangchi ly tavai tiu ai nai angvei u rym bo.

⁴²“Na i py ARENG my kai teng y, ‘Tavai thau u y ai nai nichi ai thui pi; ati mana nai mo na baly kai ly nichi hawi vanrei awm hai y leang. Nichi ly tavai sum ai,’ ang napi.

⁴³Kai ly nangchi teng y ARENG i leu pei nai thui pi i py tangai u y. Nangchi ly mymy ai ka-awi sa iy amlyh am-e i, mawitleaung pri mang y amsa u bo.

⁴⁴Naibaly mawitleaung pri y awm yb nai Amori chengchi ly khawi kanghu my tabawm nai kamta, nangchi ai ang tiu u bo. Nichi ly nangchi ai ang hui i, Edom pri Hormah mary y nangchi ai tavai sum hai bo.

⁴⁵Hunai deaungkho y nangchi ly ARENG i sabawmra nga ai nai, vo naimy hnei takeng u bo; na i py mymy ly nangchi i hnei nai raawi tangai pi y i, bawi lo pi y leang.

⁴⁶“Hunaibaly achi ly Kadesa meingtym y kra parai pa-rei awm nai ne.