Read Khumi Chin Leu Thui Nai 10 Bible Online

Leu Thui Nai 10 - Khumi Chin bible

Leu Thui Nai 10

¹“Naibaly ARENG my kai teng y, ‘Angchei i kamta lengseaung phei nyhrei si ly khaira dengkeaung tengta py so. Naibaly kai i awm nai mawi saleung y lyn kalau;

²nangmy kawi hai vui nai lengseaung phei nyhreira y kai i tajiu nai reitachi, hini lengseaung phei nyhreira y kang tajiu pi teang ai. Naibaly lengseaung phei nyhrei ai tengta theung y khai me ai nai tla,’ napi.

³“Hunaibaly kai ly Akasia dengkeaung hawi tengta sa iy, angchei i lengseaung phei nyhrei hawi ka-tawm khyp si chum baly, hunichi syn naimy mawi y lyn kalau bo.

⁴Naibaly ARENG ly mawi kheutang y nangchi akachu u nai kani y my, mai kangveaung theung mang dengdairei nangchi teng y pei nai leu sai horei ai, angchei i tajiu pi nai kamta huni lengseaung phei nyhreira tajiu pi bo. Huni lengseaung phei nyhrei ly ARENG my kai teng y ang pei;

⁵naibaly kai ly mawi i nai satla kathiu bo. ARENG my leu pei nai kamta kai ly huni lengseaung phei nyhrei ai, kaimy sa nai tengta theung y khai me i, vaini khrairei awm jo nai ne.

⁶(Israela chengchi ly Jaakan khumichi i tuikan dengdairei theu u iy Moserah tai naira mang y chei u bo. Aron ly huni tai naira y dei i, hu y up nai ne. Ni i chapo Eleaza ly ampo i pathyp pi nai keung kalop amtym bo.

⁷Nichi ly hu i nai Kudkodah tai nai mang py, huni bo baly tui hawi nai Jobatha meingtym mang y chei u.

⁸Mawi[8]salo y ARENG ly Levi theaungchi teng y Leu Maikawm Pawm kry ai nai py, pathyp pi nai keung kalop sa ai nai py, mymy i amyn y amtheaung hai nai kalop py au nai ne. Nichi ly vaini khrairei huni kalopchi sa u bo.

⁹Huna nai y Levi theaungchi ly takhra theaungchi kamta, khu ka-peang ngo takhra y nai ne. Nangchi i ARENG Tameuh my adeu nai kamta, nichi ai ly ARENG i pathyp pi nai keungchi lawm ai nai khai takhra pi nai ne.)

¹⁰“Kai ly angchei i sa nai kamta mawi salo y kani vui palyhrei, kaawm nai ne. Nangchi ai tamyh y ai nai kaimy takeng pi nai y ARENG ly hini tlenrei py tangai pi bo.

¹¹Naibaly nangchi i amsi pajochi teng y pei ai adeu nai pri nangchi peang u ai nai nangchi ai pahawi ai nai tla,” nanai kai ai ang napi.

¹²“Aw Israela chengchi awi, nangchi i ARENG Tameuh i kangaichi tangai u: ARENG ai chiu u ly mymy i leu pei nai bawibawichi phai tangai u. ARENG ai paleung hawi verei tamen iy mymy i kalop so u;

¹³mymy i reita leu pei nai bawibawichi tangai u. Nangchi hawira nga ai nai vaini nangchi teng y hini reitachi kang pei nai ne.

¹⁴ARENG ly kani khusang salo y malawn py peang; khaileaung pri hawi huni theung y awm nai bawibawichi ai py peang nai ne.

¹⁵Na i py ARENG i tamen naira ly nangchi i amsi pajochi tlang tleaung y khri pa-rei len nai deaungkho y, khumi neangneangchi theung i nai nangchi ai vawi takhra nai ne i, nangchi ly vaini khrairei mymy i khumichi ne.

¹⁶Hunai deaungkho y nangchi ly vai i ka-so ARENG i leu pei naichi tangai u iy, nangchi i paleung tang naichi ly anawn u jau.

¹⁷Nangchi i ARENG Tameuh ly tameuh bawibawichi hawi areng bawibawichi tleaung y py len keh. ARENG ly nang parai iy sa thai naira angym nai Tameuh, tahm khai iy jei kaji ai hawi nai Tameuh ne. Mymy ly khumi ai patleh takhra y i, un py cho y nai ne.

¹⁸Mymy ly nurochochi hawi lumai nuchi ai pajyh patleh y naimy pahen pi. Nangchi hawi vanrei awm nai cheng takhrachi ai py tamen nai deaungkho y, nichi cha nei ateaung ai nai molam ka-vo sa pi.

¹⁹Hunai deaungkho y cheng takhrachi ai tamen u, ati mana nai mo na baly nangchi py, vaichi khala Aikupta pri y cheng takhra kamta awm u vai nai deaungkho y ne.

²⁰Nangchi i ARENG Tameuh ai jei kaji iy, mymy ai naini chiu u ai nai tla. Mymy ai ka-ym awm iy mymy i amyn hawi phai leu adeu u.

²¹Mymy ai palo u, mymy ly nangchi i Tameuh ne; mymy ly nangchi i vui rengrang tlai naichi ang sa pi nai ly nangmychi i mei y niu u bo.

²²Nangchi i amsi pajochi ly Aikupta pri y tym nai khala, leaung vui saryhrei awm khyh. Na i py vai ly nangchi i ARENG Tameuh my nangchi ai kani mang i ka-sichi tanrei ang peung hai bo.