Read Khumi Chin Leu Thui Nai 11 Bible Online

Leu Thui Nai 11 - Khumi Chin bible

Leu Thui Nai 11

¹“Nangchi i ARENG Tameuh ai tamen iy mymy i reita bawibawichi ai tangai u ly patawm u.

²ARENG ai nangmychi kypkyp my niu u nai deaungkho y, mymy i satangchi py pany u bo, nanai vaini dawn u. Nangchi naini huna nai avum u nai ne. Nangchi i cho chanauchi ly hunichi avum u y. ARENG i nang parai nai sa thai naira hawi,

³rengrang ka-ma-rachi ai nangchi niu u bo. ARENG ly Aikupta samrang hawi ni i pri verei y ati mana pajeng mo, nanai nangchi niu u bo.

⁴Aikupta tavaimichi ly nangchi ai hui nai thym khala, mymy ly nichi i keaungngochi, tavai ka-richi hawi vanrei tavaimi kamkawm bawibawichi ai pangli kamsen y anum hai nai sai py, nangchi niu u bo.

⁵Nangchi hini meingtym y tym y rai kha i, daichi ka-vym y nangchi i vui ARENG my sa pi nai sai py, nangchi pany u bo.

⁶Ruben theaung i Eliaba i chapo Dathan hawi Abiram nini i tlang tleaung y mymy i sa naichi py pany u ali ai. Khumi bawibawichi i mei ka-niu y, nichi ly mychi i yhm dengtheungchi, taichi, miseaungchi hawi tawnbawichi raurei, khaileaung my pajawn be bo.

⁷Ne, ARENG i sa nai lyh ai hawi naichi, nangmychi kypkyp my niu u bo.

⁸“Vaini nangchi ai kaimy pei nai reita leu bawibawichi patawm u. Huna i naini nangchi ly hu mang vai i pri peang u pajau ai.

⁹Huni bo y nangchi i amsi pajochi hawi nichi i kangpreangchi teng y pei ai adeu nai pa-tiu khuta hawi nai pri y, nangchi ly kra parai pa-rei awm ai nai nga u ai.

¹⁰Vaichi khala nangchi awm u nai Aikupta pri y nangchi ly lichira y akawm parai naimy tui paleaung iy chohchi pati u bo;

¹¹na i py nangchi amtym ai nai pri ly mawichi hawi leaunghawichi awm nai pri ne i, kani khutui hawi pati nai pri,

¹²nangchi i ARENG Tameuh my saneng jeungrei kry jojo nai pri py ne.

¹³“Hunai deaungkho y nangchi teng y vai, kaimy pei nai reitachi phai patawm u; nangchi i ARENG Tameuh ai nangchi i paleung hawi verei tamen iy mymy i kalop phai so u.

¹⁴Huna khala naini mymy ly nangchi i vui choh, kreip hang, olive asitui, nangchi i tawnbawichi i vui achachi prau ai nai kaseih kani, kanipui kani ly

¹⁵my i neng y nai hai ai. Hunaibaly nangchi ly cha nei takang y ai.

¹⁶Nangchi ly ARENG ai khai su iy tameuh takhrachi chiu u y ai nai dawn u.

¹⁷Nangchi ly tameuh takhra ai chiu u lawh baly, ARENG my kado ang theu hai ai. Mymy ly kani khang hai ai i, li hlauchi jengha iy amti amjangchi prau thai ai ny y. Huna nai khala ARENG my pei nai pri ly paitiu khuta hawi teu i py, nangchi ly kra y naimy dei u ai.

¹⁸“Huni reitachi ai pany u jo ly dawn u patyp. Hunichi pany jo ai nai ka-ma-ra ly nangchi i kiubanchi y py, lukati y py akawm u.

¹⁹Nangchi i cho chanauchi teng y py hini reita leu pei naichi patiu pi u. Nangchi yhm y awm i py, khuleaung keung y py, anawn khala py, kalop sa nai khala py, hini reitachi thui pi u.

²⁰Nangchi i katheu laibeaungra py, apai katheu pa-kho lukaura py hunichi tajiu u.

²¹Huna nai sa u baly nangchi hawi nangchi i cho chanauchi ly ARENG Tameuh my amsi pajochi teng y pei nai pri y heng sau u ai. Khaileaung salo y kani khusang awm nai ryrei nangchi ly huni pri y awm u ai.

²²“Kaimy nangchi teng y kang pei nai reita bawibawichi patawm ai nai dawn u. Nangchi i ARENG Tameuh ai tamen iy leu pei naichi patawm u ly ka-ym awm u.

²³Huna khala naini nangchi tavai thau u nai khala, nangchi tleaung y hubai nawi iy sa thai naira len nai chengchi ai ARENG my paryh pi pawn ai i, nichi i pri nangchi my peang vui pajau ai.

²⁴Nangchi i kheu chiu nai khaileaung ngierei ly amtym u bebe ai. Nangchi i khu ka-peang ly tokalawi mang daichi ka-vym dengdai tosyh mang Lebanon mawi khrairei, nisi mang ly Euphrat tavo dengdai nidym mang Mrethe Pangli khrairei kau ai.

²⁵Nangchi i ARENG Tameuh my leu pei nai kamta, nangchi i tym nai meingtym tleirei i khumi bawibawichi ly nangchi ai jei u ai. Amimi py nangchi ai amtang pajau ai ny y.

²⁶“Amtheaung naira hawi amsawi lawi naira theung i, ha harei vaini vawi u.

²⁷Vaini kaimy kang pei nai nangchi i ARENG Tameuh i reitachi ai nangchi patawm u baly, amtheaung naira nga u ai.

²⁸Na i py nangchi ly hini reitachi patawm y naimy, jangni y nangchi chiu vai y nai tameuh takhrachi ai chiu u lawh baly amsawi lawi ai.

²⁹ARENG my nangchi peang ai nai pri y ang pahawi nai khala, nangchi ly huni amtheaung naira ai Kerizim mawi saleung y py, huni amsawi ai Ebal mawi saleung y py, amthang hai u.

³⁰(Hini mawi nyhrei ly Jordan tavo nidym mang, Jordan tavo jawn y awm nai Kanan chengchi i khu ka-peang theung y awm. Huni mawi nyhrei ly Kilakala mary sahawi khai takhra nai Moreh thengreung hawi palo tleh y nai meingtym mang y awm.)

³¹Nangchi ly Jordan tavo angpeang u iy, nangchi i ARENG Tameuh my pei nai pri ly peang u ai. Nangchi ly huni pri peang iy khuteng sa u nai khala,

³²vaini kaimy nangchi teng y kang pei nai reita bawibawichi tangai iy patawm ai nai tami u moh.