Read Khumi Chin Leu Thui Nai 13 Bible Online

Leu Thui Nai 13 - Khumi Chin bible

Leu Thui Nai 13

¹“Nangchi theung y amo, ti y baly amang thui pachai kawp nai leaung leaungrei my,

²vaichi khala nangchi chiu vai y nai tameuhchi ai chiu hai ai nai molam, ka-ma-rachi hawi lyh ai awm naichi py sa pi ai, nanai ang thui pi lym ai. Ni i thui pi nai kamta rengrang ka-ma-rachi hawi lyh ai awm naichi patei pajau lawh teu i py,

³huni khumi i leu tangai u moh. Nangchi ly ARENG ai paleung hawi verei tamen mo, tamen y mo, nanai pany ai nai nangchi i ARENG Tameuh ly nichi ai teaung iy, nangchi ai cham nai ne.

⁴ARENG teng y abang u ly mymy ai phai taham khai u; mymy i reitachi patawm u ly mymy i leu tangai u. Mymy ai chiu u ly mymy ai ka-ym awm u.

⁵Na i py nangchi ai Aikupta miseaung i nai lawi hai nai keung ARENG ai tiu ai nai ang parawi nai amo, ti y baly amang thui pachai kawp naichi ai ly padei pawn ai nai tla. Huni khumi ly nangchi ai ARENG i leu pei nai hengra lam dengdairei amphri hai vui ai nai parawi nai keung ne. Huni tamang naira i nai nangchi asyn vui thai ai nai, huni khumi ai padei vui ai nai tla.

⁶“Nang i amjo amnau, nang i cho chanau, nang i tamen nai aju, nang i amrawi keh nai ahawi leaungleaungrei my malawn py, nang hawi nang i amsi pajochi my jangni i ka-so chiu vai y nai takhra tameuhchi ai chiu ai nai kangviu y ang parawi lym ai.

⁷Nichi theung i leaungrei my nangchi sahawi y awm nai khumi, ti y baly nangchi hawi kamlo y awm nai khumichi i tameuhchi ai chiu ai nai ang parawi lym ai.

⁸Na i py nangchi ly ni my parawi nai tleirei abang u moh; nichi i thui nai leu ai malawn py tangai u moh. Ni ai pahen moh, amo hai moh.

⁹Ni ai padei vui! Ni ai padei naira y nang ly ni ai lengseaung hawi aphi man ai nai tla, huni bo y takhra khumichi my aphi u na sy.

¹⁰Ni ai ly lengseaung hawi aphi iy padei ai nai tla! Nangchi ai Aikupta pri miseaung i nai atleu nai keung, nangchi i ARENG Tameuh teng i hi vui ai nai ni my parawi nai ne.

¹¹Naibaly Israela cheng bawibawichi ly hini satang thai nai deaungkho y amimi py, huna nai kamngo sa tamang bi ai nai vam u ai ny y.

¹²“Nangchi i ARENG Tameuh my pei nai marychira y awm u nai khala,

¹³nangchi cheng theaung theung i khumi hawi y nai phyreichi my, saleaung avang vanrei adawi naichi teng y, vaichi khala nichi chiu vai y nai tameuhchi ai chiu ai nai parawi nai satang thai baly,

¹⁴nangchi ly hawi hai deng patumpati u; huni satang teng khyp lawh baly,

¹⁵huni mary i khumi bawibawichi hawi, nichi i tawnbawi leilachi py padei pawn ai nai tla. Hinichi awm nai marychi py taphra be ai nai tla.

¹⁶Huni mary y awm nai khumichi i vawnsai bawibawichi py mary umtang i ly-um y pakheng achu ai nai tla. Naibaly mary hawi vanrei vawnsai bawibawichi ai nangchi i ARENG Tameuh teng y kapathypra palawn iy, leng patlum ai nai tla. Hu y mary kangtha palum u teang bi moh, phra seaungkhrang naimy awm jo sy.

¹⁷Taphra vui ai nai vawn ha harei py, nangmychi i vui pakym u moh. Huna nai kamta sa baly ARENG ly kado katheu rym ai i, nangchi ai ang pahen ai. Vaini kaimy nangchi teng y kang pei nai reita ngiereichi tangai iy, mymy i kangai sa u baly,

¹⁸nangchi amsi pajochi teng y adeu nai kamta mymy ly nangchi ai pahen ai i, nangchi i khumi cheng ang peung hai ai.