Read Khumi Chin Leu Thui Nai 16 Bible Online

Leu Thui Nai 16 - Khumi Chin bible

Leu Thui Nai 16

¹“Nangchi i ARENG Tameuh ly Abiba lo vum y, nangchi ai Aikupta pri i dengdairei atleu nai deaungkho y, huni lo y ARENG ai palo ai nai Katlen vui nai Pawi so u.

²Nangchi ly chiu ai nai meingtym harei khyh nai mang y chei iy, nangchi i ARENG Tameuh ai palo ai nai huni meingtym y si, ti y baly beram tleh naimy Katlen vui nai Pawi so u.

³Nangchi ly Aikupta pri i dengdairei theu u kathawnkarawn nai thym khala, angbo abawi y nai tako cha u nai kamta, Katlen vui nai Pawi sa baly, angbo abawi y nai tako kani saryh ryrei cha ai nai tla. Nangchi ly ngari kamtang avum nai Aikupta pri i dengdairei theu u nai kani ai, deungtasarei pany jo ai nai, ngari kamtang napi nai angbo abawi y nai tako cho u.

⁴Nangchi i awm nai pri y kani saryhrei sala, mani yhm y py angbo awm moh sy. Angchei kani dym y tleh nai tawnbawi mawi ly huni vum y my cha keng ai nai tla.

⁵“Nangchi ai ARENG Tameuh my pei nai pri meingtym takhrachira y Katlen vui nai Pawi i vui tawnbawichi tleh moh. Chiu ai nai meingtym harei khyh naira y naini, Katlen vui nai Pawi tawnbawi tleh ai nai tla. Nangchi ly kani dym nai khala Aikupta pri i dengdairei theu u bo. Hunai deaungkho y kani dym nai neng y, tawnbawichi tleh ai nai tla.

⁷Nangchi ly chiu ai nai meingtym harei khyh naira y, huni mawichi byh iy cha chum baly, kani pa-nyh khawn ly yhm mang y vawi u ai nai tla.

⁸Nangchi ly kani tariurei sala angbo abawi y nai takochi cho u ly saryh kani y ly akachu iy nangchi i ARENG Tameuh ai chiu u, huni kani y kalop so u moh.

⁹“Nangchi choh tyn angchei nai dengdairei, Anawn kani tlen saryhrei rip u.

¹⁰Naibaly nangchi i ARENG Tameuh ai palo ai nai chohboleh Pawi so u. Nangchi i ARENG Tameuh ly nangchi ai amtheaung hai nai kamta, paleung kangai katalamrachi ai pawira y syn u.

¹¹Nangchi i marychira y awm u nai nangchi i cho chanauchi, miseaungchi, cheng takhrachi, Levi theaungchi, nurochochi, lumai nuchi hawi vanrei, ARENG i mo y amo theu nai pawi so u. Huni Pawi ly chiu naira meingtym harei khyh naira y sa u ai nai tla.

¹²Nangchi ly hini leu pei naichi patawm ai nai pany u; nangchi ly Aikupta pri y miseaung achei vai nai tami u moh.

¹³“Nangchi ly choh ati pajau nai hawi, kreip athai hang tapi pajau nai bo y, Taichy Pawi kani saryhrei sa ai nai tla.

¹⁴Nangchi i marychira y awm u nai nangchi i cho chanauchi, miseaungchi, cheng takhrachi, Levi theaungchi, nurochochi, lumai nuchi hawi vanrei huni pawi so u.

¹⁵Nangchi i ARENG Tameuh ai palo nai hini pawi ly kani saryh ryrei, chiu naira meingtym harei khyh naira y sa u ai nai tla. ARENG my amtheaung hai nai deaungkho y, nangchi ly amti amjang pakym nai deaungkho y py, nangchi kalop eaung nai deaungkho y py, amo theu nai pawi so u.

¹⁶Nangchi cheng theaung i neampacho bawibawichi ly Katlen vui nai Pawi, chohboleh nai Pawi, Taichy Pawichi sa ai nai chiu nai meingtym harei khyh naira y sanengrei y tlen thomrei jeu iy, ARENG ai chiu ai nai tla.

¹⁷Nangchi i ARENG Tameuh my amtheaung hai nai ka-lyp, khumi luteng katalamra syn ai nai tla.

¹⁸“Nangchi i ARENG Tameuh my pei nai mary tleirei y, tara chih nai keungchi hawi takhra miteaung kehchi khai ai nai tla. Nichi ly meimai khen y naimy, tara chih ai nai tla.

¹⁹Nichi ly tara chih nai khala teng y nai hawi meimai khen ai nai tlo y, un tangka py cha ai nai tlo y. Huni un langseaungchi ly khumi kachengchi hawi khumi kahawichi i mei paju hai iy, tara lam tamang hai reng nai ne.

²⁰Nangchi i ARENG Tameuh my pei nai pri ai peang iy, huni pri y awm u jo thai ai nai, nangchi ly leu meitang naimy chih pi jojo ai nai tla.

²¹“Nangchi i ARENG Tameuh i vui maicham sa u nai khala, maicham sahawi y tameuh nu Aserah i dengkeaung leungcheng leng moh.

²²Naibaly myn ai chiu nai lengseaung leungcheng py leng u moh; hunichi ai ARENG ly niu ngai y nai ne.