Read Khumi Chin Leu Thui Nai 2 Bible Online

Leu Thui Nai 2 - Khumi Chin bible

Leu Thui Nai 2

¹Achi ly ARENG my leu pei nai kamta amki iy Akaba pangli Katheaung mang y tapai naimy, daichi ka-vym theung y ali teang i, Edom pri mawitleaung mang y kra parai pa-rei amki u nai ne.

²“Naibaly ARENG my kai teng y,

³‘Nangchi ly huni mawitleaung pri y kra parai pa-rei amki u bo i, tosyh ngan mang y chei u,’ napi.

⁴Naibaly mymy ly nangchi i vui kai teng y leu ang pei nai ly: ‘Nangchi ly nangmychi i amjo amnau Esaw i kangpreangchi awm nai Edom pri mawitleaung tako u prei ai bo. Nichi ly nangchi ai ang jei u ai. Kai ly nichi i khaileaung bipeurei malawn py nangchi ai kang pei ai ny y.

⁵Na i py nangchi ly nichi ai tiu u moh. Kai ly Esaw i kangpreangchi teng y huni Edom pri pei yb veng bo.

⁶Nangchi ly nichi teng iy tui hawi teicha teinei van iy cho u,’ napi bo.

⁷“Nangchi i ARENG Tameuh ly nangchi i sa nai ngierei ai mana amtheaung hai mo, nanai adawn u. Hini kau parai nai daichi ka-vym khuleaung lam jeungrei nangchi ai ang kry nai ne. Mymy ly nangchi hawi vanrei saneng vui palyhrei awm hai nai deaungkho y, nangchi i ngai nai cheaungkhangchi ang pei bo.

⁸“Hunai deaungkho y achi ly Elath mary hawi Ezijokeba mary dengdairei pangli kadei mang y tako nai lam i nai amphri iy, nisi tosyh ngan Moba pri mang chei nai daichi ka-vym lam mang y tako u bo.

⁹ARENG my kai teng y, ‘Lota i kangpreang Moba khumichi ai khrukhra hai u moh; tavai tiu u moh. Kai ly nichi teng y Ara mary kapei veng bo i, nichi i khaileaung ly nangchi ai kang pei y leang,” napi.

¹⁰(Ara mary y vaichi khala tleungtlang len iy atho awm nai Anakim khumichi kamta Emim chengchi awm reng.

¹¹Nichi ly cheng takhra Anakim khumi kamta len ka-sang pan tlai; Anakim khumichi kamta nichi ai Rephaim khumi, nanai py palau u. Na i py Moba khumichi my ly nichi ai Emim khumi, nanai palau u.

¹²Jangni khala Edom pri y Horit khumichi awm u vai teu i py, kangkhym mang ly Israela chengchi ly ARENG my pei nai pri i dengdairei paleung ka-echi ai paryh vui nai kamta, Esaw i kangpreangchi my huni khumichi ai tamyh vui iy, hu y saleaung khuteng sa u bo.)

¹³“Naibaly ARENG my leu pei nai kamta achi ly Zered tavo angpeang u nai ne.

¹⁴Kadesa Barnea i dengdairei Zered tavo angpeang nai ryrei saneng 38rei kra nai ne. ARENG my leu pei nai kamta, huni deung kangthau theung i tavaimi leilachi ly dei be bo.

¹⁵Huni khumichi myh keng hai ai nai ARENG i sa thai naira haiho ly hunichi mang y awm.

¹⁶“Tavaimichi myh keng nai bo y

¹⁸‘Vaini nangchi ly Ara mary y tako nai lam mang Moba pri khujyh tako prei ai nai tla.

¹⁹Hunaibaly nangchi ly Lota i kangpreang Ammon chengchi i pri sahawi y tym u ai. Kaimy nichi ai pei yb nai ly nangchi ai kang pei ai ny y nai deaungkho y, nichi ai khrukhra hai u moh ly tavai py tiu u moh,” napi.

²⁰(Vaichi khala Rephaim khumichi awm nai deaungkho y, Rephaim pri, nanai palau. Ammon khumichi my ly nichi ai Zamzummim, nanai palau.

²¹Nichi ly Anakim khumi kamta len ka-sang pan tlai nai ne. Nichi ly khumi nawi parai i, haiho len nai cheng ne. Na i py ARENG my nichi ai tamyh vui i, Ammon chengchi my nichi ai peang vui iy khuteng sa u bo.

²²ARENG ly Edom mawitleaung pri y awm nai Esaw i kangpreang Edom khumichi i vui py, huna nai kamta sa pi teang. Mymy ly Horit chengchi ai tamyh vui nai deaungkho y, Edom chengchi ly nichi i pri peang vui iy, vaini khrairei huni pri y khuteng chah u nai ne.

²³Kariti tlawn i khumichi ly Mrethe pangli peang jeungrei y awm u bo. Nichi ly hu y awm yb nai Avim chengchi ai tamyh pawn iy, nichi i pri tokalawi ngan Kaza mary y tym pa-rei peang u veng bo.)

²⁴“Achi ly Moba pri katlen vui nai bo y ARENG my achi teng y leu pei nai ly ‘Vaimy tako u amteaung ly Arnon tavo angpeang u jau. Hesabon mary i Amori samrang Sihon hawi ni i pri verei peang ai nai sa thai naira kang pei ai. Ni i pri y peang vui ai nai tiu u amteaung jau.

²⁵Vaini dengdairei meingtym tleirei y awm nai khumichi ly nangchi i amyn thai baly nangchi ai jei nai kaso theu hai ai,’ napi.

²⁶“Naibaly kai ly Kedemoth daichi ka-vym dengdairei Hesabon samrang Sihon teng y savaichi kapato i:

²⁷‘Kaichi ai nang i pri mang tako prei ai nai pei kyh. Kaichi ly langvawi lamtang lam amphri y naimy, nang i pri lam phreung kataw naini tako u ai mang.

²⁸Kaichi ly tui hawi teicha teinei vang kang pei ai. Kaichi bawibawi ly nang i pri theung mang tako prei ai nai ngai.

²⁹Kaichi i ARENG Tameuh my pei nai pri y tym ai nai Jordan tavo angpeang y rai khala, samrang nang i pri mang tako prei ai nai ngai. Edom pri y awm nai Esaw kangpreangchi hawi Ara pri y awm nai Moba chengchi ly nichi i khu ka-peang theung mang tako prei ai nai ang pei nai ne’ napi.

³⁰“Na i py samrang Sihon ly achi ai ni i pri theung mang tako prei ai nai pei y. Nangchi i ARENG Tameuh my huni samrang i paleung tang hai nai deaungkho y, achi my ni ai tiu pajau vui i, ni i pri peang vui iy vaini khrairei achi ly hu y khuteng sa jo nai ne.

³¹“Naibaly ARENG my kai teng y, “Khen cham, kai ly samrang Sihon hawi ni i pri ai, nang i kiu y kang au ai. Ni i pri ai tiu u ly peang vui jau,’ ang napi.

³²Samrang Sihon ly achi ai tiu ai nai my i tavaimi bawibawichi hawi Jahaz mary sahawi y ang tym u bo.

³³Na i py achi i ARENG Tameuh ly huni samrang ai achi i kiu y au nai deaungkho y, ni hawi ni i chapochi hawi vanrei, tavaimi leilachi ai tleh krai bo.

³⁴Huna nai khala my, achi ly nichi i marychi peang be iy tamyh chau bo; neampacho, neampachy hawi deaungdi bawibawichi ai py, leaungrei ai py kangheng khai y.

³⁵Tawnbawichi hawi mary theung i vawnsaichi py la u be bo.

³⁶Achi i ARENG Tameuh ly Arnon leaunghawi kachawn i, Aroer mary hawi, leaunghawi umtang i mary dengdai Kilead mary khrairei, mary ngiereichi ai achi ai peang hai bo. Mani mary my py achi ai amtang pajau y.

³⁷Na i py Ammon chengchi i pri py, Jabbok tavo peang y py, mawitleaung pri i marychira py, achi i ARENG Tameuh my chei hai y nai meingtymchira y achi chei u y leang.