Read Khumi Chin Leu Thui Nai 21 Bible Online

Leu Thui Nai 21 - Khumi Chin bible

Leu Thui Nai 21

¹“Nangchi i ARENG Tameuh my nangchi ai pei nai pri theung i adymra y padei keung pany y nai khumi kadei harei avum ai.

²Nangchi i miteaung kehchi hawi tara chih nai keungchi ly khen iy, khumi kadei avum nai meingtym hawi kasa nai marychi ka-khan pata ai nai tla.

³Naibaly veu hawi kasa keh nai mary i miteaung kehchi ly kalop so hai vai y rai nai si nu beaungjeaung harei vawi ai nai tla.

⁴Huni si nu ai tui kang y nai tavo micheaung sahawi i khaileaung kangheng meingtym mang y pahawi ly hunira y si nu i kaneaung khei iy tleh ai nai tla.

⁵Levi theaung pathyp pi nai keungchi py huni meingtym y chei u ai nai tla; ati mana nai mo na baly nichi ly hina nai kasi tara tleirei y tara chih ai tla nai deaungkho y ne. Nangchi i ARENG Tameuh ly mymy i kalop sa hai ai nai hawi mymy i amyn y amtheaung hai ai nai vawi takhra naichi ne.

⁶Naibaly khumi kadei veu niu nai meingtym hawi kasa keh nai mary i miteaung keh bawibawichi ly si nu beaungjeaung salo y tui hawi kiu asi iy,

⁷thui ai nai leu ly ‘Kaichi ly hini khumi ai padei y leang, ami my padei mo, nanai py kaichi pany y.

⁸Aw ARENG, nangmy Aikupta pri i dengdairei atleu nai Israela chengchi i kamngo pahen pi kyh, kaichi i kamngo py pahen kyh ba. Kamngo by y nai khumi leaungrei ai padei nai kamngolai ly kaichi i tlang tleaung y tym hai moh kyh ba,’ nanai thui ai nai tla.

⁹Naibaly ARENG i kangai sa nai deaungkho y, nangchi ly khumi kadei nai kamngo tlo y ai.

¹⁰“Nangchi i ARENG Tameuh ly nangchi ai tavai eaung hai iy nangchi my langheng y hawi nai khala,

¹¹nichi theung y mo hawi nai neampachychi niu ai i, khrei nai y pom ai nai ngai u ai.

¹²Huni neampachy ai nangmy i yhm y hawi iy, sam vau hai ly kiu pachynchi py takip hai ai nai tla.

¹³Baichu ateaungchi ali hai ai nai tla. Ni ly nang i yhm y awm iy mymy i amhm ampo i vui lorei paleung si naimy awm sy; naibaly nang ly ni ai aju palawn pajau bo.

¹⁴Huni bo y nang ly ni ai pom jo ai nai ngai y lawh baly, mymy ngai nai kamta awm thai ai nai pei ai nai tla. Nang ly ni ai athorei my aju palawn nai deaungkho y miseaung palawn moh, miseaung y tangka hawi py jo vui moh.

¹⁵“Neampacho leaungrei ly aju leaung nyhrei awm iy aju leaung nyhrei ly chapo tapen hawi ai; na i py chapo chalu ly my i khrei keh nai aju i chapo ny y lawh ai.

¹⁶Huni khumi ly my i chapochi ai yhmtheaung paji nai khala, my i khrei keh nai aju i chapo ai chapo chalu nga ai avo nai yhmtheaung ly pei ai nai avo y.

¹⁷Chapo chalu ly my i khrei keh nai aju i chapo ny y i py, ni i nga sang nai yhmtheaung phy nyhrei pei pi ai tla. Huni chapo ly chapo chalu ne, nanai pany hai iy, ni i nga sang nai phychi ly pei pi ai nai tla.

¹⁸“Amhm ampo my thui parip i py leu atangai y iy, sangkhri nai chapo awm lawh baly,

¹⁹Amhm ampo ly huni chapo ai mary i miteaung kehchi teng y, jo preng ai nai tym hai ai nai tla.

²⁰Amhm ampo my nichi teng y, ‘Kaini i chapo ly paleung tang nai, amhm ampo ai sangkhri iy leu tangai y; tangka pasum atyhtyh iy, khri pa-rei nei cha pavui ryry na, nanai amti pi ai nai tla.

²¹Naibaly mary i khumichi my huni chapo ai lengseaung hawi aphi ka ai nai tla. Hina nai sa iy nangchi ly huni kamngo tama hai pajau ai. Israela cheng bawibawichi ly huni satang thai nai deaungkho y jei u ai.

²²Padei ai ataing nai kamngo sa nai molam y padei vui nai khumi i veu ai ly dengkeaung y bang hau baly,

²³huni veu ai ly vumtorei khai u jo moh. Veu ai dengkeaung salo y bang hau nai ly pri i vui taham si nai deaungkho y, huni kani y my up vui ai nai tla. Nangchi i ARENG Tameuh my pei nai pri ai amso ngai hai y ai nai, huni veu ai ly up veng ryp ai nai tla.