Read Khumi Chin Leu Thui Nai 22 Bible Online

Leu Thui Nai 22 - Khumi Chin bible

Leu Thui Nai 22

¹“Nangmychi Israela cheng tengtawi leaungrei i si mo, beram mo lam tamang nai niu baly, niu y ka-awi so y naimy yhmkeung teng y tha pi teang ai nai tla.

²Na i py huni yhmkeung i awm nai meingtym ly palo lawh teu i py, yhmkeung ly ami mo, nanai pany y i py, huni si, ti y baly beram ai nangmy i yhm y hawi ai nai tla. Yhm keung hau nai tym baly pei pi teang ai nai tla.

³Nangmychi Israela cheng tengtawi i, keaungngo kano kasau mo, baichu ateaung mo, takhra sai sairei mo tama iy nang niu lawh baly, huna nai kamta sa ai nai tla.

⁴“Nangmychi Israela cheng tengtawi i keaungngo kano kasau mo, ti y baly si mo, lam y atlym nai niu baly, nang ly sabawm y nai awm moh; pathau kaleuteu ai nai tla.

⁵“Neampachy ly neampacho i baichu ateaung amchiu ngau y; hunai kamta neampachochi py neampachychi i baichu ateaung amchiu ngau y. Huna nai kamta sa lawh nai khumichi ai ly nangchi i ARENG Tameuh ly paso nai ne.

⁶“Nang ly tavo tabu harei ai dengkeaung tleaung y mo, khaileaung y mo, niu iy tavo nu my kaduichi, ti y baly chochi ai oh hai nai ne baly, huni tavo nu ai patiu moh.

⁷Tavo chochi ai ly la pajau, na i py tavo nu ai ly patleaung ai nai tla; huna nai sa baly nang heng sau iy chawn pa ai.

⁸“Nang ly yhm kangtha sa nai khala, amphu teng ka-ki tapang prei ai nai tla. Huna nai tapang prei yb iy khumi leaungrei ly amphu salo mang tla nai dei lawh i py, nang i tlang tleaung y tlo y ai.

⁹“Nang i kreip akho y kreip keung hawi vanrei takhra thengthai keung ui ngau y. Huna nai ui lawh baly kreip athai hawi takhra thengthai keung i athai cho ngau y.

¹⁰“Si katai hawi keaungngo kano kasau tai iy thawn tabom hai moh.

¹¹“Beram mui hawi palo kalang tabom iy aneng nai ateaung ly amchiu ngau y.

¹²“Nang i kanih taki palyhreira y thaiphelawmchi tai ai nai tla.

¹³“Neampacho leaungrei ly neampachy leaungrei hawi apom chum nai bo y, huni neampachy ai khrei y nai deaungkho y, ni ly anglo ny y, nanai thui lawh baly,

¹⁵neampachy i amhm ampo my chaniu ly anglo ne, nanai pany hai nai ka-ma-ra syn iy mary i miteaung kehchi teng y chei hai ai nai tla.

¹⁶Huni neampachy i ampo my, “Kai i chaniu ai hini khumi hawi apom hai nai ne i, vai ly chaniu ai ngai y pasi lawh.

¹⁷Ni my kai i chaniu ly anglo ny y leang, nanai teng y nai leu thui nai ne. Na i py kai i chaniu ly anglo ne, nanai pany hai ai nai apom nai dym i, nini i ahawi nai khala thi akau nai nibai khen cham!’ nanai miteaung kehchi teng y amti pi ai nai tla.

¹⁸Naibaly mary i miteaung kehchi my juvo ai pakhau iy parip ai nai tla.

¹⁹Huni khumi ly Israela neampachy leaungrei ai kangji pei nai tla lawh nai deaungkho y, tangka cho chungvairei peh pi hai ai nai tla. Huni peh hai nai tangka ai neampachy i ampo teng y pei ai nai tla. Huni bo y ni ly neampachy ai mymy i aju palawn ai nai tla. Mymy heng nai ryrei ly huni neampachy ai akhai ai nai tlo y.

²⁰“Na i py neampacho i seu nai ly teng khyp iy, neampachy ly anglo ne, nanai ka-ma-ra patei pajau y lawh baly,

²¹mary i miteaung kehchi my neampachy ai ampo i yhm katheu pa-kho mo y hawi iy, mary i khumichi my lengseaung hawi aphi ka ai nai tla. Huni neampachy ly apom y rai nai ampo i yhm tleaung kamleaung sa nai deaungkho y, Israela chengchi theung y kangji pei nai ne. Hina nai sa iy nangchi ly hawi y nai amjy ai tama hai pajau ai.

²²“Neampacho leaungrei ly juvo awm nai neampachy leaungrei hawi ta-pui ta-chi apha nai khala patiu rang lawh baly, nini leaung nyhrei ai padei mei ai nai tla. Hina nai sa iy nangchi ly hawi y nai amjy ai tama hai pajau ai.

²³“Neampacho leaungrei ly takhra khumi leaungrei hawi apom ai nai angam yb nai neampachy hawi mary theung y ta-pui ta-chi apha nai patiu rang lawh baly,

²⁴nini leaung nyhrei ai mary angam mang y patheu iy, lengseaung hawi aphi ka ai nai tla. Neampachy ly mary theung y aeu iy kasabawmra hnei baly nga pajau nai iy, kasabawmra hnei y nai y padei ai nai tla. Neampacho ly mychi Israela cheng leaungrei i aju angam yb nai neampachy hawi ta-pui ta-chi apha lawh nai y, dei ai nai tla. Hina nai sa iy nangchi ly hawi y nai amjy ai tama hai pajau ai.

²⁵“Neampacho leaungrei ly takhra khumi hawi apom ai nai angam yb nai neampachy hawi mary angam mang y avum iy pajang lawh baly, huni neampacho ai naini padei ai nai tla;

²⁶neampachy ly dei ai ataing na pa-rei kamngo so y nai deaungkho y, ni ai padei ai nai tlo y. Hini ly neampacho leaungrei my takhra khumi leaungrei ai ka-jo hau iy padei nai kahm kamta ne.

²⁷Huni neampacho ly neampachy ai mary angam mang y pajang nai ne i, neampachy my aeu iy kasabawmra hnei i py, ni ai sabawm ai nai khumi by y nai deaungkho y ni ly kamngo by y.

²⁸“Neampacho leaungrei ly takhra khumi hawi apom ai nai angam yb nai by y nai neampachy ai pajang nai khala patiu rang lawh baly,

²⁹huni neampacho ly neampachy i ampo teng y pajanglai tangkacho vui pangrei peh ai nai tla. Huni khumi ly neampachy ai athorei my pajang nai deaungkho y, my i aju palawn ai nai tla. Mymy heng nai sala ryrei ly huni neampachy ai akhai ai nai tlo y.

³⁰“Neampacho ami py ne sy, ampo i aju leaung leaungrei hawi tamang nai ly ampo ai kangji pei nai ne.