Read Khumi Chin Leu Thui Nai 24 Bible Online

Leu Thui Nai 24 - Khumi Chin bible

Leu Thui Nai 24

¹“Neampacho leaungrei ly neampachy leaungrei hawi apom chum nai bo y, huni neampachy i tlang tleaung y khrei y ai naira niu nai deaungkho y akhai ai nai ngai lawh baly, ni ly huni neampachy teng y akhai nai cha pei iy yhm i nai satla hai ai nai tla.

²Huni neampachy ly takhra neampacho leaungrei hawi yhmtheaung sa bi iy,

³pa-nyh juvo my py, huni neampachy ai akhai ai nai ngai nai molam y akhai nai cha pei iy, yhm i nai satla hai nai khala py ne sy, mymy dei nai khala py ne sy,

⁴angchei i juvo ly huni neampachy ai pom ali teang moh sy; ati mana nai mo na baly huni neampachy ly chai y leang bo, nanai dawn ai nai tla. ARENG ly huna nai yhmtheaung sa bi nai ai paso nai ne. Nangchi i ARENG Tameuh my pei nai pri y huna nai amso ngai nai kamngo so u moh.

⁵“Aju la ang vawi nai Neampacho ai tavai keung y palau moh, ati mo pri kalopra py so hai moh. Ni ly yhm y aju hawi amo theu parai naimy awm ai nai, huni kalopchi sanengrei so hai moh.

⁶“Nang ly khumi leaungrei ai sai sairei alai ai pei nai khala, ni i choh nip nai sum ai ly ka-peaung talam moh. Talam lawh baly kalai keung i hengra ai ka-peaung talam nai hawi atawm.

⁷“Israela cheng tengtawi leaungrei ai athorei my patiu iy miseaung y palawn nai, ti y baly miseaung y jo nai khumi ai ly padei vui ai nai tla. Hina nai sa iy nangchi ly hawi y nai amjy ai tama hai pajau ai.

⁸“Nangchi theung y ka-jei awm nai nganpeih no man nai khala, Levi theaung pathyp pi nai keungchi teng y kaimy leu pei yb nai kamta sa ai nai dawn patyp ai nai tla. Nichi teng y kaimy leu pei yb nai kamta tangai u.

⁹Achi ly Aikupta pri dengdairei theu u nai thym khala, nangchi i ARENG Tameuh ly Miriam ai mana pajeng mo, nanai pany u.

¹⁰“Nangchi ly khumi leaungrei teng y sai sairei alai ai pei nai khala, huni khumi i ka-peaung khai nai baichu ateaung la ai nai, ni i yhm theung y kun ai nai tlo y.

¹¹Mymy naimy ang syn nai ka-peaung vawn ai yhm angam mang ajeng iy talam ai nai tla.

¹²Ni ly khumi kamawn leaungrei ne lawh baly, huni baichu ai kani dym y naimy pei pi teang ai nai tla.

¹³Ni ly huni baichu amchiu iy i nem pajau ai nai dym tleirei pei pi. Naibaly ni ly nang ai ang kawn ai, nangchi i ARENG Tameuh my py kawn ai.

¹⁴“Nangchi i mary theung y awm nai khumi kamawn Israela cheng tham nai khumi ai py, cheng takhra tham nai khumi ai py, li-tapawp moh.

¹⁵“Kani tleirei kani dym y naimy, ni ai ka-tham vang pei pi ai nai tla; nichi ly kamawn nai deaungkho y ka-tham tangka ngai nai ne. Nang ly vang pei y baly ni my ARENG teng y hnei ai i, nang ly kamngo sa nai lawm ai.

¹⁶“Cho chanauchi i kamngo nai molam y, amhm ampochi ai padei moh. Hunai kamta amhm ampochi i kamngo nai molam y, cho chanauchi ai padei moh. Khumi luteng ly amy i kamngo molam y naini padei ai nai tla.

¹⁷“Nangchi ly cheng takhra khumichi hawi nurochochi i nga ai avo nai ly pei pi ai nai tla. Naibaly lumai nu i baichu ateaungchi ka-peaung vawn palawn iy talam pi moh.

¹⁸Nangchi ly Aikupta pri y miseaung achei vai nai ai py, nangchi i ARENG Tameuh ly nangchi ai atleu nai ai py pany u; hunai deaungkho y kai ly nangchi teng y hini reita kang pei nai ne.

¹⁹“Nangchi amti amjangchi pakym u nai khala, pakym bawi y nai chohvuichi ai ali teang iy, pakym u moh. Huni chohvuichi ai cheng takhrachi, nurochochi hawi lumai nuchi i vui daw pi ai nai tla. Huna nai kamta sa baly nangchi i ARENG Tameuh my nangchi i sa nai ngiereichi ai amtheaung hai ai.

²⁰Olive athaichi py tlenrei jaw nai bo y, jaw kamthu ly ali teang iy jaw u bi moh; huni awm rai nai athaichi ly cheng takhrachi, nurochochi hawi lumai nuchi i vui pahai pi ai nai tla.

²¹Kreip akho theung i kreip athaichi py tlenrei jaw chum nai bo y, jaw kamthun ly ali teang iy jaw bi moh; huni awm rai nai athaichi ly cheng takhrachi, nurochochi hawi lumai nuchi i vui pahai pi ai nai tla.

²²Nangchi ly Aikupta pri y miseaung achei vai nai ai mana khala py tami u moh; hunai deaungkho y kai ly nangchi teng y hini reitachi kang pei nai ne.