Read Khumi Chin Leu Thui Nai 25 Bible Online

Leu Thui Nai 25 - Khumi Chin bible

Leu Thui Nai 25

¹“Israela cheng khumi leaung nyhrei ly ka-jo ka-thui molam tara jeung y tym hawi nai khala, leaungrei ly kamngo by y, leaungrei ly kamngo awm, nanai leu pacheang bo.

²Kamngo awm nai khumi ai ly pakhau ai ataing nai leu pacheang baly, ni ai ambeu hai iy pakhau ai nai tla. Huni khumi i tamang nai katheang, kalen ka-lyp pakhau hai ai nai tla.

³Na i py pakhau nai ly tlen vui palyhrei pakhau khyp ai nai tla khyh; huni tleaung y nawi lawh baly, khumi mipuichi theung y kangji pei nai tla ai.

⁴“Nangchi iy choh ati hai nai si katai i labeaung pakau khyp moh.

⁵“Amjo amnau leaung nyhrei ly vanrei awm iy, leaungrei ly chapo by y naimy dei vui i, ni i aju lumai ly takhra neampacho leaungrei hawi apom ngau y. Kadei khumi i amnau my huni neampachy ai kup ai nai tla.

⁶Israela cheng theung y dei nai khumi i yhm dengtheung kangpreang tamo y ai nai, huni neampachy i tapen nai chapo chalu ly kadei khumi i yhmtheaung kamtym lawm ai nai tla.

⁷Na i py amnau ly dei vui nai i amjo ai kup ryp ai nai ngai y lawh baly, huni neampachy ly mary theung i miteaung kehchi teng y chei iy, ‘Kai i juvo i amnau ly Israela cheng theung y, amjo i kangpreang awm jo ai nai ngai hai y lawh,’ nanai amti pi ai nai tla.

⁸Naibaly mary i miteaung kehchi my huni neampachy juvo i amnau ai palau iy deng ai nai tla. Ni ly huni neampachy hawi apom ai nai ngai y, nanai pathang lawh baly,

⁹amjo i aju lumai ly mary i miteaung kehchi mo y huni khumi i phainai pheirei leng vui iy neampacho i meimai y pachi pathawi nai tarawi y, ‘Amjo i kangpreang peung hai ai nai ngai y nai khumi ai ly hina nai sa ai nai ataing,’ nanai thui ai nai tla.

¹⁰Israela cheng theung y ni i yhm dengtheungchi ai, ‘Phainai aleng hai nai khumi i dengtheung,’ nanai palau ai nai tla.

¹¹“Khumi leaung nyhrei ly ajo ani nai thym khala, leaungrei i aju ly juvo ai akeung hai ai nai atho sa i, takhra neampacho i taheaung ai atheu lawh baly,

¹²huni neampachy i kiu tawp vui ai tla, ni ai pahen moh.

¹³Nangchi ly takhu, tum, teaung, sie khyrychi hawi neh nai khala tapawp moh.

¹⁵Nangchi i ARENG Tameuh my pei nai pri y nangchi heng sau thai ai nai, teng khyp nai takhu, tum, teaung, sie khyrychi teaung u.

¹⁶ARENG ly li-tapawp nai khumichi ai niu ngai y nai ne.

¹⁷“Aikupta pri i dengdairei nangchi theu u nai khala, nangchi ai Amalek chengchi my ati mana ang sa mo, nanai pany u.

¹⁸Nichi ly Tameuh ai jei y nai deaungkho y, nangchi atho kheih, atho bai nai thym khala, nangchi i nithun mang hui iy ang tiu u bo, kangkhym y awm jo nai bawibawichi ai py nichi my padei be nai ne.

¹⁹Hunai deaungkho y nangchi ly ARENG Tameuh my pei nai pri y tym iy, tengpang sahawi i paleung ka-echi my tiu naira i law tleaung nai, tlamsa naimy awm nai khala, Amalek cheng bawibawichi ai tamyh pawn ai nai tami u reng moh!