Read Khumi Chin Leu Thui Nai 26 Bible Online

Leu Thui Nai 26 - Khumi Chin bible

Leu Thui Nai 26

¹“Nangchi i ARENG Tameuh my pei nai pri y peang iy awm u nai khala,

²nangchi ly amti amjang chaluchi ai takhu theung y khai iy, chiu nai meingtym harei khyh naira y syn u ai nai tla.

³Huni neng khala y kalop sa nai pathyp pi nai keung teng chei hai iy ni teng y, ‘Achi i ARENG Tameuh ly amsi pajochi teng y adeu nai pri y achi tym u bo, nanai mymy teng y vaini pany hai bo,’ napi.

⁴“Naibaly Pathyp pi nai keung ly huni takhu nang teng i nai la iy, nangchi i ARENG Tameuh i maicham mo y khai pi ai nai tla.

⁵Hunaibaly nang ly ARENG i mo y: ‘Kai i amjo amnauchi ly yhm hlau jeaungmang nai Aramean cheng ne; ni ly my i yhm dengtheungchi ai hawi iy Aikupta pri y awm ai nai chei nai khumi ne. Huni pri y tym nai thym khala khumi di parai teu i py, kangkhym y ly khumi neangneang peung iy sa thai naira haiho len nai cheng lawm u bo.

⁶Aikupta chengchi ly kaichi ai ana iy, miseaung kamta athorei my kalop sa hai bo.

⁷Huna nai khala kaichi ly amsi pajochi i ARENG Tameuh teng y kasabawmra nga ai nai aeu naimy takeng u nai ne. Mymy ly kaichi i takeng nai pathang pi iy, kaichi i patang nai hawi ngari tla naichi ang niu pi bo.

⁸ARENG ly mymy i sa thai naira len parai nai hawimy, kaichi ai Aikupta pri i nai atleu pi. Mymy ly rengrang ka-ma-ra hawi lyh ai awm nai patei iy, ka-jei awm nai pajeng nairachi tym hai nai ne.

⁹Mymy ly paitiu khuta hawi nai hini pri y ang pahawi bo.

¹⁰Hunai deaungkho y kai ly mymy pei nai theung i amti amjang athai chaluchi ai vai, katalam bo,’ nanai thui ai nai tla. Naibaly takhu ly ARENG i mo y khai iy chiu ai nai tla.

¹¹Nangchi i ARENG Tameuh ly nang hawi nang i yhm dengtheungchi ai pahen nai deaungkho y, mymy teng y kawn nai leu thui u. Nangchi theung y awm nai Levi theaungchi hawi cheng takhrachi ly nangchi hawi vanrei amo theu nai pawi so hai u.

¹²“Saneng thomrei y tlenrei, nang i amti amjang nga nai theung i horei y harei ly Levi theaungchi, cheng takhrachi, nurochochi, lumai nuchi ai pei pi. Hina nai sa iy khumi mipuichi ly mymychi awm naira y bym pa-rei cha ai nai nga u ai. Huna nai pei chum baly

¹³ARENG teng y, ‘Kai ly pei ai nai khai takhra nai horei y harei ly yhm y pakhaw mai y leang. Nangmy leu pei nai kamta Levi theaungchi, cheng takhrachi, nurochochi, lumai nuchi ai pei nai ne. Horei y harei molam y nangmy leu pei nai ngiereichi ai takhawi y, tami y leang.

¹⁴Kai ly dei nai khumi i vui paleung si nai khala, horei y harei theung i la iy cho mai y leang; kai ly reita leaungsai y chai y nai thym khala y py, huni horei y harei ly yhm angam mang y patheu y leang; huni horei y harei theung i la iy dei nai khumi i vui talam y leang; aw ARENG, nang i leu pei nai kai ly tangai nai ne; horei y harei molam nang i leu pei nai kamta kasa be bo.

¹⁵Nang i awm nai kani pri meingtym kachai mang dengdairei khen katheu iy, amsi pajochi teng y adeu nai kamta pei nai paitiu khuta hawi nai pri hawi vanrei, nang i khumi Israela chengchi ai amtheaung hai ba, “nanai takeng ai nai tla.

¹⁶“Nangchi ly hini reita bawibawichi tangai ai nai nangchi i ARENG Tameuh ly vaini leu ang pei bo. Hunai deaungkho y huni reitachi ai paleung hawi verei ka-ym awm parai naimy tangai ai nai atho so u.

¹⁷ARENG ly nang i Tameuh ne, nanai, vaini nang ly pany bo; nangchi ly mymy i leu tangai ai nai py, reita leu pei naichi patawm ai nai py adeu u bo.

¹⁸ARENG ly adeu nai kamta, nangchi ai mymy i khumi ne, nanai vaini pany pi bo. Nangchi ly reita leu pei nai ngiereichi tangai ai nai leu pei nai ne.

¹⁹Mymy ly mymy i sa nai khumi cheng bawibawichi tleaung y, nangchi ai cheng kalen lawm hai ai. Nangchi saho y mymy i nang parai nai sai tahm asang ai. Mymy i adeu nai kamta nangchi ly mymy i khumi lawm u ai,” napi.