Read Khumi Chin Leu Thui Nai 27 Bible Online

Leu Thui Nai 27 - Khumi Chin bible

Leu Thui Nai 27

¹Naibaly Mosi hawi Israela cheng lu sa nai keungchi my khumi mipuichi teng y, “Vaini nangchi teng y kaimy pacheang nai bawibawichi tangai u.

²Jordan tavo angpeang chum baly nangchi i ARENG Tameuh my pei nai pri y tym u nai kani y lengseaung puichi leng iy, angkadeng pajui u.

³Huni lengseaung puichira y hini reitachi hawi amtiu nai ngiereichi tajiu ai nai tla. Nangchi i amsi pajochi i ARENG Tameuh my adeu nai kamta, paitiu khuta hawi nai pri y tym u nai khala,

⁴Vaini kaimy nangchi teng y leu kang pei nai kamta, Jordan tavo vai mang y tym baly Ebal mawi saleung y, hini lengseaung puichi leng iy angkadeng pajui ai nai tla.

⁵Tamo hawi si nai lengseaung ny y naimy, lengseaung hawi maicham so u,

⁶ati mana nai mo na baly nangchi i ARENG Tameuh i vui maicham ly khawi y nai lengseaung hawi sa ai nai tla. Huni maicham salo y leng patlum nai kapathyprachi talam ai nai tla.

⁷Amkawm nai kapathypra py talam ai nai tla. Nangchi i ARENG Tameuh i mo y kawn naimy cho u.

⁸Angkadeng pajui nai lengseaungchi tleaung y, Tameuh i reita leu pei nai bawibawichi hawihai palai tajiu u typ,” napi.

⁹Naibaly Mosi my Levi theaung pathyp pi nai keungchi hawi vanrei Israela cheng bawibawichi teng y, “Israela chengchi awi, kai i thui nai ngiereichi ai dawn patyp iy, tangai u. Vaini nangchi ly nangmychi i ARENG Tameuh i khumi lawm u bo;

¹⁰hunai deaungkho y mymy i leu tangai iy, vaini nangchi teng y kaimy pei nai reita leu bawibawichi tangai iy patawm u,” napi.

¹¹Naibaly Mosi my Israela chengchi teng,

¹²“Nangchi Jordan tavo angpeang chum nai bo y, khumichi teng y amtheaung nai leu pei nai khala, Simeon, Levi, Juda, Isakar, Josepha hawi Benjamin theaungchi ly Kerizim mawi saleung y angdo u ai nai tla.

¹³Naibaly amsawi pasawi nai khala: Ruben, Kad, Aser, Zebulun, Dan hawi Naphtali theaungchi ly Ebal mawi saleung y angdo u ai nai tla.

¹⁴Levi theaungchi ly tao pajeng parai naimy,

¹⁵“Lengseaung, dengkeaung, tamo hawi mynchi sa iy, hunichi ai ka-vym y chiu nai khumichi ly Tameuh teng i amsawi lawi ai. ARENG ly myn chiu nai ai paso nai ne,’ nanai vaineng tauh nai khala, “Khumi bawi bawichi my ‘Amen!’ nanai pathang u sy.

¹⁶“ ‘Amhm, ti y baly ampo ai tahm khai y nai khumi ly Tameuh i amsawi lawi sy,’ nanai vaineng tauh nai khala, khumi bawibawichi my ‘Amen!’ nanai pathang u sy.

¹⁷“Israela cheng tengtawi i khaileaung khujyh leungcheng kasyh vui nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my ‘Amen!’ nanai pathang u sy.

¹⁸“Mei kamju leaungrei ai lam tamang hai nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my ‘Amen!’ nanai pathang u sy.

¹⁹“Cheng takhrachi, nurochochi, lumai nuchi i nga ai avo naichi sum hai nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my ‘Amen!’ nanai pathang u sy.

²⁰“ ‘Ampo i aju leaung leaungrei hawi tamang iy, ampo ai kangji pei nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my ‘Amen!’ nanai pathang u sy.

²¹“ ‘Tawnbawi hawi apajang nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my ‘Amen!’ nanai pathang u sy.

²²“ ‘Tuicho ampro py ne sy, amhm vanrei ampo takhra nai tuicho hawi py ne sy, ampo vanrei amhm takhra nai tuicho hawi py ne sy, ta-pui ta-chi apha nai khumi ly Tameuh i amsawi lawi sy,’ nanai vaineng tau nai khala, “Khumichi bawibawichi my ‘Amen!’ nanai pathang u sy.

²³“ ‘Amy i ampi hawi ta-pui ta-chi apha nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my ‘Amen!’ nanai pathang u sy.

²⁴“ ‘Khumi leaungrei ai kangviu y padei nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my ‘Amen!’ nanai pathang u sy.

²⁵“ ‘Kamngo by y nai khumi ai padei ai nai un tangka cha nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my, ‘Amen!’ nanai pathang u sy.

²⁶“ ‘Tameuh i reita leu pei naichi hawi amtiu nai leaungsai bawibawichi tangai y nai khumi ly Tameuh i amsawi lawi sy,’ nanai vaineng tauh nai khala, “Khumi bawibawichi my ‘Amen!’ nanai pathang u sy.